E faafeao oe e le poto ma le atamai Waitangi Matautia-Tofilau

“O le tama poto e fiafia ai le tamā, ae o le tama valea e faanoanoa ai le tina”.
O upu masani lava e nanau i ai mātua i se tama poo se teine e faaiuina i le manuia a‘oa‘oga ma iu manuia, o se oso poo se meaalofa sili lea ona tāua, lea e toe momoli mai i lagona o nai mātua.
O le aso 4 o le masina o Me na faauu ai taumafaiga a le tamaitai o Waitangi Matautia-Tofilau mai i le Iunivesite o Aukilani. O lea faailoga na tauaaoina ma faamanuiaina ai Waitangi, o le Degree of Bachelor of Education (Teaching) E 3 tausaga na a‘oa‘oina ai o ia e sue ai lona faailoga Degree ma ua iai le faamoemoe e tautua ma galue i Aukilani i le 2 tausaga a o lei malaga mai e mau ma mafuta i Ausetalia i le atunuu o iai lona aiga, uso ma tuagane ma ona mātua.
O le tamaitai o Waitangi na soifua a‘e i Niu Sila peitai o ona auaiga ua aumau nei i Brisbane Ausetalia.
O tuuaga uma lava pe a mālōlō aoga i Aukilani e malaga mai lava o ia e mafuta i si ona aiga.
E ui lava la ina tuua na o ia i Aukilani ona o a‘oa‘oga, peitai ua mafai ona malosi le loto o lea tamaitai ona o le lagolago malosi a si ona toalua le susuga ia Misipele ma si ona aiga.
E ui lava ina misi o ia e mātua ma le aiga i Ausetalia nei ona o le uii i totonu o le aiga, peitai e iai le talitonuga e lē mamao foi le tuliina o le lua tausaga.
Alofaaga e lē uma ma faamanuiaga mo oe Waitangi mai ou mātua faaleagaga ia Rev Lance ma Lite Tautiepa ma le ekalesia EFKS Westside i Brisbane, o ou mātua ia Matautia (A’oa’o fesoasoani EFKS Westside) lou tina ia Salatomuaina Matautia, uso ia Tai & Nikolao Paulo & fanau, Leutu & Risati Vaoiva & fanau, Mosololo Taiofeite & Christine Matautia, Vao Matautia, faapea aiga uma, ae faasilisili alofaaga mai lau tautoga ia Misipele ma si lua tama o Si’u, faapea mātua o lou toalua i Aukilani, faapea foi uncle Lutu Filoalii Ioapo, aunty Meise Letufuga, ma cousin Wayne.