‘E na o le lua lava mea sa tāua ia John a o iai i Niu Sila; o sauniga a lana ekalesia ma lana aoga’
A sau le tama poo le teine i Niu Sila e aoga ae na te lagona le alofa moni i ona mātua ma le aiga o loo tapuai mai i Samoa, e telē le avanoa e iu lelei ai lona taumafai.
O lagona o le faafetai ma le faagaeetia o nai mātua ma aiga, i taimi o faauuga o fanau mai a latou aoaoga sa fitā ai i le tele o tausaga. Ae muai faafetaia le alofa o le Atua, auā sa lafoai atu i ona aao le puipuiga o nei fanau a o nonofo valavala ai ma mātua i vasa e tele. O le faaiuga o le tausaga na tea atu nei 2010, e tele lagona fiafia faapena sa iai i mātua, o fanau ma aiga, a o faagasolo faauuga a aoga mai lava i vaega laiti seia oo atu i iunivesite.
Lea foi sa lotolotoi ai le faauuga a le aoga a le Martin Hautus – The Pacific Peoples Learning Institute, e pei ona faailoa atu i se tasi o tala o i totonu o lenei lava lomiga o le vaiaso nei.
O John Fui, o se alii talavou Samoa na faamanuiaina mai i se avanoa sikolasipi a le Martin Hautus i le tausaga e 2009 e aoga mo le tusipasi, le Diploma in Tourism Management. Ua iu manuia le taumafai o le atalii, ma o se meaalofa tāua lea a John mo le nofo tapuai mai a nai mātua i Samoa, e pei ona malaga mai ai lava si ona tuaa, le tina ia Tauaana Fui auā le molimauina o le faauuga o si ona alo i le vaiaso mulimuli o Tesema.
Ina ua faatalanoa le tina ia Tauaana na ia ta‘utino, ‘a o iai si a‘u tama i Niu Sila i lana aoga, e toetoe a o aso uma ou te telefoni mai e asi ma faamautinoa o loo lelei mea uma.
Aemaise e lē mapu le faamanatu pea, ina ia ‘alo‘alo ese mai taaiga lē lelei a le toatele o tupulaga.’ Ma e molimauina e Sooalo lena tulaga lelei o le alii o John, ‘E na o le lua lava mea sa tāua ia John a o iai i Niu Sila; o sauniga a lana ekalesia ma lana aoga’. E lē o toe fou i le faafofogaaga a Samoa le polokalame tau aoaoga a le Martin Hautus, auā o Aso Tofi taitasi i luga o le Radio Samoa, o loo faatalatalanoa atu ai le sui sooupu mo faasalalauga a lenei a‘oga, le afioga Sooalo Setu Mua, a o ia faamatala auiliili tusipasi taitasi o loo aoaoina i le Martin Hautus ma o latou aogā. I se tasi o talanoaga ma Sooalo na ia ta‘ua ai, o le agaga tonu lea o loo taumafai le polokalame e faaolaola i nai o tatou tagata Samoa, aemaise pe afai o fanau mai Samoa ua agai mai e aooga.
E tāua tele le lagolagosua ia i latou a o faagasolo aoaoga, ae a mae‘a loa aoga ma ua faamanuiaina i tusipasi, e lelei lava le toe foi i le atunuu e faaaogā lena tomai e saili ai se galuega i Samoa, auā e telē le aloaia ma le amanaia o tusipasi nei mai polokalame faaiunivesite i atunuu i fafo, pe a saili ai galuega i Samoa.
E pei ona faamanatu pea e Sooalo, e lelei le toe foi o le tama ma le teine i Samoa e faigaluega ma fesoasoani i nai mātua ma le aiga, e faaaogā tatau ai le aoga na fai, nai lo le naunau e fia nofo pea i Niu Sila, pe taumafai foi aiga e taofi i Niu Sila, ae mulimuli ane ua oo ai ina nofo solitulafono i le ova o aso, ma amata ai loa ona faaletonu ma maumau le olaga.
Mo le alii o John Fui, ua lē gata ina faigofie ona maua ana galuega ina ua toe taliu i Samoa, ae i le lagolago malosi a ona mātua, ua mafai ai nei ona amata faatino se pisinisi a le aiga i Vaitoloa Faleata, o taavale rent, lea ua faaigoa o le LOANAIFOA RENTAL.
Ua toe foi la o se aga, amata le polokalame masani a le Martin Hautus i ona nofoaga e lua i Magele ma Onehunga, ma e iai le faamoemoe o le a toatele foi nisi alo o le atunuu e saili avanoa atu i ai. Ae mo John Fui, e momoli atu faamanuiaga a ou aiga uma ma uo mo lou faauuga. Malo finau! Malo le usitai!
