O se amataga lelei mo le au Netipolo a le Silver Ferns le taaloga, a o faasauni atu i tapenaga mo taaloga a le Taupulega le Commonwealth Games ia Oketopa, a o se lesona aogā tele foi mo le tamaitai Faiaoga o Linda Vaganā ma le au Netipolo a si o tatou atunuu i Samoa.
E lē taitai ona faatusatusa le malolosi, uumi toe tele le tomai ma le agavaa o le Silver Ferns a Niu Sila ma le au a Samoa, pe a fua i le tulaga o au a le Lalolagi i le taaloga Netipolo a tamaitai.
E lē gata i lea, a o mea o loo faaaogā i tapenaga, toleniga, o le taimi, faapea foi ma le itu tau seleni a atunuu e lua.
Na matuā faatumulia le fale taalo o Te-Rauparaha Arena i Porirua i Ueligitone i le toatele sa maimoaina lea taaloga a Samoa ma Niu Sila, ae na maua lava le iuga o le taaloga e lei mae‘a ina ua uma le 15 muamua poo le kuata, ua 24 le Silver Ferns i le 7 a si a tatou au, e vave atu le alu a ‘ai na i lo le uati.
E ui lava i le taumafai malosi a le Kapeteni a Samoa, le tamaitai o Francis Solia, peitai na atili ai ona faaopoopo le malosi o le Laulaau ma oo atu ai o latou ‘ai i le 46 – 15 i le ‘afa muamua.
Na maitauina le fetuunai solo o tamaitai o le Laulaau Siliva ma faataaalo uma foi le au faaleoleo ae na atili ai le malosi.
E oo foi i le alo o Samoa lea e fou ia Niu Sila o Grace Rasmussen, na mataina foi lana faatinoga ina ua sui atu ia Irene Van Dyk, ma ia mauaina ni ‘ai se 16 mai le 17 o polo na togi. E uma ane kuata e tolu ua 71 – 20.
Ua sauni atu nei le Laulaau Siliva a Niu Sila i le latou taaloga e tasi ma Jamaica, faatasi ai ma a latou taaloga masani e tolu ma Ausetalia ia Setema, a o lumanai taaloga a le Taupulega.
Na saunoa le tamaitai o Francis Solia, o le mea tāua ua tofo lana au i le ituaiga level ma le saoasaoa lea e i ai au tetele nei i le taaloga Netipolo, ma o loo tele se taimi e toe toleni ma vaai ai nai vaega e manaomia le faaleleia, a o lumnai le Commonwealth, lea e tulaga 5 ai Samoa talu mai le 2006 i Melepone, faatasi ai ma le qualify o Samoa i le Ipu o le Lalolagi i le tausaga fou.
O ‘ai a Samoa e 28 na maua mai togi i le mama a tamaitai o Shirig Chang 5, Malu Faasavalu 7, ma Monika Fuimaono e 16. Malo lava le finau, malo le taalo Samoa.
