Talu ai ona o le toatele o tupulaga talavou i totonu o ekalesia e fiafia i lenei taaloga o le kirikiti, aemaise ai o le toatele foi o alo ma fanau o le atunuu sa fananau i totonu o Niu Sila ma fofoa mai o latou olaga taaalo i le kirikiti i totonu o ekalesia, ua afua ai ona a’e se lagona o nisi o tamalii o le atunuu e fiafia i lenei taaloga e tatau ona fai se taamilosaga mo ekalesia eseese e toe putiputi mai ai fanau talavou i lenei taaloga.
Auā o le talitonuga o i latou o loo faafoeina lenei polokalame, o le olaga kirikiti o talavou na fofoa ma atia’e mai totonu o ekalesia i Niu Sila. O le mea moni, a oo ina o mātua i taaloga e fai a aulotu e alu lava le matua ma toso atu ai lana fanau, ma o iina e ola a’e ai le tama ma le teine talavou ua iloa lenei taaloga. O ekalesia o le nuu lena o le tagata iinei i Niu Sila, o lona uiga e ave le faamuamua a le tagata i lona aiga faatasi ai ma lana ekalesia o lea ua fai ma ona nuu.
O le tofa liuliu ma le utaga loloto a i latou ua amatamea i lenei faamoemoe mo ekalesia na maitauina ai i le Aso Tofi o le vaiaso ua mavae le faatumulia o le malaetaalo i Mount Wellington i le autapuai mai ekalesia eseese sa latou molimauina lenei faagatama. Ua militino faatasi lagona o le fiafia auā ua maua le avanoa e toe feiloai ai aiga uo ma ē masani o loo galulue i ekalesia taitasi.
O le faamoemoe ua maua ai le fealofaniga mo tupulaga talavou ae ua oo foi i mātua ma le aufaigaluega a le Atua ua maua ai foi le avanoa e faafesoaa’i ma mafuta faatasi. I le saunoaga a le afioga ia Tauatama Kalama Tofilau i le faatalanoaga ma Tavai i luga o le polokalame o le malu taeao, na ia ta’ua ai e lē o tele ni ‘au mai ekalesia o iai i le taamilosaga ona o loo iai le fuafuaga e tasi lava le aso e faataunuuina ai lenei faamoemoe, ma e fuafua foi i le avanoa o loo maua mai i malae.
O le lua ai nei o tausaga talu ona faavaeina mai lenei taamilosaga ma o loo faatamā ai le afioga ia Patele Iosefo Timu, taitaifono le afioga ia Tanoa’i Tai’i Alofipo Reupena Tanoa’i, sui taitaifono le afioga ia Tauatama Kalama Tofilau faatasi ai ma le lagolagosua a le susuga ia Leilua Winston Timaloa ma lona faletua ia Lilomaiava Yvonne Timaloa.
E valu ‘au o loo iai, e aofia ai ‘au e lua mai e ekalesia le Metotisi i le Sinoti i Matu ma le Sinoti i Saute, 2 ‘au mai le ekalesia EFKS, 2 ‘au mai le Katoliko ma ‘au e 2 mai le PIPC. O le taamilosaga lenei o loo faaaogāina ai tulafono o kirikiti faaperetania e pei ona masani ai.
Toe Siamupini Tama o le Meko
O le tausaga ua mavae na siamupini ai le ‘au malosi lenei a Tama o le Meko mai le Sinoti Metotisi i Matu, ae o lea foi ua toe suipi i lenei tausaga ina ua malolo ai le ‘au a le EFKS Aukilani i Saute i le la sailiga siamupini. O le ‘olo silia ma le ‘ai silia sa maua foi e sui o Tama o le Meko.
Siamupini – Tama o le Meko
Tulaga 2 – EFKS Aukilani i Saute
Tulaga 3 – Katoliko Brothers
Tulaga 4 – PIPC South East
Tulaga 5 – EFKS Auckland City
Tulaga 6 – Avondale PIPC
Tulaga 7 – Kato Uso’s (Katoliko)
Tulaga 8 – Metotisi i Saute.
O le faamoemoe o le komiti e faaauau pea lenei faatofala’iga mo ekalesia eseese i tausaga taitasi ina ia maua le sootaga fealofani o tupulaga talavou ma mātua ae faapea ma le aufaigaluega a le Atua.
