O le talitonuga maualuga oloo iai nei, o le atinaega o le mafaufau, tino, vafealoai ma isi faalogona, ma le agaga o le tamaitiiti, e amata mai i le aiga.
O lona uiga, o le atinaega o le tamaitiiti atoa e pei ona manaomia mo le agai i luma o le aoaoga o le tamaitiiti, e amata mai i le aiga.
O le faafaileleina o tamaiti i totonu o o tatou aiga, e iai le talitonuga, e nana le alofa, e le talafeagai le faaviivii ina nei logovii le tamaitiiti ona mimita ai lea. E faataua le usitai, e le talia se manatu o le tamaitiiti, e tatau ona faalogo ma usitai ae aua nei tali.
E nao faatonuga ina ia usitaia, ae leai se avanoa e faia ai se talatalanoaga ina ia malamalama uma i le tulaga oloo tulimatai. E le taua se sao o le fanau, o le mea taua o le faalogo ma usitai pe fiafia pe leai, ae usitai pea. E faaletonu loa, o le sasa ma le faifai e sosoo. E foliga mai e leai se alofa ae maualuga tulafono ina ia usitaia.
O lenei seneturi ua tatou iai, aemaise foi lenei atunuu oloo ua fefiloi tagata eseese e eseese tu ma aga ma talitonuga. Ua talafeagai le fetuutuunai o finagalo ini auala talafeagai ina ia maua e fanau ni avanoa lelei mo lo latou agai i luma. Ua oo i le vaitau ua taua le talatalanoa ma faamalamalama i fanau le mafuaaga o faaiuga a tatou matua.
O lenei atunuu e tele faafiafiaga ma tulaga e ono tosina iai le fanau. Peitai a talatalanoa i le fanau i le mafuaaga o a tatou faaiuga, ma faamalamalama aafiaga, aemaise tagata e aofia ai, o se vaega taua tele lea mo le fanau.
E ui ina faigata ona o le naunau i le mea e manao ai, ae e fetuutuunai o latou mafaufau ma malamalama lelei ai i le mafuaaga o faaiuga a matua.
E iai le talitonuga, o le aoga o lenei auala e faafailele ai le fanau i totonu o aiga, e maua ai o latou tomai e faia ai ni filifiliga poto ma le talafeagai i le lumanai. E fetuutuunai o latou mafaufau ma fuafua agai i aafiaga ona o filifiliga.
Ua tatou oo mai i lenei seneturi ua taua le faaali o lagona i le fanau ae faatuatuanai le nana o le alofa sa tatou masani ai. Sa tele lava le aoga i o tatou taimi i totonu lava o si o tatou atunuu ma o tatou alaalafaga. Sa tutusa uma talitonuga o matua ma vaega sa faatauaina.
Peitai, i lenei atunuu oloo tumu i tagata mai atunuu eseese e tofu lava ma a latou tu ma aganuu ma talitonuga, ua matua faigata ai foi tiute faamatua, ona ua masani i tu ma aga sa outou soifua ma ou ola ae ai, o le taua lea o le usitai, ae leai se avanoa e faaleo ai ni lagona.
O nisi o talitonuga i le faafaileleina o fanau e nao faatonuga ae leai se talatalanoa, e faigata i fanau ona faia ni filifiliga talafeagai ona e le masani ai, aua e faia e tagata matutua filifiliga uma ae nao le faalogo o fanau ma usitai.
Pe le o le mafuaaga ea lea e maualuga ai le aofai o fanau e pule i le ola, ona e tele mea e fia faaleoina, peitai e leai se avanoa. Ua tele le afaina o faalogona ona e le amanaia ma faatauaina so latou leo.
Afai e nana le alofa, e faapefea ona iloa e fanau lagona o matua? E faapefea ona iloa oloo amanaia ma faatauaina a latou faasoa poo galuega? E taua tele le faalaeiau ma le faamalosiau.
E faaosofia ai le fiafia e galue lelei ma tauivi mo se taunuuga sili ona lelei. E leai se aoga o le sasa ma le taufaifai, nao aiga malepelepe ma fevaevaeai le taunuuga.
A mafanafana, talitonuina, ma fiafia le siosiomiaga i le aiga, o le a atagia mai ai fanau e fetuutuunai o latou mafaufau ma faia ni filifiliga talafeagai pea fetaiai ma lui o lenei olaga.
E le gata foi i lea, latou te iloa ona ola faatasi ma isi tagata e ese foi o latou talitonuga ma vaega latou te faatauaina. Afai tatou te ausia ia vaega uma, ona avea ai lea o tatou o MATUA O LE 21 SENETURI. Talosia ia iai se aoga o nei tusitusiga aua ni lumanai manuia o fanau mo a taeao.
Manuia fuafuaga o lenei vaiaso.
