E tatau ona totogi Faifeau?
E faafetaia pea le agalelei o lo tatou Atua ona o lana pule faasoifua ua tatou maua i aso taitasi e ala i lona taitai mai o lo outou soifua ma si o matou ola i lenei vaiaso fou.
Avea foi lenei avanoa e faamanuia atu ai i tamā uma o Samoa o mafai ona mauaina lenei tautua. Ia faamanuia atu pea le Atua ia te outou ma la outou matafaioi i le fatuina o aiga.
Avea foi lenei avanoa e momoli atu ai foi le faamalo i tamā faaleagaga uma lava i soo se ekalesia Kerisiano o loo latou galulue i le fofogaina o le faaolataga a le Atua i vaiaso taitasi.
Malo lava le fai o le faiva, faafetai le leoleo i agaga.
O loo tatou iai pea i le mataupu e pei ona talanoaina masalo o lea ua fā nei vaiaso o tatou talanoa ai. O le faaoloaina lea o le faifeau ma lona aiga.
O le vaiaso na tea nei sa ou ta’ua ai ni vaega tāua e ala i le taimi o le faifeau aemaise o le silasila faaleagaga i le tulaga o le faifeau e lē o se tagata faigaluega e pei o o le tele o tagata faigaluega i kamupani ma pisinisi.
Sa tuuina atu foi se taiala e fesoasoani ia i latou o loo nafa ma le tapenaina ma le faia o le faaiuga i le auala ma le aofaiga e tatau ona faaoloaina ai le faifeau.
Ia manatua mai foi o se tulaga lenei e tele faifeau e matamumuli e talanoa ai ma tuuina atu faamataupu i luma o le ekalesia.
E oo foi i lo’u nei tagata ou te lei fai atu lava i le matou ekalesia o le aofaiga lea e tatau ona outou totogiina mai ia te au.
O se mataupu e ono faauiga sese e tagata ona o le lē malamalama ma latou faapea ai ua manao tupe le faifeau.
Ae ia mautinoa o le faifeau e fai foi ma e iai lona aiga ma lana fanau e tatau ona tausia ma faaaooga. O lana uluai ekalesia lea.
O nisi nei o vaega e ono silasila i ai le ‘au o loo nafa ma le suesueina o le auala talafeagai e faaoloaina ai le faifeau.
O le faifeau e lē o se tagata faigaluega. O le auauna ua valaauina e le Atua.
E lē mafai ona taitaia e se konekarate sainia ma le ekalesia. Ia manino lea tulaga.
Peitai e tatau ona iai ni tusitusiga faamaumauina ina ia manino ai le ekalesia faapea foi le faifeau i tiutefai ma le vafealoai o le ekalesia ma le faifeau.
O lea tulaga e lē masani ai Samoa. E leai foi ni mea faapea e fai i Samoa aemaise o le tatou tu ma aga.
O le osiga o le feagaiga i le va o le eklaesia ma le faifeau o se sauniga e faia i le ava, migao ma le mata’u i luma o le Atua.
Peitai o atunuu i fafo o loo tatou nonofo ma aumau ai e silasila lava le tulafono i le puipuiga o tagata, aemaise lava pe a iai tupe totogi.
E tāua lea tulaga ona e tatau ona totogi le lafoga a le faifeau i le ofisa o lafoga e pei lava o tagata uma.
O le faifeau e lē o se tagata faigaluega (employee).
E lē o se tagata o galue i se kamupani poo se pisinisi ae o le ekalesia.
E lē mafai ona fuaina e le uati taimi faaalu o le faifeau i le tele o mea e fai.
O le tele o galuega e foliga mai e lē o faatasi ma le sauniga i le Aso Sa ae o galuega o loo faia ina ia unai ai i luma le ola faaleagaga ma le faalauteleina o le ekalesia.
O le tagata faigaluega e amata i le 8 i le taeao ae mānava i le 4 i le afiafi. Alu o ia i le fale e lē toe manatu i le fale faigaluega.
Peitai o le faifeau e leai sona fale faigaluega. E leai foi se taimi faatapulaa e galue ai.
O le galuega a le faifeau e lē amata i le 8 ae mānava i le 4 i le afiafi.
E iai taimi e tapena ai le faifeau ma taimi mo lona aiga ae tupu mai se faalavelave i le ekalesia ona tia’i uma foi lea o ia fuafuaga i le leva o le po ae oso se ma’i, pe misa se ulugalii pe maliu se tasi e muamua lava ona tapa i le faifeau.
E lē mafai ona faapea mai le faifeau e fai atu ona ova taimi pe sue ane se tasi e suiina o ia ona o loo lē avanoa.
E tele lava isi tulaga i le soifua faafaifeau e tāua ai le malamalama o le ekalesia i le tulaga lenei o le faifeau na valaauina e le Atua na te tausia le galuega a le Atua ae lei faafaigaluegaina e le ekalesia.
I totonu o Niu Sila ua tele taimi ua oo ai i le faamasinoga lenei mataupu i le va o le faifeau ma le ekalesia pe a tulai mai se faaletonu poo se feeseeseaiga. O lea e tāua ai tele le malamalama i lenei mataupu.
O le tausaga e 1998 na oo ai i le faamasinoga i le va o Mabon ma le Koneferenisi Metotisi Niu Sila se tulaga faapea, lea na faia ai le faaiuga a le faamasinoga e faapea, “O se faifeau Metotisi e faatea mai i lana ekalesia e lē o se tagata faigaluega, ma e lē mafai foi ona tuuina mai sana tagi e uiga i lenei mataupu”.
Na faia le faaiuga a le faamasinoga ma iloa ai e leai se maliliega faaletulafono na faia e le faifeau ma le ekalesia. Peitai na talia e le faifeau le “valaauina e le Atua” o ia e galue i le ekalesia.
I lea foi faauiga na ta’ua ai e le faamasinoga lo latou lē fiafia e faia ni faaiuga faapea faalelotu auā o loo aafia ai le ola faatuatua o tagata ma mataupu silisili.
Masalo o le tulaga foi lena na inainā ai le Aposetolo o Paulo i le ekalesia i Korinito i lo latou ave o mataupu faaleagaga e faamasinoina e le lalolagi.
Faamanuia le Atua mo oe i lenei vaiaso,
Lui Ponifasio
www.luiponifasio.wordpress.com
