E faafeiloai atu foi i lenei vaiaso i le suafa o Keriso lo tatou Alii. O le faatalofa faapitoa i susuga i faafeagaiga ma faletua o ekalesia e fia i soo se tulimanu o le Kelope o loo galulue i le folafolaina o le tala lelei ia Keriso Iesu ma le faafaileleina o agaga ina ia matutua faaleagaga.
Malo le tau!
Ou te fia talatalanoa atu i le tāua o le ola a‘oa‘oina o le taitai. O se faaupuga e masani ona ou ta‘ua e faapea, “O le faleaoga lava aso uma”. O le ola a‘oa‘oina o le tagata e leai se tuaoi. E leai se taimi faatapulaa e ausia ona faapea lea ua uma ana a‘oa‘oga. O le ola a‘oa‘oina foi e lē faatulagaina mo ni nai tausaga poo ni nai mataupu.
O le taitai o le tagata ola a‘oa‘oina. Na te faaaogāina soo se mea e avea ma faiaoga mo ia, ina ia maua ai le poto.
Manatua foi o tagata o i lalo o se taitaiga o loo vaavaai atu lava ia i latou o loo i luga, i latou o loo faauluulu i ai se faalapotopotoga. Latou te fia a‘oa‘oina mai i taitai ni lesona lelei, lesona fou, ni uiga ma ni amio e fia faataitai i ai.
O le lagona lena ua mafua ai lenei tusitusiga, “E afua mai mauga le manuia o le nuu”. O loo latou vaavaai ma nōnō manū mai i o latou taitai.
Soo se tagata lava e fia mulimuli i se taitai e tumu lana ato i le sosia ma le uta. E lē oge i le faautaga ma le tamaoaiga.
O le taitai tapena ma sauni, e lē gaogao ii ae faaoloaina pea le tofa, ona o se tagata e saili ma ola a‘oa‘oina.
O le taitai e mataala e tapena i aso lelei mo aso leaga. A o lei tupu se faafitauli ua uma ona tapena ina ia foia a o lei tupu. Pe tupu foi faafuasei ae ua sauni ma le fofo e tuuina atu. A tupu se faafitauli i se faalapotopotoga, e pei e mata uma lava i le taitai poo le ā sana gaoioiga e fai. O le ā lana faaiuga o le a faia. O le ā sana faamatalaga o le a fai mai. O inā foi e fuatia ai le taitai.
O le tele la o mea e tutupu i le taitaiina o se galuega e avea ma luitau i le taitai. E avea ma lesona e a‘oa‘oina ai auā o le mea na tupu e toe tupu foi.
E masani ona talanoa Samoa i le tofa ma le faautaga, o ni mea e moomoo i ai. O ni mea e moomia e soo se taitai, soo se matai.
O le tofa ma le faautaga e lē o ni mea e te‘i ua maua faafuasei. E iai le talitonuga o nei mea e pei o ni maatāua e na o le loloto o le moana e maua mai ai. E maulu i ai le tautai matapalapala e saili.
A oo ina mānu a‘e le tautai toa ma nei maatāua, o le a faapea ona ia faailoa atu ma avea o ni mea e fia maimoa i ai lona aiga, ana uo, o le nuu i lona matagofie. O ni maatāua e taugata ma anagata.
O le taitai e mafai ona faasoa faapea lona tamaoaiga ma i latou o i lalo o lana taitaiga, o le a avea o ia ma faamanuiaga ia i latou. Saili le poto salalau, saili le tofa faaleatua, saili le faautaga e loloto. Ia avea oe o se taitai ola a‘oa‘oina.
Manatua o lou tiute o le taitaiina o tagata ae lē o le faamamaluina o lou tofi.
O lou tofi e faigofie ona mamulu, ae o le taitai o se mea lea e ia te oe pea, e lē mafai ona aveeseina e se tasi.
O le fesili, o faapefea ona faaoloa oe o le taitai? Ou te lē o talanoa atu i se tupe o e maua ae o le faaoloaina i le tofa faataitai. O ā tusi o loo e faitau i ai? O ai tagata o loo e faalogo i ai? O fea lou faleaoga faataitai? O ā ni lesona fou o loo e a‘oa‘oina i lenei vaitau? O ā ni metotia fou o loo e faataitai i ai?
I totonu o le galuega a le Atua, i ekalesia, o ā ni a‘oa‘oga o loo feagai ma oe ina ia lelei le taitaiina o le Ekalesia?
O le vaega e faaseseina ai le tele o taitai faalelotu poo susuga i faafeagaiga, o le faapea ua iu mai i le Kolisi faafaifeau poo le aoga faale-Tusi Paia.
E tolu tausaga sa a‘oa‘oina ai a‘u i le Kolisi ma pasi mai ai ma le fasipepa fai mai ua maua la‘u tikeri i mataupu faalelotu poo le faatelosia.
Peitai i lo‘u lagona, e lei taitai ona maosia le faavaa o le Tusi Paia i la‘u sailiga i lena tolu tausaga. O le tele foi o mea na ou a‘oa‘oina e lē o aogā i le taimi nei.
O le luitau mo faifeau ia filigā pea e saili ma suesue ina ia maua pea le tamaoaiga o le mafaufau ma le agaga ina ia lelei lana tufa atu i ē o mulimuli atu, poo le ekalesia lea, ina ia tofu le gogo ma si ana i‘a. E faapea foi soo se taitai lava i totonu o le ekalesia. O lau faifeau e lē o se tagata e pei o Superman, na te mafaia mea uma. E lē o ia te ia foi se atoatoa.
O le tāua lena o oe le tiakono, le toeaina, le faiaoga Aso Sa, le taitai autalavou, poo le ā lava lou tofi taitai ua valaauina ai oe.
Ia e ola fia a‘oa‘oina. Ia fetāla‘i le mafaufau auā o inā e maua ai le uta a le tagata poto. Aua le fefe e faataitai i mea fou ma mea lei faataitaia muamua.
Aua le fefe e fesili i isi faifeau ma isi taitai. Ia a‘oa‘oina oe mai mea sese a isi taitai ina ia aua ai ne‘i e pa‘ū atu i nei mea sese.
Ia a‘oa‘oina oe mai mea lelei ma le matagofie ua ausia e isi taitai e avea o ni mea e faaosofia ai lou mafaufau mo mea lelei.
Ia faamanuia mai le Atua i lau taitaiga. Ia aua ne‘i gau le tootoo, pe solo le fue faaleagaga.
Ia maua pea lau lauga, le tofa e pola puipui ai le galuega a le Atua.
Lui Ponifasio
www.luiponifasio.wordpress.com
