I le ava ma le faaaloalo e toe faatalofa atu ai i le mamalu lasilasi o Samoa, e afua mai mauga tetele seia oo ifo i mauga iti. Malo le soifua! E faafetaia pea le agalelei o lo tatou Atua!
O loo o‘u i Samoa i le taimi nei. Ina ua ou taunuu mai sa tele tala feaveai ma lomiga i nusipepa i le tele o faaletonu i ekalesia, ma faifeau, o misa ua tutupu, o falesa o le a talaina i lalo ona o feeseeseaiga, o faifeau e tu ma le sasa i totonu o le ekalesia, atoa ai ma se tasi o auauna a le Atua na fasia i le ala ma maliu ai.
E lagona lava le faanoanoa i nei tulaga. Ou te lē iloa le mafuaaga ae soo se mea lava e aafia ai le ekalesia, e lagona le popole ma le alofa ona e aafia ai lava tagata taitoatasi ma tuumāmāsagia ai le finagalo alofa o lo tatou Atua.
E valuvalusia a‘a o le fau i finagalo o susuga i faafeagaiga, o taitai o ekalesia ma tagata lotu uma ina ia tatou toe silasila i le ola faatuatua, silasila i auala o loo faatino ai le faatautaia o le Ekalesia.
I nai vaiaso ua tuanai sa amata ai ona tatou talatalanoa i le faifeau ma lona valaauina aemaise ai ona tiute e pei ona valaauina ai e le Atua ina ia mafai foi ona maua se avanoa e malamalama ai le lautele o tagata lotu i nisi foi o itu e mafai ai ona faatuputeleina le fetausiai ma le femalamalamaai a o tatou galulue ina ia atina‘e le Malo o le Atua ma manumaloina agaga i le ola e faavavau.
E talitonu le agaga ma ioeina le eseese o ekalesia ma tiutefai ua tofia i ai faifeau. E ave foi le faamuamua i le finagalo o le Atua ma lana valaauina faapitoa i lea auauna ma lea auauna i ona tiute poo agavaa faapitoa ua tofusia ai tagata uma.
Peitai e iai nai vaega e tāua ina ia mafai ona malamalama i ai tagata lotu aemaise o taitai o ekalesia i le va nonofo ai ma le faifeau. Sa tatou talanoa i le vaiaso na tea nei i le asiasiga a le faifeau. O vaega e mataituina e le faifeau ma le saogalemu o le galuega atoa ai ma le ola puipui foi o le ekalesia.
Se‘i o tatou talanoa i le laugaina o le Afioga a le Atua ma le galuega a le Auauna a le Atua. Ou te talitonu sa tatou ta‘ua foi lenei vaega i se taimi ua tuanai. O le tiute o le faifeau o le leoleoina o le lafu mamoe ma le fafagaina o le lafu mamoe e pei ona poloai Keriso ia Peteru.
O vaega nei e taua:
1. O meataumafa uma, a lē manaia i lau tausami ae e aogā mo lou soifua maloloina. O le tele o tagata Samoa e faalē fiafia e taumafa i fualaau‘aina ma fualaau faisua. Peitai e tāua tele mo le tino o le tagata. A oo ina fafagaina e le faifeau le lafu mamoe i le Upu a le Atua, e iai nisi o taimi tatou te lē fia faalogo ai i le lauga ma tatou faitio ma faapea ua faamasino le faifeau. Ia e manatua e iai lona aogā mo oe. O le tele foi o taimi tatou te lē fia faalogo ai, ae o se mataupu e matuā o tatou moomia lava e ao ona a‘oa‘oina ai i tatou.
2. I se isi itu e ao foi i le leoleo mamoe ona mataala i mea o loo fafagaina ai le lafu mamoe. O le Upu a le Atua e fou i taimi ona o le “Upu Ola”, e lē tatau i le faifeau ona lau gaina na o mataupu e fiafia i ai poo mataupu e malamalama i ai. E ao ona saili, suesue, ola a‘oa‘oina le faifeau i mataupu uma ina ia fou lana kuka i taeao o Aso Sa taitasi.
Fai mai le tala a se tasi o tina matua lava na asiasi mai i se tasi Aso Sa e faatatau i le latou faifeau e faapea, “E ua ta lē lavā foi ai alaisa i Aso Sa uma”. Ua maliu lenei tina ae ua lē galo ia te au lenei a‘oa‘oga sili ina ia manaia ma felanulanuai lau kuka i taeao o Aso Sa uma.
O le tala a Paulo ia Timoteo “O Tusi Paia uma lava e mai le Agaga o le Atua, e aoao, aoai, faatonu faapoto ai le tagata o le Atua.” Afai o oe o se tagata e fia ola mo le Atua, ma malosi lou ola faaleagaga, ia e taliaina le Upu a le Atua i taimi e laugaina ai.
Tatala lou loto ma e faapea i le Atua “Lou Atua, ua ou fia ai, ia e fafaga ia te au”, e pei o le pese a le Aoga Aso Sa. E iai taimi e faaletonu ai ma sasi upu ma manatu a le faifeau i lana lauga, ae talitonu mai oe, e lē faaletonu le Agaga Paia, o ia na tusia le Tusi Paia. O ia foi o le faiaoga sili, na te a‘oa‘oina ma faamaninoina i tatou uma i lana Afioga.
I susuga i faafeagaiga, ia faamanaina pea e le Atua le Upu folafola ma le vai o le ola o loo tauasuina pea i vaiaso taitasi. Ia faatupuina pea e le Agaga Paia lou finagalo i vaiaso taitasi. Malo le saili!
Manuia
Lui Ponifasio
www.luiponifasio.wordpress.com
