E faafetaia le agalelei o le Atua ua mafai foi ona tatou toe feiloai i luga o laupepa e ala i lenei tusitusiga.
O nai vaiaso ua tuanai na amata ai ona tatou talatalanoa i le mataupu e uiga i le totogiina o faifeau poo le faaoloaina foi o le auauna a le Atua i totonu o ekalesia. Na a’e se tofa ma manatu i lenei mataupu ona e lē gata i fesili na tuuina mai ae o talatalanoaga foi ma nisi o auauna a le Atua o loo avea lenei tulaga ma faafatuulu i o latou finagalo, aemaise o le naunau ina ia lelei le galuega a le Atua ae o loo faigata le tulaga tau seleni.
E tāua tele le iai o se manatu malamalama i lenei mataupu. Atonu e lē tutusa uma finagalo, e lē tutusa uma foi faiga o loo fai ai ma galueaiina ai lea tulaga i totonu o ekalesia e pei ona ou ta’ua i taimi ua tuanai.
Peitai e talosia ia avea lenei tusitusiga e fai ma faatupu manatu i susuga i faafeagaiga atoa foi ma ekalesia ina ia lelei ona vaaia le taitai o le ekalesia, ae faapea foi ona lelei le vaaia o le ekalesia e le faifeau. O na vaega na ta’ua i le vaiaso na tea nei e faatatau tonu lea ia i latou o loo nafa ma le filifilia poo le faia o le faaiuga i le faaoloaina o le faifeau.
A o lei oo atu e talanoaina pe fia le mea e tatau ona totogi ai le faifeau, e iai vaega tāua ou te fia talatalanoa atu i ai ina ia fesoasoani tele lea i le ekalesia aemaise i latou o loo faia tonu.
Ou te faatāuaina tulaga nei:
1. Ia manino lelei le tala o le tupe i totonu o le ekalesia. Ia iai se tala o le tupe e saunia i masina taitasi. Ia silasila i ai taitai i tupe maua, o tupe alu, o tupe nonō ma tupe teu faavaitaimi.
2. Ia auai le faifeau i faaiuga tau tupe. Aua ne’i faia se faaiuga e aunoa ma le silafia e le faifeau, e oo lava i le tupe o loo talanoaina e tuuina atu e tausi ai le faifeau.
3. Ia iai se vaega latou te vaaia le tupe. Aua ne’i tuuina i le Teutupe na te teuina le tupe ma faia le tala o le tupe. Ia iai se vaega pe toatolu latou te talanoa faatasi le faagaoioiina ma le faia o le tala o le tupe i le ekalesia. O se tulaga lea e malu puipuia ai le tupe.
4. Ia silafia e le faifeau i vaiaso taitasi le tala o le tupe.
5. Ia tuu le avanoa i tagata o le ekalesia e silasila ai i le tala o le tupe. E lē tatau ona faasāsāina.
6. Ia tofia se vaega toaitiiti latou te iloiloina le totogi o le faifeau. Aua le tuuina i luma o le ekalesia atoa e talanoaina lea tulaga auā e matuā tele lava foi le gaogaosa o le a oo i ai, ma tele foi manatu o le a faia e lē faavaeina. E tatau ona iai ni suesuega e tapenaina ai manatu ma finagalo o le ekalesia, ae lei oo lea mataupu i le fono. O le a fesoasoani tele lea i le faasaoina o le taimi atoa ai ma le faia o faaiuga e faavae i le silafia ae lē o le taumatemate ma fai pogisa. O lona uiga ia fofola atu le mataupu a le vaega sa suesue i ai i le taimi o le fono, ua uma ona latou taumafai e tali fesili ae lei fesiligia.
7. O nisi nei o vaega e ono silasila i ai le vaega o loo nafa ma le suesueina o le auala talafeagai e faaoloaina ai le faifeau.
a. O le faifeau e lē o se tagata faigaluega. O le auauna ua valaauina e le Atua. E lē mafai ona taitaia e se konekarate sainia ma le ekalesia. Ia manino lea tulaga. Peitai e tatau ona iai ni tusitusiga faamaumauina ina ia manino ai le ekalesia faapea foi le faifeau i tiute fai ma le va fealoai o le ekalesia ma le faifeau. O lea tulaga e lē masani ai Samoa. E leai foi ni mea faapea e fai i Samoa aemaise o le tatou tu ma aga.
O le osiga o le feagaiga i le va o le ekalesia ma le faifeau o se sauniga e faia i le ava, migao ma le mata’u i luma o le Atua. Peitai o atunuu i fafo o loo tatou nonofo ma aumau ai e silasila lava le tulafono i le puipuiga o tagata, aemaise lava pe a iai tupe totogi. E tāua lea tulaga ona e tatau ona totogi le lafoga a le faifeau i le ofisa o lafoga e pei lava o tagata uma.
b. O le faifeau e lē o se tagata faigaluega. E lē mafai ona fuaina e le uati taimi faaalu o le faifeau i le tele o mea e fai. O le tele o galuega e foliga mai e lē o faatasi ma le sauniga i le Aso Sa ae o galuega o loo faia ina ia unai ai i luma le ola faaleagaga ma le faalauteleina o le ekalesia. O le tagata faigaluega e amata i le 8 i le taeao ae mānava i le 4 i le afiafi.
A alu o ia i le fale e lē toe manatu i le falefaigaluega. Peitai o le faifeau e leai sona falefaigaluega. E leai foi se taimi faatapulaa e galue ai.
O le galuega a le faifeau e lē amata i le 8 ae mānava i le 4 i le afiafi. E iai taimi e tapena ai le faifeau mo se taimi mo lona aiga ae tupu mai se faalavelave i le ekalesia, ona tia’i uma foi lea o ia fuafuaga. I le leva o le po ae oso se ma’i, pe misa se ulugalii pe maliu se tasi, e muamua lava tapa i le faifeau.
E lē mafai ona faapea mai le faifeau e fai atu ona ovataimi pe sue ane se tasi e suiina o ia ona e lē o avanoa.
Faaauauina i le vaiaso a sau. Faamanuia le Atua ia te oe.
Lui Ponifasio
www.luiponifasio.wordpress.com
