E afua mai mauga le manuia o le nuu ~ 23 Me 2011

O le Faifeau – Vaega 3

E faatalofa atu i le Suafa o Keriso lo tatou Faaola. Le Suafa e maua ai le manumalo, le faamalologa o o tatou tino ma agaga. Le suafa e sili i Suafa uma lava.
O le tala a le Tusi Paia, e leai se isi suafa Tatou te maua ai le Ola.

GALUEGA 4:12.
E maualuga tele le vaai ma le silasila a lo tatou atunuu i susuga i faafeagaiga.
O se tulaga matagofie lea, ae o se vaega foi e tatau ona mataituina ona e ono avea lea tulaga ma auala e faaseseina ai foi lagona o le faifeau, ma taitaiina sese ai le ekalesia ma tagata lotu.

E tāua le galulue malamalama o le faifeau ma le ekalesia i le finagalo o le Atua i le auala e tatau ona faatautaia ai le ekalesia, ina ia aua ne‘i pulepuletutū le faifeau i le taitaia o le ekalesia, ae ia aua foi ne‘i faatamala le ekalesia i le finagalo o le Atua e auala mai i le taitaiga a le faifeau.

O se tasi lenei o vaega e feteenai ai le tele o ekalesia ma le faifeau i le tele o taimi. O le vaiaso nei e fia agai se lagona le va o le faifeau ma taitai o le ekalesia poo le ekalesia foi ina ia mafai ona iai se femalamalamaiga lelei.

1.  E tele faafitauli e feagai ma le faifeau i aso uma. E ao ona fesoasoani le ekalesia aemaise o taitai ina ia puipuia le faifeau mai le mata poto o le fili aemaise o isi vaega o le galuega e ono afaina ai le faifeau. Silasila i auala o loo faatautaia ai le galuega ina ia aua ne‘i uma ae ua tupu se faafitauli sa ono puipuia ae ona o le lē mataala o tagata uma, taitai, ekalesia aemaise lava le faifeau.

O le tele o taimi e lapatai ai Paulo ia Timoteo ona o le naunautaiga o le Aposetolo ia lelei Timoteo le faifeau ma ia lē ta‘uleagaina le galuega a le Atua.

2.  Aua le faatusatusaina lau faifeau i isi faifeau poo le faifeau na iai muamua o le tou Ekalesia. E lē tutusa uma faifeau, e lē tutusa uma foi valaauina, e lē tutusa uma foi agavaa ma meaalofa faaleagaga.
Afai sa masani ona asiasi atu le faifeau muamua ae lē asiasi atu le faifeau o loo iai nei, aua le manatu e lē amanaia oe e le faifeau o loo iai nei. E iai auala tāua mo le lelei o le ekalesia e lē tatau ai ona asiasi le faifeau. O nisi nei o itu tāua mo le puipuiga o le faifeau ma le galuega a le Atua, e lē tatau ai ona asiasi le faifeau i fale o aiga.

a. O le tele o aiga o loo faigaluega le tamā ae o loo i le fale le tina. E lē o se tulaga tatau lea. Atonu e iai ni mafatiaga faaleaiga o le tina e ono masua atu i le faifeau. E amata i le tatalo ma le upu faamalosi ae iu ane ua fusi e le faifeau le tina mafatia. Pāpā loa faititili ma emo uila i lagona o le faifeau.

b. O le tele o aiga aemaise lava i Niu Sila ma Ausetalia, e vava mamao nofoaga. O Samoa e faigofie ona nuu ma afioaga, e nonofo uma le tele o tagata o le ekalesia i le nuu e tasi.

c. O le tele o nisi o aiga e lē lava le faasoa ma e faigata le sau o le faifeau i le aiga ae leai se tupe e tuuina atu i ai. O le masani lea a Samoa.

3. O nei tulaga faatasi ai ma isi o auala, e ono taofia ai le mea e tatau o le faamalosia lea o aiga i le ola faatuatua. O lea e tatau ai ona silasila le faifeau ma taitai i nisi o auala e mafai ai ona faamalosia le ola faatuatua o tagata o le ekalesia. O nisi nei o auala e mafai ona fesoasoani.

a. Valaaulia le aiga atoa e o mai i le fale o le faifeau e fai taumafataga ai ma talatalanoa faatasi. E tāua le iai foi o le faletua o le faifeau. O se mea lelei lea mo ekalesia toaitiiti. Peitai a oo atu ina toatele le ekalesia e matuā faigata lea tulaga.

b. Tuu le avanoa i isi taitai o le ekalesia latou te asiasi ai.

c. Ta‘u i le Aiga le aso e alu atu ai lau asiasiga. Pe o faatasi ma se tasi o taitai poo le faletua foi.

Faaauau i le vaiaso fou

Lui Ponifasio
www.luiponifasio.wordpress.com