E ofo alofa atu i le suafa o Keriso lo tatou Alii!
E viia pea lona suafa i mea uma aemaise mea ua mafai ona tatou ausia i lena vaiaso ua tuanai atu.
E faigofie lava ona tatou manatu ua lelei tele i tatou, ua tatou atamamai tele, ua sa‘o lava i tatou, ae galo ai e leai lava se tasi e tu faamauga.
O le agalelei mai o le Atua ma lana faasoa mai ua lelei ai mea tatou te faia.
O lona Agaga Paia e manuia ai mea tatou te fai e pei o le upu a le pese lotu.
E faafeiloai atu i susuga i faafeagaiga ma le mamalu o taitai o ekalesia Kerisiano i fatafaitaulaga e fia o loo folafolaina le faaolataga e ala ia Keriso Iesu. Malo lava fai o le faiva!
E iai vaega faigata o le galuega faataitai aemaise le galuega faafaifeau ou te talitonu e faigata ona malamalama i ai tagata lotu. E iai le manatu e fia tufa atu ai i lenei vaiaso.
1. O le faifeau. E iai taimi e taofiofi ai manatu o le faifeau ia te ia lava ona e faigata ona faailoa atu i isi. E faamatalaina i le upu faaperetania e faapea e lonely.
O nisi o taimi e faigata ai ona faamalamalamaina lagona o le faifeau. E ono faauiga sese ai foi e tagata mea o loo i le loto o le faifeau pe a lē lelei ona faamatala.
E iai foi le lagona fefe o le faifeau ne‘i faamatala uma atu foi mea o loo i lona loto ona avea lea ma ala e afaina ai le galuega.
O nisi o nei lagona e aofia ai ni vaivaiga faaletino o le faifeau e musu ne‘i iloa e se tasi. E lē gata i lea o ni mea o loo tiga ai lona loto ma lē lelei ai ona lagona faataitai poo ni ana faaiuga ua fia fai ae e lē mautonu ai.
Manatua foi e faigata tele ona tufa atu i nisi o le aulotu pe faalauaitele foi nei manatu ona e iai tulaga e popo‘e ai.
Fai mai le upu a Samoa, o le tele o sulu poo le sulu tele e maua ai figota. Ae o le tala a le Faataoto 11:14, ‘a leai se pule ua malaia le nuu. A o le toatele o faipule, e saogalemu ai.’
O le toatele o faipule poo isi taitai e fesoasoani i se faaiuga poo se tonu e fai, e maua ai le saogalemu. E tea ai le popole ma le loto vaivai.
O nai vaega nei e ono fesoasoani i faifeau:
a. Ia iai se tagata e avea ma faifeau poo se leoleo mamoe ia te oe. O se faifeau e masua uma i ai mea o loo faafatu‘ulu ia te oe. O lea tagata e avea o se mentor, poo se fesoasoani foi ia te oe i mea e te fia moomia ai se fautuaga. O lea faifeau e te lua feiloai pe ta‘i masina pe ta‘i lua masina. E faatupu manatu foi ia te oe. A oo foi ina iai ni nai vesiga poo ni faafitauli i totonu o le ekalesia, e mafai e lea tagata ona oo atu ma tuuina atu se fesoasoani mo le ekalesia. E ese le tāua o lea tulaga.
b. Ia aua ne‘i fefe e tapa se fesoasoani mai isi taitai, aemaise lava taimi e fai ai ni suiga i totonu o le ekalesia. Fesili mo taitai poo isi faifeau e iai le agavaa i mataupu o loo fai ai ni suiga. Mo se faataitaiga, a faapea o loo taumafai e faaofi ni suiga fou, e tāua le talatalanoa ma nisi o faifeau na ui mai ai i nei suiga. O se tasi nei o suiga e matuā moomia ai lava le faatalatalanoa ma maua se finagalo mai nisi o faifeau. A fai o loo fia faia ni suiga i le auala e faaoloaina ai le faifeau, e manaia foi ae aumai se finagalo mai nisi o faifeau poo ekalesia sa iai ni suiga faapea mo i latou.
c. O le totogiina o le faifeau o se tasi lea o mataupu e lūgā, lālō ai foi faifeau. O nisi e manatu e tatau ona faatulaga le totogi o le faifeau e pei lava o isi tagata faigaluega. O le vaega taatele lava o le faia lea o le alofa poo le peleti o le faifeau.
d. Peitai o le vaega ua amata nei ona toatele foi ekalesia Niu Sila ma Ausetalia ua agai i ai ni suiga, o le faia lea o le totogi o le faifeau. Ua mafua lea tulaga ona o tulafono faafaigaluega a nei atunuu.
e. A o tatou talanoa ai pea i totogi o le faifeau, o se tasi lenei o vaega tāua ou te talitonu e ao ona matuā talanoaina ae lē o le faagalogaloina. O le tulaga lea i le faaoloaina o le faletua o le faifeau.
f. O le faletua o le faifeau e tele lava ina faatuatuanai ma lē amanaia e ekalesia. E tele ina fai le alofa ma fai le totogi o le faifeau, ma ave foi i ai faaaloaloga ma isi tulaga faapena, ae leai lava se amanaiaina o le faletua o le faifeau. Manatua mai foi, e tutusa lava le telē o le galuega a le faifeau ma lona faletua. Ia faatāuaina o ia ma ona lagona. Fai mai le palagi, o se alii lauiloa ma tautaua, e mafua lea ona o le tina o loo tu i tua o lea alii. Ia manatua o ia pe a fai le alofa, poo le tuu foi i ai o sina meaalofa e faatāua ai lana galuega i totonu o le ekalesia.
Lui Ponifasio
Email:luiponifasio@gmail.com