O le Ekalesia i le lumanai
O soo se taitai lava ua uma ona tuuina i ai e le Atua se agavaa faapitoa e mafai ai ona iloa se taiala ma se tofa mamao, e mafai ona taitaiina ai le galuega a le Atua ina ia ausia ni vaega tāua auā le manuia o le ekalesia atoa ai ma le faalauiloaina o le finagalo o le Atua.
O le tulaga lena e tāua ai le iai o le taitai ua iai se meaalofa faapitoa ua tuuina i ai e le Atua, ae lē na o se tagata o ia umia se tofi taitai.
E lē faapea a e umia se tofi ona avea ai lea o oe ma taitai. E ese le taitai ese le tofi. E mafai lava ona avea oe ma taitai, e tusa pe leai se tofi e te umia.
O le taitai, o le tagata lea ua malamalama i le taiala poo le tofa mamao, poo le vision i le faaperetania. O le vision poo le tofa mamao o le ata lea o le lumanai.
E lē tatau ona taitaia e se tagata le ekalesia a le Atua, ae lē o iai se agavaa faapitoa e avea ai o se taitai.
O se tasi o tiute faataitai e ese le tāua, o le fesili lea o le taitai ia te ia i mea o loo ia faia, o mea e manatu i ai ma mea o loo ia manao e fia faataunuuina.
O le tele o taimi e te tuufesili ai oe lava ia te oe ma sailiili i lou loto ma lou mafaufau i ou taimi paganoa, o le a fesoasoani tele lea ia te oe i le taitaiina o le Ekalesia.
O nisi nei o fesili e tāua tele e tatau ona fesili ai le taitai:
1. O ā mea o loo o‘u faia o loo alu vale ai lo‘u taimi?
O le tele ia o taitai e pisi vale. E taumafai e faia lea mea ma lea mea ina ia faailoa atu ai o ia e pisi, ae leai lava ma se suiga poo se mea fou e tulai mai poo se suiga i le ekalesia.
E pei o le tagata o loo tamoe i luga o le masini faamalositino o le treadmill. E tele galuega ma le malosi o loo alu atoa ai ma le afu, ae o loo tamoe lava i le mea e tasi.
Afai o oe o se taitai, aua le pisi vale ae pisi aogā. O ā mea o loo e faia o loo maimau ai lou taimi?
2. O ā ni mea o loo e faia e lē tāua i le galuega Atua?
O se fesili faigata lenei e tatau ona fesili ai le taitai. O ā mea o loo tele ai lo‘u taimi maimau pe o loo pisi ai le ekalesia ae leai se fua o maua mai ai?
E pei o se faatoaga, e tiga lava ona lē fua mai ae ua tele lou taimi e faaalu ai. Ana faaaogā tatau lena taimi i se isi vaega o le galuega e lē taumate o le a vave ona fua mai. Na vaai Iesu Keriso i le mati. Na tatau ona fua mai ni mati, peitai o loo ola pea le laau ae leai ni fua. Na fetuu e Iesu ma pe ai le mati.
Soo se taitai e tatau ona malamalama i le tau ma le mea e ola ai e pei ona fai mai ai Solomona. O nisi o ekalesia e fiu e taumafai se mea ina ia tupu, peitai ane e leai lava ma se tino mai. Fesili le taitai, O le taimi poo le tau tonu lea e tupu
ai lea mea?
Afai ua tele taimi e alu i ni polokalame fai ona o ni polokalame ua leva ona sau a‘i ae ua e silafia e leai ma se agaga o manumalo ai pe faamalosia ai le ekalesia, ua tatau la ona taofi ae tuu le avanoa i le eleele e totō ai se mati e maua ai se fua.
O le tele ia o polokalame faalelotu e fai ona o le masani ae leai e mea aogā o maua mai ai.
Fesili nei, o ā mea o loo faia e tatau ona tuu? E tele nisi o fesili, ae se‘i silasila i itu nei ma amata ona tuufesili ai i lou lava loto:
1. O le ā le toatele o tagata e te manao ina ia iai i totonu o le ekalesia?
E masani ona ou faalogo i nisi o faifeau poo taitai e faapea, “Ia o nai tagata lava ua aumai e le Alii, o tagata lava na”.O lo‘u lava talitonuga o se tali lena a le taitai paie. E lē o iai se tinou e alu e saili mai agaga, ma taitai mai tagata i le faaolataga a Keriso. Ina ua afio mai Keriso i le lalolagi o le leoleo mamoe na ia afio mai ma le misiona o le “Saili ma faaola le na leiloa”.
Na saili o ia i le mamoe i tasi, ua maua ma faafuata ma taitai mai. O le ata lena o le taitai. O le saili mai. E lei faatalitali Iesu i autafa o le pa pe toe foi mai le mamoe. Pe tauvalaau foi i le mamoe. Taitai, o le tele o lau saili mamoe o le tele foi lena o mamoe i lau pa.
Saili.
Faaaogā uma metotia ma auala eseese e maua ai mamoe mo le malo o le Atua.
A oo ina leiloa pe sē, se tagata i atumauga o Niu Sila poo Ausetalia, e matuā faaaogā uma e leoleo tagata saili, o leoleo, o le vaega‘au, o vaalele, o ualesi, o taifau soo se ituaiga o aula e saili ai le tagata ua le iloa.
O le fesili mo taitai, o ā auala o loo e faaaogāina e saili ai mamoe ua se? E lē lava lau pulelaa i le Aso Sa. E lē lava faigalotu ma sauniga i Aso Sa. Ou te talitonu ua tuuina e le Atua ia te oe agavaa eseese e momoli ai lona finagalo ma faailoa le tala lelei ma saili agaga mo le Atua. Avea oe ma taitai filigā e pei ona tusi ai Paulo i le ekalesia i Roma 12.
Ia foai atu e le Atua ia te oe le loto tele e te saili ai. Ia foai atu foi e le Atua ia te oe le malamalama ma le poto e filifili ai i lenei vaiaso mea ua tatau ona tuu ma mea ua tatau ona suia i le galuega a le Atua.
Aua e te fefe!
Soifua
