E faafetaia lava le agalelei o le Atua ua mafai ona maua foi lenei avanoa tatou te toe fesootai ai foi. E iai le talitonuga o loo e manuia ona o le pule faasoifua a le Atua ia i tatou uma.
O le “E afua mai mauga manuia o le nuu” o se talitonuga masani i o tatou tagata Samoa, o taitai lava o se afioaga, ekalesia, faalapotopototoga ma aiga e oo mai ai le manuia mo tagata uma.
O le tala a se tasi o tina na ia faamalosiau ai i si ana tama ina ua la faamavae ina o le a momoli i lona nuu muamua e avea ma faifeau, na ia faapea ai i lenei faifeau fou. “Atalii o le ia e lalaoa mai lava i le ulu e tau lava i le siusiu”.
I se isi faaupuga, o le manogi lava e tauaveina e taitai o le a faapena lava ona manogi uma ai le ekalesia. O le manogi faaleagaga e sasala atu i le taitai poo le faifeau, o le a faapea lava ona sasala atu i isi taitai ma tagata uma o le ekalesia.
Afai o se taitai e palaai, o le a faapena foi ona loto vaivai tagata uma.
O se taitai e loto maualalo, o le a faapea lava foi ona vaaia lea tulaga matagofie i tagata uma. Afai o se taitai e leai se faatuatua, e faapena foi ona fiu e tau fai se mea i le ekalesia. O le taitai foi e faatāuaina le tatalo ma faatino le tatalo, e faapena foi ona malosi le ola tatalo o tagata.
O lea taitai e, e telē lava se matafai o loo e taitaiina. O loo vaavaai uma atu foi tagata o i lalo o lau taitaiga ia te oe ma lau faaiuga, aemaise lou soifua faatino. O le itu faigata lena o le ola taitai.
Mo i latou o loo i lalo o le taitaiga, e moomia foi lou tuu avanoa, ma lau tuu alalo mo lau taitai. E iai foi taimi e lē sa‘o ai le taitaiga ma tonu e faia. E tāua tele lau faatuatuaga e tuuina atu ma lau tatalo.
O se tasi o vaega e pei ona tatou talanoa ai i le vaiaso na tea nei, o le tulaga ua aafia ai le tele o ekalesia ona o le faamaamulu lea o le tupulaga talavou mai le lotu. Ua tau leai se fiafia o talavou e o i le lotu, pe tuu foi i se isi faaupuga, ua leai se naunau o talavou i mea faaleagaga ma le Atua.
Se‘i o tatou vaavaai i nisi o vaega o loo manatu le autalavou ua fai ma auala ua lē oso ai se fiafia e o i le lotu.
O nisi o nei manatu na ou ta‘ua i le vaiaso na tea nei, o lagona faaalia e i latou e lē gata i taimi na ou talanoa i ai ae sa faapea foi ona tuuina mai i luga o le upega tafailagi.
1. O le lauga a le Faifeau
E ui lava o lenei mataupu e faatūtū mai i le matou itupa o faifeau faapea failauga o le tala lelei, ae e talitonu o le a vaatele i finagalo o i latou o loo folafolaina le finagalo o le Atua.
Muamua o le lē malamalama o le tupulaga talavou i le lauga. E mafua lea tulaga, muamua ona o le lauga atoa o loo faasamoa. Lona lua o le lauga o loo faasamoa, ae ua fai si maotua o le gagana o loo faaaogāina.
E tulai mai i lenei faafitauli se fesili tāua lava e tatau ona fesiligia ma tali i ai i tatou uma e le na o le faifeau. O le fesili e fia tuuina atu e faapea, “O le ā tonu le auga o le folafolaina poo le laugaina o le finagalo o le Atua i Aso Sa? O le taumafai ina ia sao le upu ina ia iai se meaai faaleagaga, poo le taumafai ina ia faatāuaina le gagana?
O nisi ua tausisi lava e lē tatau ona faaperetania le laugaina o le afioga a le Atua. E tatau lava ona faasamoa. Ua avea lea tulaga ma ala ua lē mafai ai ona malamalama le tupulaga poo le fanau laiti. Afai e te auai i se fonotaga ae e te lē malamalama i le gagana o loo faaaogāina, o le mea moni e lē umi lava ae e fiu ma e fia alu i le fale. Ae a fai soo e lē toe oso sou fia alu i lea fonotaga.
Atonu o se lagona lea o loo oo i le tupulaga talavou. O le tala a se tasi tamaitai talavou ia te au pe tusa ma le 17 tausaga e faapea, “sa ou i totonu i le lotu ae na talanoa loa i le mavaega o le tai samasama ou lē malamalama loa i le lauga”. O le feteenaiga lea ou te talitonu o loo avea ma se tasi o auala ua mafua ai ona lē fiafia a tatou fanau mai le lotu.
O le tala a se tasi, talavou e faapea, “e manaia ae fai ma nanu le faifeau”. O la‘u maitau, o loo iai le naunau o le fanau e fia auai i le lotu, peitai o le tamaitiiti e fiafia puupuu lava lona uiga.
O le ā se finagalo, pe o le a faaauau ai pea le faatāuaina o le gagana Samoa, pe fai se isi auala ina ia au le feau i loto ma agaga o le tupulaga?
E ono feteenai lou finagalo ma lo‘u manatu, ae se‘i fofola atu pea, a iai sona aogā, faafetai, a leai ia faatafea.
O le laugaina o le afioga a le Atua, e lē o se taimi lea e a‘oa‘oina ai le gagana Samoa. O le taimi lea e a‘oa‘oina ai le finagalo o le Atua. E tatau la ona faaaogāina se auala poo ni metotia e mafai ona momoli ai le feau ma le finagalo o le Atua ina ia malamalama ai tagata uma, e aafia ai ma le fanau.
O loo tatou ola ma outou soifua i totonu o Niu Sila, e lē tutusa uma le malamalama o le fanau i le gagana Samoa. O nisi o aiga ma fanau e lē atoatoa le gagana Samoa, ona o le augatupulaga lua ma le tolu ua soifua a‘e i Niu Sila. Ou te talitonu lava e lē tatau ona avea lea tulaga ma ala e taofia ai i latou mai lo latou malamalama atoatoa i le Upu a le Atua. O nisi o auala e mafai ai ona momoli ai le Upu a le Atua, o le gagana tusitusi, o le gagana tautala, o nisi o auala e mafai ona faaaogāina o le tusia lea o ata, o le faaaogāina o tala ma ata tifaga pupuu, e oo lava i musika ma siva. O nisi na o auala ma gagana e mafai ona momoli ai le finagalo o le Atua.
O se tasi o auala e mafai ona fesoasoani ai i le fanau, o le faia lea o se sauniga faaperetania mo i latou e manao i lea tulaga. E mafai lava ona usu faasamoa pese pe a manao ai, ae ia faia faapalagi le lauga. Tailo i ai i sou finagalo ae e iai le talitonuga e mafai lava.
O se isi auala o le faasamoa pea lea o le lauga, ae faaliliu faaperetania e se isi e faaaogāina ai le masini ata poo le data projector. E mafai ona tusi ai manatu autū o le lauga faasamoa ma faaperetania.
E ui i nei vaega ae e mafai ona fesoasoani, ae o lo‘u talitonuga a e fesili i le tele o talavou, o le toatele o i latou e mananao e fai se latou lava sauniga faaperetania.
O le mafuaaga foi lena e manatu ai nisi e fia o e asiasi i nisi o ekalesia o loo mafai ona faia ai lea tulaga.
O le vaega lona lua, e faatatau i le lauga a le faifeau e faapea, o le lē talafeagai lea o mataupu o loo a‘oa‘oina pe laugaina ma le soifua o loo ola ai le fanau.
E tele mea o loo fia maua ai ni tali i soifua ma olaga o le fanau. O le upu faaperetania o le “relevant” poo le talafeagai le a‘oa‘oga ma le mea o loo moomia. E iai le talitonuga maumaututu, o loo i totonu o le Tusi Paia le tali, ae tatau ona momoli atu lenei tali i se auala e mafai ai ona malamalama.
Faataitaiga, a tatou vaai i le matautia o le tulaga ua oo i ai le toatele o le fanau talavou, ua pei o se mea noa ia i le latou le nonofo faapouliuli, o le faiaiga ae lei faaipoipo. O le fesili, e faapefea ona a‘oa‘oina i latou i le finagalo o le Atua i lea tulaga?
O loo i le Tusi Paia le tali. E tatau ona a‘oa‘oina ma malamalama le fanau talavou i lea tulaga. O le upu faaperetania o le Sex. A ta‘u loa lenei upu e faalogo atu e pei ua meia ma maalili le tino. Ou te lē iloa po ua a‘oa‘oina ma laugaina lea tulaga i totonu o a tatou ekalesia.
E lē tatau ona tatou tuulafoai a tatou fanau talavou e a‘oa‘oina e le TV, ma tusiata atoa ai ma tifaga i lea tulaga, auā e pau lava le a‘oa‘oga, o le tago e fai e lē afaina. O le mea moni lava ua mea noa lea tulaga ma leai ai se ava ma se migao i le finagalo o le Atua.
Faaauauina i le vaiaso fou.
Ou te fiafia i sou finagalo i lenei mataupu ona faailoa mai lea. Tusi mai i le luiponifasio@gmail.com, poo le silasila ane i le
www.luiponifasio.wordpress.com.
Ia faamanuia le Atua ia te oe i lenei vaiaso
Lui Ponifasio
