E iai le talitonuga o loo e mauaina le manuia ma le malosi faafouina i le tausiga a lo tatou Tapaau i le Lagi. Malo lava le soifua manuia!
O le faatalofa faapitoa mo mātua tausi uma o si o tatou atunuu, i tamā ma tina ua pulapula la goto le soifua. Malo le onosai ma le lava papale. E lē faigofie foi le tagata matua ma le tino tiga o feagai ona o le matua o le soifua. Agalelei atu le Atua ma lagomaluina pea tofaga.
O le faaauauina o le lenei talatalanoaga i luga o laupepa ua faaigoaina “E afua mai mauga le manuia o le nuu”. O se faasoa atu i ni manatu e iai le agaga maualuga e maua ai se fesoasoani faaleagaga aemaise i lē o loo taitaiina le Mauga o le Atua, lana ekalesia ua tofia i tatou uma tatou te galulue ai.
Na amata i le vaiaso na tea nei ona tatou talanoa i le va o le faifeau ma le ekalesia. Aemaise lava o le va o le faifeau ma isi taitai. Atonu e sili ona talafeagai le upu o le faia. Poo le mafutaga a le faifeau ma taitai o le Ekalesia.
Na ta‘ua i le vaiaso talu ai e faapea, “E lē faigofie le galuega faafaifeau”. Ua manatu ina ia faapupula atili lea vaega ina ia mafai ona avea o se faatupu manatu mo i latou o loo mafaufau e fia avea ma faifeau.
Afai o oe o le tagata lotu, Ia e manatua mea nei. E faigata le galuega faafaifeau. E lē faigofie. Afai o loo e manao e te fia faifeau, ou te fautua atu ia te oe, ia e toe to manatu i lea lagona.
Ia e mautinoa ma iai se auala e faamaonia ai o lou valaauina lea mai i le Atua auā e lē faigofie. Ou te talitonu o nisi ua manatu e fia avea ma faifeau ona e tupuga mai i aiga o faifeau, pe manatu foi e fia faataunuu le manaoga o ona mātua poo se mavaega a le toeaina ae lei maliu.
Poo le ā lava le mafuaaga, ia e maua mai le itu lenei, o lou valaauina e mai le Atua lea, ae lē o ou mātua poo tagata foi.
Afai e te fia manatu i le galuega faafaifeau, o se mea lelei tele lea, ae ia mamao le tofa, aua le vave oso. E lē faigofie le galuega, aemaise pe afai o loo e fia faifeau i se ekalesia Samoa ona e maualuga tele le vaai a tagata Samoa i faifeau. E tausi faifeau tele tagata Samoa ma tele le faaeaea.
Ia e malamalama i le va ma tagata. Ia e malamalama i ala o mea. O le faiā. O le faiā ma tagata matuatua, o le tupulaga ma tagata fou mai i le lotu. O tagata maaleale, o tagata faatiga ulu. Ia lava lau onosai i uiga o tagata, ia e lavā tatali mea tiga ma luitau e feagai ma oe. Ia tele le faapaleple, ma lou alofa i tagata e leai se mea e pau mai ai.
E iai fili o le galuega. E lele lava le se ae lama le tiotala. O loo fai lava lau lauga ma lou atoa ae iai lava le tagata o loo faauigaseseina.
Ia e malamalama i le tāua o lou ola faaleagaga ma lou tulaga o le fitafita tau mo agaga ia manumaloina.
Ia e sauni e tele taimi ma itula e tapenaina ai lau lauga ma suesue ai i le afioga a le Atua auā e lē faia i le poto masani le Ekalesia a le Atua, ae faalagolago i le taitaiga ma le faauuga a le Agaga Paia ia te oe.
O le saili mo le feau mai le lagi e fafagaina ai le lafu mamoe, e lē o se mea e te tapolo i le vaiaso ae faato‘ā sue lau Tusi Paia i le taeao o le Aso Sa.
E momoe ma mālōlō le Ekalesia i le po o le Aso Toonai ae o loo e saili atu i le Atua i le tatalo ma le suesueina o lana Afioga.
Ia e iloa e iai le taimi e te fia‘ai ai. E lē o ekalesia uma e fafaga ia latou faifeau ma e lē fue toonai foi tagata i Aso Sa uma. E te lē faamoemoe i le kuka a le aulotu. E iai Aso Sa e te alu ai lava oe e tunu lau alaisa ma tatala lau apa eleni.
Ia e mautinoa o oe o le tagata ua valaauina e le Atua. Afai e te matuā manino i lea itu, poo le ā le fesouaina o le galuega, e to‘a lava le tai auā ua e matuā mautinoa o le Atua na valaauina oe, o le Atua foi o le tali o mea uma.
A leai sou alofa e maua, poo le peleti i Aso Sa poo lou totogi foi (auā o nisi o ekalesia e totogi le faifeau e pei lava o fale faigaluega), e te lē faamavae loa ma le Ekalesia ona ua e musu ua leai sou totogi pe lē lava foi.
O le galuega e faia i le faatuatua. E te vaai i isi auala e fesoasoani i le tausiga o oe ma lou aiga ina ia faataunuuina pea lou valaauina. O se tasi lea o mea na ou a‘oa‘oina mai i o‘u mātua a o galulue i laua i le galuega a le Atua. O le lē ola faalagolago i le aulotu.
O Paulo le Aposetolo, le faifeau, o le faiaoga o le Tusi Paia, o le misionare, na ia lē avea le lē tagolima ma ala e taofia ai le galuega e pei ona valaauina ai e le Atua. Peitai sa ia tagi i lima le galuega ma ia suiina ai fale‘ie, sa fesoasoani tele i le faatupeina o le galuega.
O se tasi itu tāua tele i le galuega faafaifeau, ia e matuā manino lava i ai, o le faifeau o le nifo tulimanu o le tiapolo. O le tala a le Tusi a “taia le leoleo mamoe ona faataapeapeina lea o le nuu”.
O loo matuā manao lava le tiapolo ina ia faaletonu le taitai auā e vave ona malepe ai le ekalesia. E matuā taumafai lava le fili e luluina le soifua faaleagaga o le faifeau ma lona aiga.
Sa ou matamata i luga o le Upega Tafailagi i se tasi aso i se misa a taitai ma faifeau ma faletua o se tasi o tatou ekalesia Samoa. Na lagona lava le faanoanoa ma le alofa i le Ekalesia ona o le taumafai o le Tiapolo e faaleaga.
E lē fuatasi i se ekalesia poo se faalapotopotoga. Ua toatele faifeau ma o latou aiga ua afaina. O lea, ia lava pea le tofa faaleatua ma le malamalama i le finagalo o le Atua, ma lona valaauina o le tagata i le galuega faaleoleo mamoe.
Afai e lelei mea uma, e tāua le suafa o le faifeau. Afai foi e faaletonu mea uma, e fifi lava i luga o oe le faifeau tusa lava pe leai sou silafia i ai. E vave le maitau e tagata o mea faaletonu nai lo mea lelei.
Toe tasi lava se manatu i lea vaega. O lau faataitaiga e sili ona leotele nai lo lau lauga. O mea uma e te faia e muamua faataunuuina e tagata nai lo o mea e te a‘oa‘oina ma laugaina.
O lou ola tatalo e tāua tele i le taua faaleagaga i aso uma ae lē na o taimi o sauniga lotu.
O lou ola i le Upu a le Atua e tāua tele nai lo le faato‘ā faitau le Tusi Paia ina ua tapenaina lau lauga. O lou ola anapogi mo le Ekalesia e ta‘u atu ai lou ola naunau i le Atua ma lona finagalo. O lou foai e sili lea, ma avea o se faataitaiga i tagata uma.
O nisi o faifeau e manatu o le foai o le mea lea a le Ekalesia e lē faia e le faifeau. E leai ma se a‘oa‘oga a le Tusi Paia faapea.
O le foai ma taulaga e faia e tagata uma lava ae ia tausolomusa lava le faifeau ma lona aiga. Ia sili atu lau foai!
E tele nisi mea e fia talanoa ai i lea tulaga, ae masalo o lena ua e maua mai le au o le paipa, se‘i tulou. E afua mai lava i mauga le manuia o le nuu.
O lea afai e iai le tagata e fia faifeau, e pei o nisi foi e talanoa mai ia te au, ou te fautuaina lava, toe mafaufau, saili ma tatalo i le Atua ina ia e alu e fai le galuega a le Atua ma lou mautinoa ae lē o le alu pogisa.
E toe tasi se isi vaega tāua. O le valaauina o le faifeau, e aofia ai ma lona toalua ma lana fanau. Ia malamalama le faletua ma le fanau i itu uma, o le va nonofo ai, o le galuega. Ia malamalama le fanau e iai taimi e toesea ai mātua ona o fonotaga, tagata mamai, o maliu, o talanoaga o faafitauli o aiga ma le tele o isi mea faapena e ono lē maua ai le taimi o le fanau ma o latou mātua. Ia iloa foi e le fanau o latou o loo aafia i totonu o le valaauina lea e tasi i le galuega faafaifeau.
O fua foi e maua o le galuega e tatau foi ona faasoa faatasi ma i latou. Ia faamanuia le Atua ia te oe.
Lui Ponifasio
www.luiponifasio.wordpress.com
