E muamua lava ona momoli laau i fogaa, ona o le agalelei ma le alofa lē faatuaoia o lo tatou matai i le lagi. Malo le soifua i lo tatou atunuu. Talofa lava!
O le tausaga na tea nei na ou asiasi atu ai i le atunuu o Indonesia. Ona o le naunau i le folafolaina o le tala lelei i lea itu o le lalolagi. O Indonesia o le atunuu numera tasi lea i le lalolagi i le talitonuga faamosalemi. E tele ona faletapuai o lenei ituaiga o talitonuga.
O se tasi lenei o atunuu sili ona toatele ona tagata faitau aofai. E numera fa i le faatulagaina o atunuu toatele o le lalolagi. E tusa ma 240 miliona le aofaiga o tagata. E 1300 ona motu eseese ma le tele o ituaiga o gagana.
E lē o se atunuu e faigofie ona tagata, ma e toaitiiti le aofaiga o tagata Kerisiano, ma e faigata ma lamatia taitai o ekalesia ma tagata faatuatua ia Keriso Iesu. Sa ou talanoa i se tasi o tamaitiiti ma nai ona tei o loo nonofo i se fale e nonofo ai tamaiti ua matuaoti.
Na ia faamatala le fasiotia o lona aiga i le agaese a o matamata i ai ona o le latou talitonuga faakerisiano. Na matuā luitauina ai ma lo’u ola faatuatua i le Atua atoa ai ma le faataunuuina o le finagalo o Keriso ina ia o atu e “fai nuu uma ma soo” (Mareko 16:15).
I nai vaiaso ua tuanai atu nei sa faapea ona ou faimagala atu ai i le atunuu o Indonesia faatasi ma se aumalaga mai i lo matou ekalesia. O le faamoemoe lava e tasi o le fia tala’iina o le tala lelei. Na ou iloa le lē faigofie o le faailoaina atu o Keriso i totonu o se atunuu Mosalemi.
E iai lava le masalosaloga i tagata ma le lē taliaina, peitai sa iai se faamalosiau i lo matou aumalaga ona o le naunau o tagata Kerisiano aemaise o faifeau ma taitai o ekalesia sa matou iai ina ia faailoa atu le alofa o le Atua. O nisi na matuā sauāina. O se tasi o faifeau na susunuina lona fale ma ana meafale. Na sola ausulusulu o ia i le togavao faatasi ma lona toalua ma lana fanau ma nonofo ai mo le tele o aso.
E toe foi mai ua matuā leai lava se mea e tasi o totoe. O le tele o ekalesia, e matuā lē tagolima lava tagata, e leai ni falesa tetele e faatutuina e pei o tatou i nei atunuu. E lē gata i lea ae o le matitiva o tagata.
Na matou oo atu i se tasi o fale e pei o le telē o se faletaavale e ofi ai taavale e lua. O lea fale e nonofo ai ulugalii e toatolu o se tasi ekalesia, ma latou fanau faapea ma matua tausi.
E toasefulu tamaiti i lalo o le 12 tausaga e nonofo i lea fale ma tagata matutua. E 18 tagata ae tasi le fale lē ta’ua se’i tulou. E ui i nei tulaga ae sa vaaia lava le naunau o tagata i le lotu aemaise o mafutaga tatalo.
O loo tele pea tagata liliu i aso taitasi mai tapuaiga faapaupau ma faatuatua i le Alii o Iesu Keriso.
O se tasi o faifeau sa matou galulue faatasi, ua sili atu i le 1700 ekalesia fou ua latou faatutuina ona o le toatele o tagata Mosalemi ma tagata Hinitu ua liliu mai ma faatuatua i le Alii o Iesu Keriso. Ae o se tulaga na ou fiafia ai, ona e leai se faailoga ekalesia poo le ā le lotu ae o le galulue faatasi.
Sa ou tuufesili lava a’u o le taitai Kerisiano i le auala o loo tatou folafolaina ai le finagalo o le Atua i Niu Sila ma Ausetalia. Na oo ane lagona o le faaamuia ona o le tele o mea e maua. Na faapea foi ona oso ane ma se lagona lē fiafia pe a manatu i o tatou tagata, ona o le soona fai o le tamaoaiga aemaise o taumafa ma fale e nonofo ai.
O le matuā tele naunau o falesa faatutu. E sili atu i le 5-6 fale lotu poo ekalesia i totonu o se afioaga i Samoa, faapea foi i Niu Sila nei aemaise lava Aukilani. E ese le tatou filifili meaai, filifili ofu, o seevae, peitai o nei tagata na matou galulue faatasi, toetoe lava a leai ni meaai i aso uma.
O se tasi o ekalesia na matou iai e tasi le moa na tali ai i matou, ae to’a 15 tagata na aai ai. E lē ona o le lē talimalo ae o le lē tagolima. Sa ou maitauina le naunau o nei tagata i le Atua ma lo latou ola faaleagaga.
O taimi o tatalo ma sauniga aemaise o le upu a le Atua, e moni ai le tala a le Tusi Paia, ua tufi taufao le malo o le Atua. E lē o se faaleaga poo se manatu maualalo, ae o la’u maitau e lē o iai tele se naunau faapea ou te maitauina i le ola tapuai o o tatou tagata Samoa, aemaise i totonu o sauniga i Aso Sa.
O nai fesili nei faatupu manatu mo le ekalesia Kerisiano:
1. Faamata ua avea le tele o mea e maua ma auala ua leai ai se naunau tele o tagata i mea faaleagaga?
2. Faamata e tumau le fia Kerisiano ma le toaga i mafutaga tatalo pe ana faapea e matitiva o tatou tagata lotu?
3. O le ā le finagalo o le Atua mo le ekalesia Kerisiano o loo lava le tamaoaiga, mo ekalesia lima vaivai, aemaise o ekalesia i atunuu i fafo?
Pastor Lui Ponifasio
