E tatau ona totogi le faifeau?
E tofu lava i tatou ma fita e feagai ai aso uma ae faafetaia le agalelei o le Atua. O ia na te foai mai le malosi i aso taitasi.
Faafeiloai atu foi i susuga i faafeagaiga ma faletua ma taitai o ekalesia. Malo le galulue. Malo le fai o le faiva i le galuega a le Atua.
O le vaiaso na tea nei na tuuina atu ai se faataitaiga e tusa ma le mataupu poo le fesili o loo tatou talanoaina i lenei tusitusiga.
Pe e tatau ona totogiina faifeau. Sa ou i Samoa i le vaiaso talu ai e auai i se Koneferenisi a faifeau Samoa mai ekalesia Kerisiano eseese i Samoa, Ausetalia, Niu Sila, Hawaii, Amerika ma Tutuila.
Na maua le avanoa e talatalanoa ai ma nisi o faifeau e uiga i lenei mataupu.
Na ta’ua e nisi o auauna a le Atua e faapea, “E faigata ona talanoa i le ekalesia i lenei mataupu ona o tulaga e popole ai ne’i te’i ua ave seseina e le ekalesia”.
E iai le talitonuga ia avea lenei talanoaga i luga o lenei nusipepa e faatupu manatu i lenei mataupu. Ina ia lelei ona vaaia le auauna a le Atua ma ia manuia foi le ekalesia i vaega i itu uma.
O le toatele lava o faifeau e iai le naunautaiga ina ia maua se seleni talafegai i vaiaso taitasi mo le tausia o o latou aiga. E lē manatu i se seleni tele ae ia talafeagai ma le tau o le soifuaga.
Na oo mai ia te au le tele o fesili. O se tasi o fesili e faapea, afai o le lagona lea o le aufaigaluega, aisea ua matuā fuli ai le tele o ekalesia e matuā fai le tele o sailiga tupe ua oo lava ina fai faatauvaga.
Aisea ua matuā telē ese ai ma manaia na o le fale o le faifeau ae o loo nofo faleoo pea poo taufaaofiofi aiga toatele i fale potumoe na o le lua pe tolu.
E lē o tagi mai le faifeau i se fale fogafalelua e lima pe ono potu. E lē o tagi mai foi le faifeau e avatu se $20000 mo lana faamalologa.
Ou te ioe, atonu e iai nisi o ekalesia ua oo i lea tulaga ona o se talosaga mai a le faifeau.
O nisi foi o susuga i faafeagaiga ua pasese i luga o le faauupuga “O le faitaulaga lea a tagata mo le Atua”. Atonu o se tasi lea o mataupu tāua e tatou te talatalanoa i ai i se isi tusitusiga.
I le vaiaso talu ai sa ou ta’ua ai nisi o ekalesia na oo i le faamasinoga ona o le tulaga feteenai i lenei mataupu poo se fesili foi e faaapea “Pe tatau ona faia se konekarate faigaluega a le faifeau pe leai”.
O le mea moni lava e leai se mea e taofia ai le ekalesia mai le faia o lea tulaga. Afai e manatu le ekalesia e uia le auala lea, ia tatau foi ona uia tulaga uma e tusa ma le tulafono faakonekarate o tagata faigaluega. Ae se’i tagai ane i itu nei a o lei faia lea filifiliga:
1. E tatau ona faasalalauina le avanoa faigaluega. Ia faia se faatalanoaga poo le interview e filifilfi ai le faifeau talafeagai.
2. E tatau ona iai se pepa o faamatalaga e faamatalaina auiliili ai le galuega a le faifeau atoa ai ma taimi e moomia ai, o aso e moomia ai. Faataitaiga o le taimi faigaluega o le 8am – 4pm. Afai ae iai ni faalavelave e tutupu mai e pei o se ma’i poo se maliu i le leva o le po, e tatau ona maua le ovataimi a le faifeau.
3. E tatau ona iloa e le faifeau lona totogi a o lei amataina le galuega.
4. E tatau ona 4 vaiaso livi o le faifeau e mālōlō ai ae o loo maua pea lona totogi. E faapena foi aso ma’i.
5. A oo ina uma le taimi o le konekarate pe ua manao foi le ekalesia e faauma le feagaiga, e tatau ona tuuina atu se tusi mo le fā vaiaso ona mae’a lea o le galuega. Pe finagalo foi le faifeau ua lē toe fia faifeau pe ua maua se isi ekalesia e faifeau ai, o le a faapea foi ona ia tuuina atu se tusi i le ekalesia i vaiaso e fā e sue ai se latou faifeau.
6. Afai o le a faia le totogi ma le konekarate o le faifeau, e tatau la ona ogatusa ma le Tulafono a le malo lea e ta’ua o le Holidays Act 2003. I lea tulafono o loo faamanino mai i lalo o le tulafono mo aso mālōlō o tagata faigaluega, e tatau ona totogi le faifeau i le itula ma le ‘afa pe a afai e galue i aso mālōlō. O lona uiga a lauga le faifeau i le Aso Maliu e pei o le Aso Faraile Lelei, Aso Kerisimasi ma isi aso mālōlō faatulagaina, e tatau ona maua se tupe faasili.
7. E tatau foi ona iai se api e saini ai pe faamaumau uma ai taimi ma aso faigaluega o le faifeau. Ua ou tuuina atu nei tulaga ona o itu tāua nei i totonu o se konekarate faigaluega.
E foliga mai e tele ni faafitauli e ono aliai mai i lenei vaega. O le fesili “O le ā la le tulaga e tupu a e iai ni faaletonu i le aiga o le faifeau i le va ma le toalua poo le fanau foi e pei ona a’oa’o ai Paulo i le 1 Timoteo 3:45.”
E tatau ona muamua lelei ona taitaia le aiga o le faifeau ona faato’ā mafai ai lea ona ia taitaia le ekalesia. O Konekarate faigaluega faaletulafono e le vaai i le itu faaleagaga o le tagata. Peitai o i o loo taatia ai le ute o le galuega faafaifeau ma le valaauina e le Atua.
Soo se faifeau lava e te fesili i ai i lona valaauina, e mautinoa o le a ia faamatala atu le tele o isi foi galuega e lē aafia i le galuega faafaifeau o loo latou faia.
E tele ni taimi e faia ai tusi e ave i le ofisa o femalagaaiga e fai ai pepa nofomau o tagata, o tusi e ave i le ofisa o faamasinoga mo tagata solitulafono, o tusi e ave i le ofisa o aoga ma iunivesite e apalai ai sikolasipi o fanau.
O nisi o taimi e auai atu ai i fonotaga mo le lelei ma le manuia o pitonuu poo community ma le tele o isi galuega e fai e faifeau e ono foliga e lē o ni mea faaleagaga, peitai ona o le manatu o le faifeau o ia o le auauna a le Atua e mafua ai ona ia galue faapea.
A tuu atu i le tagata faigaluega i lalo o se kamupani, e muamua lava fesili poo le ā le totogi ae pe maua se ovataimi.
Afai o iai ni feteenaiga i totonu o lo outou ekalesia ona o se mataupu maaleale faapenei, faafesootai ane le faalapotoptoga Kerisiano lenei e ta’ua o le Resolve (Christian Service for Disputes Resolution Incorporated).
94 Dalwhinnie Parade, Highland Park,
Manukau 2010 ~ Ph 525 0949.
I Ausetalia, faafesootai le Christian Mediation Australia.
Postal PO Box 751, Newcastle NSW 2300, Phone Work: 02 49264788
Office: 0414 502144.
Faaauauina i le vaiaso a sau. Ia faamanuia le Atua ia te oe!
Lui Ponifasio
www.luiponifasio.wordpress.com