E a‘e manuia faiva e tapuaia – Samaga Tatau

O le upu masani, o faiva e tapuaia, o faiva e a‘e manuia. O se fiafiaga lea i aiga, uo ma ē masani na molimauina le Samaga tatau i le Aso Toonai na se‘i mavae atu nei ina ua iu manuia galuega o le lagimalofie sa feagai ai mo le tele o vaiaso. E lē se galuega faigofie, o se faamoemoe sa tapuia ma talosia pe tua ma ni ā, ae o le faasagi ma le faapolo lea i le matai i le lagi ina ua mae‘a manuia ma le fiafia.
O le sauniga lotu na tatala aloaia ai le faamoemoe, na taitaia e le tausi Matagaluega i Otara, le sususga Rev. Iosia Pati Faleupolu, sosoo ai lea ma le ‘ava o le feiloaiga e pei ona masani ai tu ma aga faaaloalo faasamoa moni o aso faapenei, atoa ai ma le auga o le aso, o le faapaiaina poo le samaga o tatau.
O se aso matagofie le lagilelei, ua segaia foi ave o le la, i le iila o sogaimiti a nei alo Samoa, ua o se mitamitaga o ni tamatane Samoa moni ua laeiina le laei a le atunuu, aemaise o le tautuaina o aiga, nuu faapea le galuega a le Atua.
Ina ua mae‘a le faamanuiaga a Tulouena i le ‘au taooto, o le faailoga foi lea ua tatala  uma sā o le galuega, ona saasaa fiafia lea o sogaimiti fou, le aiga ma le auvalaaulia e taualuga ai le samaga o tatau.
O i latou sa taliau mo le tele o vaiaso o le Tofa Apulu Iuni Ieremia (Faleasiu, Salelologa, Satapuala), Henry Sevesi Fesuluai (Vaimoso, Salelologa, Vailoa Palauli), Fesuluai Alec Fesuluai (Faleu Manono, Salelologa, Vaimoso, Vailoa Palauli).
O le matuaofaiva sa nafa ma le galuega fita o le Afioga Tulouena Laulu Andre Fakalago (Manono, Safotu, Fusi Safotulafai, Falelatai, Fasitoouta, Apolima). O le alo e faasino ia Tanuvasa John Fakalago ma le faletua ia Faleati.
E ui lava e talavou le soifua o le afioga ia Tulouena (Tulou) ae o se Tufuga e matuā lava tapena i le galuega, ma e pele ia te ia lana taleni poo lana meaalofa mai le Atua, e fai lava le tiute ma le faiva i le atoatoa moni lava ma le faamaoni.
O se taumafataga tele na saunia e auaiga o tama na taooto e tali ai le sua a le mamalu o le auvalaaulia, aiga, uo ma ē masani, a o lei alo i faaaloaloga masani e faamatafi ai le faamoemoe i lea aso.