Na soifua a‘e (fanau) i Samoa i le afioaga o Satapuala, ae o lona olaga atoa na tuputupu a’e i Otara i Aukilani, ma aoga ai i le Kolisi a Tangaroa, ina ua uma mai vasega laiti i Mangere ma Ferguson Intermediate.
O le 1992, na faauu ai Tupe Victor i lona tipiloma i le Musika sa aoga ai mo le 3 tausaga i le Iunivesite Aukilani, sa suesue ai i tomai tau musika (Orchestral conducting, Voice and Music Analysis). Na toe faauu i le 1994 i lona faailoga Post Graduate Diploma i le Performing Arts (DipPerArts).
O le 1996, na ia maua ai se avanoa sikolasipi mai le New Zealand Arts Council (sa iai le susuga Albert Wendt i le saofaiga na faia le faaiuga), ma tuua ai loa Niu Sila ae agai i Ausetalia mo ana a’oa’oga (Music and Opera studies) i le ‘Australian National University’ – Institute of Music i Canberra, i Ausetalia.
O le 1998 na mae’a ai na aoaoga ma faauu ai ma lona Graduate Diploma i le Musika (GradDipMus) mai le ANU Institute, o se laasaga maoa’e ua ausia e se tamafanau a Samoa.
Sa pese foi le susuga Tupe Victor Taulapapa Tamyan, i le Auckland Opera, faapea le Australian Opera i le Sydney Opera House mai le 1997-2001.
O se tasi foi na telē sona sao i le tulai mai ai pea o le aufaipese a le Ekalesia Metotisi Samoa a Otara i se tulaga mataina mo le tele o tausaga, a o avea Tupe ma taitai o lena Aufaipese, a o lei malaga ma nofomau i Ausetalia.
Peitai o le tausaga e 2001, na manatu ai Tupe o le a se’i fai sina malologa mai lea tomai faamusika ma lona siufofoga pese, ae se‘i toe asia se tasi foi o ona tomai ua leva ona galue muamua ai, le matata faatausitusi ma itu tau tupe i vaega eseese e pei o le Tax Accountant, Insolvency Accountant ma isi. Ona toe agai ai lea o Tupe i le Iunivesite e faalautele ana a’oa’oga i lea tomai.
Na maua se avanoa i le vasega maualuga o le Faculty of Business and Economics, i le Macquarie University i Sini (O le Matagaluega lona lua le telē o le Accounting and Corporate Governance i Ausetalia). O le 2009 na faauu mai ai ma lona Bachelor of Commerce professional Accounting degree (BCom-Accounting).
Pei lava ona mātau i le faagasologa mai o le soifuaga aoaoina o lenei alii, o se tagata e maeu le sogasogā ma le finafinau. Auā o lona matauina o āuga ma aafiaga ua iai le faaletonu o le tamaoaiga ma le tulaga tau tupe o le lalolagi (GFC) na a’e ai loa sona manatu, o le a faaauau pea ana aoaoga i le Macquarie University.
Na ausia tuutuuga o mea manaomia ma maua ai sona avanoa mo le faailoga ‘Master of International Business’ i se polokalame (postgraduate program) e taulai i le matata tau Forensic Accounting and Business & Financial Analysis.
Na tau lau o le faamoemoe o Tupe ina ua ia faamae‘a lenei polokalame ia Iuni 2011; ma o Setema 28, 2011, na toe laasia ai foi e Tupe se tulaga maualuga mo lenei faailoga tāua, o se faaeaea mo se uluai Samoa ua ia mauaina i le Macquarie University.
E mataina tele le soifuaga aoaoina o lenei alo o Samoa, auā a fua i ai, e tusa e faalima (5) ona faauu Tupe Victor Taulapapa Tamyan mai ni faatufugaga (disciplines) se 4, i ni Iunivesite se 3. O se tulaga ua matuā maoa‘e tele lea mo se tasi, aemaise mo se tagata Pasefika ua pā‘ia lea tulaga maualuga.
E ui o se taua sa tau toatasi a le susuga Tupe Victor Taulapapa Tamyan mai le tele o tausaga, peitai e lē o faagaloina le tapuaiga ma le aiaiuli mai a si ona aiga.
O lea e fia momoli ai lana faafetai i si ona tina ia Matamio Taulapapa Tamyan (mai Satapuala), lona tamā o Taulapapa Samasoni Tamyan (mai Samatau) o ona uso o Peneta, Francis, Misipati, ma si ona tuafafine laitiiti o Sulu Natasha. E lē gata i lea o lana faafetai tele ma lona lē faagaloina o talosaga molia ma le lagolagosua malosi a ona aiga uma i Niu Sila, Ausetalia ma Amerika.
