Ua mae‘a se iloiloga o se moliaga o le fasioti tagata faamoemoeina faasaga i se alii o le afioaga o Papa Sataua i Savaii.
O lea alii e suafa ia Ionatana Malaki, ua tuuaia i le maliu o se tamā e suafa ia Pita Tofilau o Pesega ma Vaigaga i le tolu tausaga talu ai i le 2008. E fitu molimau a Leoleo e faatatau i lenei moliaga. O se moliaga na teena e le alii ua tulai i luma o le Faamasinoga.
I tolaulauga a le itu a Leoleo na ta‘ua ai, o le faalavelave lenei na tulai mai i le fale o lē ua maliu ma lona toalua i Pesega i le aso 12 o Ianuari o le tausaga e 2008.
Na ta‘ua e le lipoti a Leoleo, o le mae‘a ai o se inuga ava a lē ua maliu poo Pita Tofilau, na agai ane ai loa i lo latou fale, ma na ia tuuina se $20 i lona toalua ia Sulesa Maiava e na te teuina ae agai loa e mālōlō.
Faaalia e Leoleo, a o moe Pita na alu ane Ionatana ma talosagaina le tina ia Sulesa pe mafai ona ia aitalafu i se la $5 tala se‘i ona faaaogāina ma le faamoemoe e toe totogi ane pe a maua lona totogi.
Sa ave e Sulesa le $5 i lē ua molia peitai na avea ma mafuaaga o se vevesi a lea ulugalii ina ua toe ala ane Pita ma fesili i lona toalua i lana tupe ae tuu atu ua lē atoa.
O lea faamatalaga na faaluaina e le tina ia Sulesa i le taimi o lana molimau ma na ia ta‘ua ai, o le masani lava lea a i laua ma lona toalua o le vevesi pe a iai se mea e lē fiafia ai.
O le folasaga a le alii loia o loo tulai mo le itu a Leoleo, le susuga ia Gafatasi Patu na ia ta‘ua ai, a o vevesi lenei ulugalii, o le taimi lea o loo faatali Ionatana i lana taavale, e agai ai e faigaluega.
O lea alii sa galue i le Faalapotopotoga o le Malosiaga tau Eletise, le EPC. Ta‘ua e le alii suesue, na faafuasei ona togi ane e Ionatana se maa agai ia Pita ae na misi, peitai e lei mae‘a ai gaioiga a lea alii ae na ia toe savali ane ma le ausa‘alo (matatuai) ma faaoo ai loa ni manu‘a i lea tamā.
Faaalia e Leoleo o a latou suesuega na maua ai e faalua ona ta e lē ua molia le ao o lē ua maliu – o le ta muamua na tau i le ulu ma le ta mulimuli na lavea ai lona fatafata.
Faaalia e le tina ia Sulesa, na faateia o ia i le faalogo atu o pa‘ō mai ona tua ae na te lē iloa le mea ua tupu ona sa faasusu lana pepe. O le alii lenei o Ionatana lea ua molia i le mataupu, na faaalia e le alii loia ia Patu e leai sona piitaga ma le aiga o lē ua maliu, ae sa nofo ai ona o masaniga i le va o le tina o lē ua molia ma le tina o Sulesa, le toalua o Pita lea ua maliu.
Molimau a le tuaoi
O Tieru Leota, o le tuaoi lea o le aiga na tulai mai ai le faalavelave. I lana molimau na ia faaalia ai i le Faamasinoga e faalogo mai i lona fale ua ee leotele atu se tagata. Na tamoe ane i le fale o Pita ma Sulesa ae vaaia ai Pita ua taatia i le fola o le fale.
Na ia vaaia Sulesa o loo taoto i luga o lona toalua ae o loo tu le alii o Ionatana ma le matatuai o loo fuafua le isi ta.
Faaalia e Leota na alu atu loa uu le matatuai ma na tauivi ma lē ua molia a o taumafai e ave ese le matatuai.
Na mafai ona ia aveese le matatuai ma na ia ave i le teu i autafa o le faleta‘ele o le aiga na tulai mai ai lea faalavelave. Sa ia ta‘ua a o faia lea gaioiga na alu atu loa le taavale a le EPC ma na ta‘ua e Leota na ia talosagaina lē ua molia pe mafai ona avatu Pita i le latou taavale ona ua manino le manaomia o le ave i le falemai talu ai ua vaaia le tele o le palapala ua sau i le ao o lea alii.
E lei talia e Ionatana le talosaga a Leota ma fai ane e sue se isi taavale e ave ai Pita i le falemai. Sa talosaga Leota i le avetaavale a le EPC ma mafai ai loa ona ave Ionatana i le falemai.
Na momoli i le falemai e pei ona ta‘ua e molimau ae toe agai ese Ionatana ma le aufaigaluega a le EPC. Ta‘ua e lipoti e tusa o le va o le 10 ma le 11 i le po o le aso 12 o Ianuari, 2008 na taunuu ai Pita ma lona toalua i le falemai.
Molimau a le fomai
Na fesiligia e le Loia a Ionatana, o Jerry Brunt le tamaitai fomai na faia suesuega i lē ua maliu i le taimi na ia vaaia ai Pita. O le tali a lea tamaitai o Dr. Olika Kori, o se fomai tipitipi i le maota gasegase i Motootua, o le tusa o le 6 (am) i le taeao o le aso na soosoo ai na ia vaaia ai Pita.
Na fesiligia pe faamata na iai se galuega ina ua taunuu atu Pita i le falemai ae na ia ta‘ua – e oo atu ua fai fusiga o le ulu o lea alii ae na faigata se isi gaioiga e faia i ai e ala i togafitiga, ona e taunuu atu o loo matapogia lea alii ma o loo faasuaava foi. Ta‘ua e le fomai e faigata tele ona faia se togafitiga seiloga ua te‘i lē o loo taunuu atu ua leiloa se mea. Ae o le tulaga na oo i ai, na ta‘ua e lenei tamaitai e lei toe te‘i lava lea alii.
Sa ia ta‘ua na siaki uma lava vaega o lona tino ma na matauina ai le faafaigata ona mānava i le itu agavale o lona māmā ma e masalomia ona o le ta lea na lavea ai le fatafata lea foi na vaaia le maosiosia, na faigata ai ona faate‘i ma sologa lelei le mānava a lē ua maliu.
“Ou te iloa o le tele o le palapala alu na mafua ai ona matapogia Pita ma o se faaletonu i le ipu o lona ulu faatasi ai ma lona māmā agavale lea ua mafua ai ona maliu o ia”, o le saunoaga lea a le tamaitai fomai i i lana molimau.
Molimau a lē ua molia
I le molimau a lē ua molia Ionatana Malaki, na ia ta‘ua ai i le Faamasinoga, o le amio lava lea a lē ua maliu, o le alu e ta‘i masina le umi e galue ai o se faifaiva i luga o se vaa fagota, e foi mai loa, inu le ava ma amata loa vevesi ma lona toalua. Faaalia e Ionatana, o le taimi muamua lava na nofo ai i le aiga lenei, sa manino ia latou tuugatala, o lona sootaga i le aiga lea ua leai se eseesega o ia ma se tuagane ia Sulesa, le toalua o Pita.
O le mafuaaga o lona ita tele i le vaaia pea o faiga a lenei alii ia Sulesa. Ta‘ua e lenei alii o lona manaoga i lea po i se $5 e mo se suka auā se ti o le tiute o lea po i le EPC. Ta‘ua e Ionatana o le alu atu e fasi Pita e lei iai sona mafaufau e iu ai ina maliu ae o lona ita tele na mafua ai lava le agai atu ma ta lea alii.
O le molimau foi lea a Leota le tuaoi, na ia ta‘ua ai ua masani uma i latou e nonofo latalata ane i le aiga lenei i le taimi e taunuu atu ai Pita mai i se faigafaiva. “E onā lava Pita i taimi uma,” o lana faamatalaga lea i le Faamasinoga. “Ua masani uma lava tagata, e sau loa faavevesi loa le latou aiga aemaise lona toalua”. Ua tālia nei se faaiuga a le vasega o Faatonu faatasi ai ma se faaiuga a le Faamasinoga i lea mataupu ma ua toe tolopo ai taualumaga a le Faamasinoga i le vaiaso fou.
