O Kolani Jnr Lam o loo molia i le maliu o lona toalua o Sa’u Justina Sa’u

O Kolani Jnr Lam o loo molia i le maliu o lona toalua o Sa’u Justina Sa’u

O le vaiaso nei ua amata ai nei loa ma faagasolo suesuega a le faamasinoga maualuga i Mulinuu i moliaga o le fasioti tagata faamoemoeina, faaoolima, umia o laau faasāina, fasioti tagata paivalea, ma le taumafai e natia le faia o le amiotonu, faasaga ia Kolani Jnr Lam 38 tausaga le matua o le soifua. O Novema o le tausaga ua mavae na taofia ai e leoleo Kolani mo suesuega i le maliu o lona toalua o Sa’u Justina Sa’u, sa avea ma Ofisa sili o le Faalapotopotoga o le UTOs poo le Unit Trust of Samoa.

O le Aso Faraile ua mavae na faatulaga e tagofia ai e le faamasinoga le talosaga a Kolani ma lana loia o Komisi Koria, ina ia faia le faamasinoga o lē ua molia e se faamasino e aunoa ma se laulau o faatonu poo assesors.  Peitai o le mae’a ona feiloai le tamaitai faamasino le afioga Tafaoimalo Leilani Tuala Warren, ma le loia a Kolani ma le loia a le itu a leoleo le afioga Magele Leone Mailo, na faailoa ai e Komisi le loia a Kolani le toe faasolomuli i tua o le talosaga. E lei faailoaina i taualumaga a le faamasinoga le mafuaaga o lea faaiuga ma e lei faailoaina foi poo ā mafuaaga na faia ai lea talosaga.

O le moliaga o le fasioti tagata faamoemoeina o loo aiaia i le tulafono o soligatulafono le Crimes Act, e tatau ona suesueina pe afai e teena e lē ua molia le moliaga, e se faamasino ma ni faatonu se toalima.  E lei faapea lava ua faia toatasi e se faamasino se suesuega o sea solitulafono matuia e aunoa ma le valaauina o ni faatonu poo assesors lea foi e ta’ua o jurors. I le amata suesueina ai o moliaga o Kolani i le vaiaso nei, ua faaalia e le tamaitai loia mo le itu a leoleo le afioga Magele Leone Mailo e silia i le 20 molimau a leoleo o le a valaau.

Ua aofia i lea aofaiga ni molimau o ni fanauiti o le isi e 12 ae o le isi ua 13 tausaga le matutua. O le tasi o ia molimau o se fanau faaletulafono a lē ua molia ae o le isi o se tausoga o Kolani.

O le a lē mafai ona silasila lē ua molia i molimau ia e toalua i le taimi e suesueina ai, ae ua na’o loia a leoleo ma le loia a Kolani o le a mafai ona silasila ma fesiligia molimau a le fanauiti.

O le molimau autu a leoleo o le tamaitai sa galue o se tausitama poo le babysitter, o ia lea sa feagai ma le vaaiga o le fanau a le ulugalii a’o lei maliu le toalua o Kolani.  O se isi molimau autu a leoleo o le foma’i na faia le taotoga faapitoa e sailia ai le mafuaaga o le maliu poo le Pathologist.  E faaopoopo ai ma molimau a leoleo na feagai ma le faia o suesuega. O loo iai le faamoemoe o le vaiaso atoa lenei e suesueina ai molimau ma a mae’a, ona maua ai lea o se faaiuga a le laulau o faatonu i le aso e mae’a ai ona valaau molimau.

O le tulaga masani lea i se faamasinoga e iai ma le laulau o faatonu, e ese mai i se faamasinoga e suesueina e se faamasino lea e tolo i ni vaiaso faatoa maua le faaiuga i le faamaonia ma le lē faamaonia o ni moliaga solitulafono.