E lei toatele nisi na auai i le sauniga puupuu a le Ofisa o Taaloga a le Atunuu le SASNOC na faataunuuina i le afiafi o le Aso Lulu na tea nei i le ofisa tutotonu o le SASNOC i Tuanaimato e tufatufa ai taui tau tupe mai le Malo mo alo ma fanau a Samoa na faamanuiaina mai i ni pine mai taaloga a Malo o le Taupulega talu ai nei i Ausetalia. E pei ona silafia na iai faiga faavae a le Malo o Samoa talu ai e $50 afe mo soo se tasi e na te ausia ai se pine auro mai taaloga nei a Malo o le Taupulega ae $100 afe mo le pine auro o taaloga a le Olimipeka. Peitai ua iai le suiga o nei faiga faavae e pei ona tuuina atu ai le ta’i $20 afe mo le sui na maua mai lana pine auro i taaloga a Malo o le Taupulega, $20 afe mo Sanele Mao i le itupa o alii ma le $20 afe mo le tamaitai talavou ia Feagaiga Stowers.
Ae o se tasi o vaega fou na faalauiloa ane e le Afioga i le Alii Palemia i lea afiafi, Tuilaepa Sailele Malielegaoi, o se faamanuiaga lea mo fanau e lei ausia ni pine auro ae na faamanuiaina i pine siliva. Saunoa le Alii Palemia, o le taui lea ua faaigoaina o le faailoga o le faagaeetia ona o le maualuga na oo iai taumafaiga a nei alo o le atunuu. Ta’ua e le Alii Palemia, na faia le fonotaga a le kapeneta ma faapalota ai pe tatau ona maua ni taui tau tupe mo i latou nei, ma e na’o le toatasi lava le Minisita na au ese ai, ae na lagolago uma e Minisita le tatau lea ona maua ni tupe mo pine siliva ona o le faagaeetia o le Malo aemaise o le atunuu i le tulaga na oo iai taumafaiga a fanau. O pine siliva na maua mai i taaloga nei i Ausetalia e tolu, e aofia ai le pine siliva mai ia Don Opeloge ma Lauititi Lui i le taaloga o le siisii uamea mamafa ma le pine siliva na faapaleina ai le alo fusu o Samoa mai Ausetalia o Ato Faoagali, na tofu i latou nei e toatolu ma le ta’i $4,000.00.
E ese mai i nei taui tau tupe mo fanau taaalo le $10,000.00 na taui atu ai e le Malo le tigaina o le alii faiaoga o le au siisii uamea mamafa a le atunuu, Tuaopepe Jerry Wallwork. Ta’ua e Tuaopepe, e moni e lē o maua le $50,000.00 e pei ona sa iai le amataga peitai e na te faafetaia le Malo o Samoa ona ua a’e se manatu e maua ni faamanuiaga mo pine auro aemaise foi pine siliva. Saunoa Tuaopepe, e tele le sao o le Malo o Samoa i le lagolagoina o taumafaiga a le au siisii aemaise lava i le taimi e tapenga ai mo taaloga faavaomalo e ala lea i le faatupeina o le tele o vaega o tapenaga. Na momoli faapitoa le faafetai a Tuaopepe i le Afioga i le Alii Palemia ma le kapeneta ina ua amanaia ai le sao o fanau na le ausia le pine auro ae na maua pine siliva.
Ae mo le alii lava ia o Sanele Mao ua ia folafola lona sauni lea e faatau sana taavale e faimalaga ai i le taimi o koleniga ma fesoasoani ai i lona aiga mai i lana $20,000.00 na maua, ae o le tamaitai talavou ia Feagaiga Stowers e lei tele sana faamatalaga na tuuina mai se’i vagana ai lona ave lea o lana seleni e fesoasoani ai isi ona aiga o loo aumau faatasi ai ma si ona tina. Ua folafola foi e Sanele Mao ma Feagaiga Stowers le tapena mamao atu ai lea mo taaloga a le Olimipeka ina ia maua ai se isi pine auro mo Samoa.
O le alo fusu o Samoa ia Ato Faoagali lea foi na maua lana seleni e $4,000.00 mai i lea tufatufaga tupe, na ia faafetaia ai le Malo o Samoa ona o le amanaia ai o lana taumafai, aemaise o lana faafetai mo i latou uma na lagolago ai i ana tapenaga, ua toe taliu atu nei i Ausetalia le susuga ia Ato Faoagali ma lona faamoemoe e tapena mai ai i taaloga a le Pasefika lea e talimalo ai Samoa i le tausaga fou. O le sauniga lenei na tufatufa ai tupe a le fanau taaalo na saunoa faafetai ai le taitai o le atunuu, le Afioga i le Alii Palemia ona o le tele o le sao ma le taumafaiga a fanau taaalo nei a Samoa ua sii maualuga ai le igoa pele o Samoa i soo se vaega o le lalolagi. Na tauaao ai foi i lea afiafi se meaalofa mai taaloga a Malo o le Taupulega, o se pine auro mo le Alii Palemia ia Tuilaepa Sailele Malielegaoi.
