Ole alalaga fiafia ole fanau ale Atua ile hall ale ekalesia ole Samoan Assembly of God i Magele o foliga vaaia lea ole loto ua faatumulia ile olioli ma foliga ile fiafia, ina ua faaiuina ma le manuia nisi o taumafaiga a susuga i faafeagaiga ma faletua faapea nisi o tamalii ma tupulaga talavou sa aotuina ile aoga tusi paia lenei ale Samoan Assembly of God i Aukilani.
Ua alalaga fiafia tagata uma ma ua faafoi ai le viiga ma le faafetai ile Atua auā o ia sa tautai ma folau faatasi ma le komiti faafoe ma faiaoga ale aoga ma tamaiti aoga lea ua faataunuuina ai ma le manuia le faamoemoe sa finauina ai e tamaiti aoga nisi o mataupu i totonu ole aoga Tusi Paia auā lava le faalauteleina ole malamalama e ala ile upu ale Atua.
Ile aufaauu ole Bachelor in Biblical Studies e 17 i latou sa faauuina ai mai le tolu tausaga talu ona aotuina i totonu ole aoga. Ma o lea vasega oloo aofia ai ma le tele o nisi o susuga i faafeagaiga mai nisi o ekalesia faapea faletua o faifeau o lea ua latou faaaogāina lea avanoa lelei e faalautele ai le faleie auā le tautalagiaina ole upu faauuina ale Atua i totonu o ekalesia.
Ole Diploma in Biblical Studies e 12 i latou sa faauuina ai foi ile tausaga lua ma oloo aofia ai foi ma nisi o susuga i faafeagaiga ma faletua faapea sui o aulotu oloo naunau e fia faaoagaina le soifua mo le folafolaina ole upu ale Atua.
Ile afiafi ole Aso Sa, sa vaaia ai le faatumulia ole hall i aiga ma sui o aulotu taitasi oloo iai o latou sui i totonu ole aoga Tusi Paia, ae faapea foi i susuga i faafeagaiga sa pulunaunau atu foi latou ile fia molimauina ole faauuga o i latou ua faaiuina le taumafai. Ole aoga lenei oloo auai mai ai ma sui aoga mai Ueligitone ma ole mafuaaga foi lea ole lotulotu mai ai o aiga uo ma e masani mai lea itu o Niu Sila ona ole fia maimoa ma fia silasila i foliga o latou o lea ua ofoina le soifua e tautua ma galulue i luga ole fata faitaulaga ole galuega ale Alii.
Sa faapea foi ona auai mai ai ma le Aposetolo ole AOG Church of Samoa NZ mai Ueligitone ia Rev Talosaga Kome ma nisi o susuga i faafeagaiga ma ua mauluga ma matagofie ai le faamoemoe ole Kolisi.
O luitau ma lagona ole faafetai ile au faauu i lenei tausaga na saunoa iai le taitai ole matagaluega i Niu Sila nei ia Rev Tooseu Tafunai Muaiava, faatasi ai ma le lagolago sua ale sui taitai ia Rev Lemamea Motu Matia.
Ole tauaaoina o nisi o faailoga faapitoa mole au faauu na patipatia ai e susuga i faafeagaiga oloo aotauina i totonu o nei vasega nisi o faailoga taualoa na saunia ele komiti ole aoga e talimasineia ai lo latou galuega oloo fai i totonu ole aoga, aua ua tuu lava ekalesia ma galuega ao lea ua faaavanoaina mai le taimi e toe faalauteleina ai le iloa ile afioga ale Atua.
Na sosoo ma le tauaaoina o Tusipasi ile faailoga ole Diploma in Biblical Studies ma le Bachelor in Biblical Studies lea sa galulue faatasi ai le susuga ile alii pule ole aoga ia Pastor Terry Saipani ma le susuga ia Pastor Sauafe Faatuatua Pulepule ile tufatufaina.
O faailoga e lua ile tagata e sili aoao i totonu ole vasega poo le ua ausia maka maualuluga i totonu ole aoga na maua lea e Pastor Pae Aso ole BA ma Daniel Tanielu Taoipu ole Diploma ma ole sui lea e malaga mai Ueligitone.
Faailoa ele susuga ia Pastor Sauafea Faatuatua Pulepule e maea loa le Diploma ale tagata ona tuu loa lea i lona faitalia pe toe faaauau lana BA mo le isi tausaga.
Ole aoga oloo tatala lava mo soo se tasi e fia aotauina ile upu ale Atua, ma ole taimi foi lea ua tatala ai le avanoa mo tagata uma e fia auai ile kolisi.
Diploma in Biblical Studies
Grace Nive Faalemiga
Lemaota Si‘uoalii Ieremia
Iokapeta Laukoko
Shalom Lalotoa Peniata
Taito Iosefa Silivelio
Ps Nanai Solo Anae Sului
Dominic Taloaina
Sita Taloaina
Daniel Tanielu Taoipu
Ps Fiu Ioritana Tonise
Ramoth Gilead Ualo
Tominiko Vaoga
Bachelor in Biblical Studies
Ps Pae Aso
Esther Afoa
Ps Pelesala Anetone Epati
Ps Leota Pokati
Fu‘a Sara Kaleti
Teinemane Noga
Leota Iliganoa Pagaialii
Ps Ropati Ropati
Simon Samuelu
Sulamai Tau Samuelu
Ps Maua Sula
Ps Unasa Ioane Tarako
Lealofi Tasila
Ps Tuala Maleko Telea
Israel Fereti Toleafoa
Vaipou Tootoo Vaoga
Vaoga Uatisone Vaoga.
