E iai se mataupu sa tupu mai i le vaiaso nei ua lāgā ai le talanoaina o le Diversion Scheme mo nisi ua molia mo se solitulafono i le taimi muamua, i se moliaga i se mataupu e lē matuiā.
O le ā le Diversion Scheme:
I le 1997 sa taliaina ai e le malo o Niu Sila lapataiga a leoleo e faaaogā se scheme lea e ta‘u o le Diversion Scheme mo moliaga o ni tagata faato‘ā solitulafono mo le taimi muamua, ma o se moliaga i se solitulafono māmā, e lē o se mea e matuiā.
O le Diversion Scheme, a faapea ua ioe le tagata lea e molia, e moni na ia faia le mea lea e molia ai, ma malilie leoleo e lē toe solitulafono lenei tagata i se taimi o i luma, e le ta‘uina e leoleo i le Court le mea a le tagata lea na fai, na molia ai, ae fai leoleo i le Court e fai i lalo o le Diversion Scheme le faaiuga.
O mea nei e lelei ai le faaaogāina o le scheme lenei. Muamua a uma loa ona e ioe (plead guilty) i le solitulafono lea e molia ai oe, e leai se record i lou igoa i totonu o faila a le Court, i le moliaga.
E le aveeseina ai le record e faapea sa ave atu ia te oe se avanoa i lalo o le Diversion Scheme. E iloa lava la iina sa molia oe i se mataupu ae o se moliaga mo se taimi muamua, ma o se mataupu e lē matuiā sa molia ai oe.
Tusa e lē aliali i luma ni tusitusiga faalauaitele i le moliaga sa molia ai oe. E taugofie e lē tele se taimi o se loia e sauni ai ma tu mo oe i luma o le faamasinoga e taumafai ia aua ne‘i oo se faasalaga mamafa ia te oe. E faatasi lava ona e faaaogāina le Diversion Scheme. Afai e te toe solitulafono, e lē mafai ona e toe faaaogāina faalua le Diversion Scheme.
O le faalavelave o le Diversion Scheme e te ioe e faamaonia sa e fai le mea lea na molia ai oe. Tusa e muamua e plead guilty ona faato‘ā mafai lea ona faaaogā le Diversion Scheme.
Afai e te faaaogāina le Diversion Scheme, e tusa ua e ioe atoatoa i mea uma ia na molia ai oe.
O le tele o o tatou tagata e fiafia e faaaogā le Diversion Scheme ona o le vaai i le taugofie ma le vave o le scheme, ae lē fuafua mo le lumanai pe toe afaina ai oe.
O le tele o loia e latou te faasinoina tagata i le scheme lea ae lē ta‘uina atoatoa i tagata, mea e tutupu mai i se taimi o i luma pe a toe afaina i se moliaga i le tulafono.
O le vaiaso nei sa afaina ai se tagata Samoa matua i se tulaga faapea. Sa fautuaina e se loia i Otara e alu e plead guilty, i le moliaga lea na molia ai ia, e vave ma taugofie ma o le taimi muamua foi lea ua molia ai lea Samoa i se moliaga i luma o le fale faamasino, i se moliaga i se mataupu e lē matuiā.
O le faalavelave, e lei faamalamalamaina e le loia na alu i ai lea Samoa, e alu lava le tagata lea na aveina le tagi i leoleo tala‘i i ai o lea na faasala i lalo o le Diversion Scheme le tagata lea na ia moliaina i leoleo. Auā a faataga e leoleo le Diversion Scheme, e tusi leoleo e ta‘u i le tagata lea na tagi i leoleo le mea ua oo i ai le tagi a le tagata lea na faapea ua afaina.
E tatau i le loia lea ua sulu i ai le tagata ua molia ona faamalamalama mea uma tau i le Diversion Scheme i le tagata lea e sulu atu ina ia ioe, ae ioe ma le malamalama i le tulafono.
O le faalavelave i moliaga e iai moliaga tau “assault” faaoolima poo le taufaafefe ae lei faaoolima, e lē afaina poo ai na mafua ai ona tupu le mea lea na tupu, pe a e ioe o oe e guilty i le assault, ia maua le diversion.
O le fautuaga e aogā le Diversion Scheme pe afai o lau solitulafono o se solitulafono muamua lea i se mea faatauvaa. Ae ia manatua e tusi leoleo e ta‘u i le tagata lea na tagi i leoleo e ta‘u i ai ua uma ona e ioe atoatoa i le moliaga ma o lea ua fai le fuafuaga a leoleo e faaaogā le Diversion Scheme.
Afai e te iloa e te lei faia uma tuua‘iga ia na molia ai oe, o le fautuaga e sili lou taumafai e fai se faamasinoga e fai ai le mea tonu na tupu, a o lei tuua‘ifuaina o oe i se taimi o i luma i ni mea e te lei faia.
Faitau tusitusiga ninii, mafaufau ma fuafua, ae aua le vave ioe, ae lē o malamalama. Aua foi le na o le vaai i le ala vave ma le taugofie.
E sili le puipuia i lo le togafitia.
