Ua faatulai ese ma lo latou nuu se tamaloa ma lona aiga e aofia ai lona toalua ma lana fanau e toavalu ina ua aliali ni amioga solitulafono a le tama o le aiga i se tasi o ona afafine, ma ua iu ina maito ai ona o le agasala, lea na molia ai e leoleo i le faamalosi o le teineititi, ma le faia o se feusuaiga ma se tasi o lona lava aiga. Sa tetee le tamaloa, ae peitai na suia i lona ioeina o moliaga e lua, i le taimi ua sauni ai se laulau o faatonu e iloilo molimau a leoleo faasaga ia te ia, ma o se ioega e le tau fesiligia, ua laveaiina ai le afafine, mai le tulai lea e molimau faasaga i lona tama ona o le agasala na tupu ia te ia.
O le va o Ianuari o le tausaga e 2002 ma Oketopa o le tausaga ua mavae 2007, na faaalia e leoleo i le faamasinoga na tupu ai le solitulafono, ina ua faatoa sefulutasi tausaga o le teineititi. O le uluai gaioiga a le tamaloa na ia faamalosi ai lona afafine i le po a o toesea le tina o tamaiti. O le maea o lana gaioiga muamua na taua e leoleo sa tagi le teineititi ona o le tiga, ma ia fai atu i lona tama, e matua ofo ma le talitonu na te faia se mea faapea ia te ia. Ae sa faapea atu i ai le ua molia e aua lava nei ona tauina i se isi, aua o le taimi e iloa ai, o le a ia fasioti ia te ia, ae pule o ia (tamaloa) i lona ola.
O le silasila a le faamasinoga e tusa o le lima o tausaga talu ona faatino lea solitulafono e le tamaloa i lona afafine, na faatoa iloa ai ma logoina loa leoleo. O Oketopa o le tausaga ua mavae na iloa ai foi ua maitaga le teineititi i le gaioiga a lona tama, ma o le masina lava lea na ioe ai i leoleo, peitai sa toe suia lana tali i le tetee, ma faatulaga ai o le masina na tea nei o Oketopa e suesueina ai moliaga e lua. Peitai na toe suia i le ioe lana tali lea o loo faatalia ai nei se faasalaga a le faamasinoga.
I le folasaga a le loia mo le ua molia na ia faaalia ai, e ui o le tulaga na tupu peitai o loo mau pea le talitonuga o le fafine i lona toalua ma o loo mafuta pea o se ulugalii e oo mai i le taimi nei, ma o se itu taua e tatau ona silasila i ai le faamasinoga i sana faaiuga, o le ua molia o loo faalagolago malosi i ai lona aiga i le tausiga. E toavalu lana fanau ma o le ulumatua o loo aumau nei i Amerika Samoa ma faigaluega ai. O se isi vaega na taua e le loia e ao ona silasila i ai le faamasinoga, o le ua molia sa faasuava pe ona i le taimi na ia faia ai le soligatulafono.
O se tasi o tulaga na faailoa e le loia a le tamaloa, o loo nonofo nei le ua molia ma lona aiga i Vailele uta talu ona faatulai ese ma le afioaga o Luatuanuu. O loo galue nei le ua molia o se kamuta. Peitai o loo fia silafia nei e le faamasinoga pe aisea na tuai ai ona logo leoleo mo ni suesuega, pe a fua i le umi o se taimi lea e tusa ma le lima tausaga talu ona tupu ae faatoa iloa. E le o se taimi muamua lenei ua oo ai i le faamasinoga ituaiga o solitulafono faapea, aua ua iai foi nisi tamaloloa ua faasalaina i le falepuipui ona o moliaga e aafia ai o latou alo tamaitai.
O se solitulafono ua molimauina e le toatele ua faateleina pea i le atunuu e ui o loo iai polokalame faagasolo i nuu ma afioaga o loo talaiina ai taumafaiga e tetee atu i nei faiga tau solitulafono, e ala i le faamuamua o le ola faa-Kerisiano. O loo iai le talitonuga o le malosi foi o polokalame faalauiloa a nisi o faalapotopotoga tumaoti o feagai ma mataupu faapenei i le tatau lea ona faailoa e fanau ma tagata o aafia i ni faiga tau feusuaiga faamalosi, o nei faiga ina ia mafai ona tuuina atu i le tulafono i latou o loo faia mo le faamasinoina. Peitai o loo talitonuina foi e isi mataupu faapenei o loo natia, ona o manumanuga i le aafia o le va tapuia o matua ma fanau, aemaise o le salalau atu o ni faamatalaga i ni faiga faapenei. O loo faasaina e le faamasinoga ona faailoa le suafa o le tama 45 tausaga o loo molia i le faia o ni feusuaiga solitulafono ma lona afafine, ona o se talosaga a le itu a leoleo ma le loia a le o loo molia, i le fia puipuia lea o le teineititi ua aafia i le maitaga.
