Ua amata ona faasoasoa le eletise i vaega eseese o le atunuu aemaise o le motu o Upolu, ona ua feagai le pulega o le faalapotopotoga o le malosi faaeletise le Electric Power Corporation poo le EPC, ma tulaga faigata i le faaletonu o nisi o afi o loo maua ai le eletise. O le Aso Gafua, 3 o Novema na amata faatino ai lea gaioiga, lea na molimauina le tau fai niniva ai o ulu o le au faipisinisi laiti i nuu ma afioaga, ona sa fuafua e tolu itula e pe ai le eletise i nisi o vaega o le atunuu, peitai na amata pe lava i le 10 i le taeao, ae faatoa ola i le lata i le 6 i le afiafi o le Aso Gafua.
O taumafaiga mo se finagalo o le minisita ma le Pule Sili o le EPC e lei manuia, peitai o sailiga a le tusitala mo se faamalamalamaga o lenei fuafuaga, na faailoa mai e se tasi o tagata faigalueg a le faalapotopotoga o le malosi faaeletise i le lotoa i Vaitele, ua logoina atu e alii inisinia i le afi i Tanugamanono e faapea ua utiuti le suavai mo afi eletise i afi vai o loo i Ta’elefaga ma Lalomauga, o le mafuaaga lea o le tau faasoasoa, ona ua tape na afi sei toe tele se suavai.
E tolu afi suauu tetele o loo i Tanugamanono, peitai e na o le tasi le afi o loo lelei, ma o le afi lea o loo faaaoga mo le maua o le eletise i nisi o vaega itiiti o le taulaga i taimi faigaluega e pei ona faaalia e le tagata faigaluega na talanoa ma le sui o le nusipepa i le telefoni. “O afi a nei mai le taimi o pule le tofa Toluono e lei suia lava”, o le saunoaga lea a le tagata faigaluega.
Gugu le pulega
O faaletonu ua faailoa i afi e lea tagata faigaluega e le o mafai ona faamaonia, talu ai e le o mafai ona maua mai se faamatalaga mai le pulega o le EPC, ae e iai le talitonuga o le a faatoa masua mai se faamatalaga i se taimi a o faagasolo ai pea le faasoasoaina o le eletise i vaega eseese o le motu o Upolu. O loo matauina pea le tuai ona maua ni tali mai le pulega o lenei faalapotopotoga i ni mataupu e fia maua ai e le au faasalalautala ma tusitala, ni faamalamalamaga o mataupu e fitoitonu i le EPC, e pei o se pou moli na palasi ma maua ai le taavale a se ulugalii Samoa mai Ausetalia, lea na maliu ai le tamaloa, ae manua tigaina le tina lea ua totogi e le EPC ona togafitiga i Ausetalia.
E le o iloa le umi o le a faasoasoa ai le faaaogaina o le eletise, ae sei vagana se lipoti mai le televise o le TV1 ua taua ai o le Aso Faraile 7 o Novema e tatau ona maea ai. Peitai ua taua e se molimau e lei faamaonia, e faaono oo atu i le faaiuga o le masina nei o loo faatino pea lea tulaga, pe afai e tuai ona faateleina le suavai i faatanoa o loo pue ma teu ai le suavai i afi eletise e maua i le suavai o loo i Taelefaga ma Lalomauga.
Ua amata toulu timuga i le atunuu ona o le tau susu lenei, ae e le o mafai ona faamautuina ai pe ono vave maua ai se laveai ma toe foi ai le auaunaga a le eletise e pei ona sa iai o le ola faasoloatoa sei vagana ni faaletonu e ono tutupu faafuasei mai.
Cashpower
O loo taumafai nei le EPC e faasopolia uma le atunuu i le faiga fou o le faaaoga lea o mita ua taua o le cashpower, lea o le a mafai ona faasoasoa tatau ai e aiga ma pisinisi, faapea matagaluega ma faalapotopotoga a le Malo le eletise. O loo faagasolo foi nisi o taumafaiga e saili ai nisi o toomaga mai le taugata o le suauu mo afi eletise, e pei ona faatino se atinae e maua ai le eletise mai le malosi o le savili, faapea le malosi o le la poo le solar system.
