AXE BOYZ –Faalauiloa lipine muamua

Ua maea nei ona tatala se tasi o cd fou a le aufaipese ua faaigoaina o le AXE BOYZ mai San Francisco i Amerika. O le cd lea e pei ona faaalia e le taitai o le aufaipese o Iafeta Matamua Afakasi o ia o loo feagai ma le faafoeina o lea foi fuafuaga. O Iafeta o le alo o Samoa mai le afioaga o Salelologa I le mote tele i Salafai ma na mafua ona oo atu i Amerika ona o le faaaogaina foi e se tasi o ekalesia e taina a latou pese ma viiga o le Atua ma o loo galue nei foi i totonu o se ekalesia African American poo le lotu a tagata lanu i lea foi itu o le lalolagi.

O lenei faamoemoe o loo mafai ona fesoasoani uma iai ma nisi foi ona tausoga e pei o le alii o Talifilemu Matamua Saunoa. O le aufaipese ua faaigoaina o le Yadaimean o lona uiga o loo e iloa le mea o loo ou fai atu ai poo le “you know what I mean “. i le faaperetania. O le aufaipese na amata lava i le tausaga 2003 ma e aofia ai alo o Samoa o Iafeta Matamua Afakasi, Ilasaina Faualo, Talifilemu Matamua Saunoa, Too Kasala, Fua Ah Lam.

O le uluai lipine lea ua mafai ona tuufaatasia ma o loo galulue nei i le lipine lona lua o a latou fatuga ma le faamoemoe e faalauiloa foi ise taimi lava o le tausaga nei poo le masina o Iulai.O le mafai ona ausia e ia alo o le atunuu o lenei foi galuega ua momoli mai ai ma o latou alofaaga i tagata Samoa uma o loo iai i Aotearoa nei faapea foi le tautua ma nisi o auaunaga o loo mafai ona o latou maua mai ai faasalalauga i Amerika e pei o le Radio Samoa atoa ai ma le paia lasilasi o le atunuu o loo tapuai i faiva o ana tamafanau i soo se vaipanoa o le lalolagi nei.