Aveese le komiti faafoe – nimo le sefulutolu afe mai tupe a le asosi o leoleo

A oo ina mapuna mai i fafo ni faaletonu i le pulea o se matagaluega poo se faalapotopotoga a le Malo, se pulega a alii ma faipule poo se faalapotopotoga tumaoti, e faigata ona tautatala ma augofie ni lagona o nisi oi totonu e faailoa ni manatu.
E faapena le faaletonu ua oia ai nei le lotoifale o le asosi o alii ma tamaitai leoleo o loo galulue, ina ua maua ane i se suesuega a se suetusi tumaoti, e sefulutoluafe se seleni a le asosi ua le oi totonu o le latou teugatupe i se tasi o faletupe i Apia.
O sailiga na faia mo se faamatalaga mai le laulau poo le komiti faafoe e lei manuia. Peitai o se alii leoleo sinia na ia faamaonia mai ua tuuina atu le mataupu i le vaega o suesuega faalotoifale i ni aafiaga o leoleo le police professional standards unit mo le faia o se sailiiliga.
O le faamatalaga a le leoleo sinia ua maua i le galuega a le suetusi, e iai seleni na tala ese ma le teugatupe ae aunoa ma se silafia o sui o le asosi poo ā ia seleni ae poo ā ni fuafuaga a le asosi na faaaogā i ai.
O le Aso Faraile na tea nei na ta‘ua e se molimau faatuatuaina, na taloina ai se fonotaga a le asosi ma e nao leoleo e iai tulaga poo le au fai ta‘ai sa auai. O le fono lea e pei ona ta‘ua e le molimau, na tuuina atu se lafo o le lē faatuatuaina faasaga i le Pelesetene ma lana komiti faafoe.
Na manumalo le finauina o le lē faatuatuaina o le komiti ma faasee ese ai ae filifilia se pelesetene fou ma lana komiti faafoe. O le asosi a alii ma tamaitai leoleo o se faalapotopotoga a Malu o le Malo ua leva tausaga o faatūina, ma e iai ana teugatupe e pei ona vavae ese mai ai i totogi o alii ma tamaitai leoleo ni a latou saofaga e alu i le latou teugatupe.
O le molimau a se tasi o tamalii sa avea ma leoleo, o ia saofaga e ave ai le fesoasoani i se maliu o se tuaa o se leoleo, ae a litaea pe faamavae se leoleo e toe tauaao i ai lana seleni atoa na teu i le teugatupe.
O le tasi lea o tulaga o loo gugulu ai le asosi ona na faaalia e se molimau o se leoleo sinia, e iai lava nisi ua o ese ma le matagaluega ae o loo pogisa poo fea a latou saofaga sa toese mai o latou totogi ma teu atu i le teugatupe a le asosi.
O le suesuega o loo faia e le police professional standards o le a manino ai le mata o le vai pe o le seleni o loo leiloa na faaaogā tonu i se fuafuaga a le asosi poo se isi lalolagi ua oo i ai.