E lē o nofo lelei i le faipule o Salega i Sasa’e le afioga Olo Fiti Vaai le aveese o ia ma le komiti o tupe a le Palemene. O se tasi lea o komiti taua auā e suesue uma ai le faaaogāina o tupe mo galuega a le Malo. E aami foi e lea komiti sui o matagaluega ma faalapotopotoga a le Malo e oo atu e tali i ni fesili pe a iai ni mataupu ma’ale’ale e tutupu e aafia ai le faaaogāina o meatotino poo aseta faapea tupe a le Malo.
O le fono a le Palemene i le aso Lua ua mavae na faailoa ai e le sui fofoga fetalai le afioga Nafoitoa Talaimanu Keti le toe fesuia’iga o sui faipule i nisi o komiti a le Palemene ma faailoa ai le see ese o Olo ma le komiti o tupe ae ave i le komiti o galuega tetele a le Malo.
Na sa’i se lagona o le faipule o Salega i Sasa’e ma ia fesiligia ai le tofia o le tofa Namulau’ulu Sami Leota i le komiti o Tupe ae e lei faatautoina lona filifilia i le tofi o le itumalo o Faasaleleaga numera 2 lea na manumalo i le palota laititi ina ua toe saili se faipule o le itumalo ina ua tuumalo le tofa Pa’u Sefo Taumata Pa’u sa seei i le nofoa.
I le fesiligia o le Palemia i le faasea a Olo Fiti ona ua aveese ma le komiti o tupe sa faailoa ai e Tuilaepa e lē o aveesea motu ma komiti a le Palemene ae o loo faasee atu i le isi komiti. Na faamanatu ai e le Palemia e lē o le komiti ae o le galue faamaoni o sui faipule e faatino o latou tiute na valaauina ai.
Na faailoa ai foi e le Palemia se finagalo o Olo i se nusipepa ua ia faailoa ai e faapea atonu o lona faasalalau faalauaitele o mataupu a le komiti o tupe o le mafuaaga lea. Peitai sa tali Tuilaepa afai o lea ua nofo lava le faipule ma faailoa lea tulaga e ta’u mai ai ua tautino lava o ia i lona sese auā e lē tatau ona faalauiloa lautele mataupu a komiti.
Na faaalia e le Palemia o komiti a le Palemene e aami ai tagata faigaluega e tali ni fesili ma e faamatala uma mea moni o se faaletonu ua tupu, ae afai e faailoa lautele ia tautinoga e leai se isi e toe fia oo atu e tali i ni fesili peafai o le a malu le tulaga tutoatasi o le komiti e taofiofi ai ona faailoa lautele ni mataupu.
O le afioga Olo Fiti Vaai e iloa foi i lona suafa matai o Levaopolo sa faipule ai i se isi itumalo i ni paeaiga ua mavae a le Palemene, ose tasi e saoloto le faailoa o ona manatu faasaga i le Malo pe a ia silafia ni faaletonu. O ia foi o se faipule e tuusa’o ona lagona pe a talanoaina mataupu a le Palemene aemaise i le taimi e soalaupule ai ni tulafono taufaaofi poo le lauliliuina o le tala o le tupe.
