Ua tuuaia le taunuuga o le faigapalota a le itumalo o Vaimauga i Sasa‘e i le aveesea o se tasi o matai talavou o le nuu o Vailele sa taitaia le kalapu lakapi a le afioaga.
E lē o logolelei i alii ma faipule ia faamatalaga ua alu i luga o le ea i faasalalauga i Samoa faapea ma tala feaveai, ma o loo teena e le pulega mamalu a le nuu ia faamatalaga.
“Ou te lē o lesitala i le lola palota a Vaimauga i Sisifo o lona uiga ou te lei palota i le itumalo”.
O le finagalo lea o le Peresitene o le kalapu lakapi a le afioaga o Vailele, o ia foi o le faiaoga o le au a le afioaga.
Na faaalia e le peresitene o le taumafai o nisi o sui o le kalapu e faapea o ni matai o le nuu, e aveese le tofi mai ia te ia, na ia maua ai ni faamatalaga e faapea o se gaioiga e mafua i le palota.
Peitai ua teena malosi e le peresitene fou ua filifilia le susuga Taufaga Tiitii, le iai o se sootaga o le palota ma le mataupu ua oia ai le lotoifale o le kalapu lakapi.
Na ia faaalia o le Aso Sa, 13 o Mati i le afiafi na faia ai le filifiliga o tofi o le kalapu, lea na filifilia ai o ia e avea ma peresitene. O le palota mo le sailia o tofi e lei auai o ia faatasi ma se isi tamalii o le nuu, ae sa ave o la suafa i le palota. O le molimau a Taufaga, e na o le 4 palota na maua e Fataalii.
O le Aso Gafua 14 o Mati na toe feiloai ai le kalapu ina ua mae‘a ona logoina Taufaga e Fataalii i le faaiuga ua tasi i ai sui o le kalapu lakapi a le nuu.
Sa faaalia e Taufaga sa iai nisi o le kalapu na mananao e toe fai le palota e sailia ai tofi o le kalapu, peitai sa finau atu e lē tatau ona ua mae‘a le palota i le po o le Aso Sa. O lona manatu i le tausia o le filemu ma le nofo lelei o le kalapu, na ia malie ai e toe fai le faiga filifiliga.
“E tufa atu fasi pepa o le a fai le palota faalilolilo ae tulai Fataalii ma alu ese ma le matou faatasiga”, na saunoa ai Taufaga Tiitii.
Na lē taunuu le faamoemoe i le afiafi lea, ae o le aso na sosoo ai na momoli atu ai le faamavaega a Fataali ma le tofi ma lē toe avea ma sui o le kalapu lakapi.
Ua silia i le 20 tausaga e lei toe auai Taufaga ma nisi o tamalii o le nuu i totonu o le kalapu e pei ona faaalia e le peresitene fou.
O le faavae o le finagalo o Fataalii, ua taumafai se vaega e aveesea faamalosi o ia ma ia tuuaia ai le palota.
O se tuuaiga ua faaalia e Taufaga e leai se sootaga ma le palota. “Ua uma le fono a le matou nuu ma ua matou talisapaia lelei le toe filififilia o Tuisugaletaua i le tofi o le itumalo”.
Ua filifilia foi e le kalapu se faiaoga fou e nafa ma le faatautaia o le au lakapi tele a le nuu e pei ona faaalia e Taufaga. O le tofiga peresitene ma le teutupe faapea ma le faiaoga sa umia uma e le peresitene ua faamavae, e pei ona faailoa mai e Taufaga.
E ui ua faamavae Fataalii ae na faaalia e le peresitene ua filifilia, o loo manaomia pea le lagolago atu o lea tamalii o le nuu i le atina‘eina o le kalapu aemaise o alo ma fanau a Vailele ua talenia i le lakapi.
O se tasi lea o afioaga i Samoa ua maoa‘e le atiina a‘e o le taaloga mo alo ma fanau e pei ona iai nisi ua ofi i le au tele o le Manu Samoa faapea ma le au taitoafitu a le atunuu, e pei o Simaika Mikaele, Mikaele Pesamino, ma Pale Toelupe.
