Ua mae‘a le tausaga o taaloga Lakapi sa feagai ai ma le tele o kalapu i Aukilani nei, e faapena foi le kalapu malosi lenei o Poni poo Ponsonby. O se tasi lenei o kalapu e lau i tamaiti o le tatou atunuu e fiafia i le taaloga lakapi, mai lava i au sinia sei oo i le vaega laiti (Juniors).
O se tasi o tamalii o le atunuu iloga i le taaloga o se tama tuai o le kalapu a Poni, o ia foi o se Samoa muamua i le Olopeleki ma o loo avea foi ma Ofisa Lagolago o le Iuni Lakapi a Niu Sila e oo mai i le taimi nei, le afioga a Tuifaasisina Brian William, o ia lea sa fai ma failauga faapitoa i le tufatufaga faailoga sa faia Aso Toonai a le kalapu mo au laiti.
Sa faatumulia i mātua ma i latou e lagolagoina le kalapu le hall tele a Mt Albert Grammar ona o le molimauina o lea faamoemoe tāua. Sa faafetai faapitoa lava Tuifaasisina Brian Williams i mātua o alo ma fanau ona o le fiafia e unaia tamaiti i le taaloga a o laiti, faatasi ai ma le lē faalogologo tiga i le malulu aemaise o taeao uma o Aso Toonai o taaloga.
O au e mai le Under 6 se‘i oo atu i le Under 11, o au ia o loo iai i lalo o le vaega laiti poo Juniors, ma sa maofa lava foi ina ua ave uma e tamaiti Samoa le tele o faailoga lelei o le laugatogi, mai lava i le Under 6 e oo atu i le Under 11.
O nisi lava foi o au sa maua faailoga faapitoa ona o le lei faiaina i le taamilosaga atoa o le tausaga, faapea foi ma ni faailoga o sikolasipi tau taaloga e maua fua ai meataalo mo nisi o alo ma fanau sa maoae le taaalo i lenei tausaga atoa.
O loo faaauau pea le lelei o le kalapu lenei e ala i alo ma tamafanau o loo taaalo i le taimi nei e lē gata i le au tele a Aukilani, ae o le Olopeleki foi, a o i latou sa amata ma faafailele mai ia Ponsonby. Talu ai le toatele o tamaiti o loo resitalaina o latou suafa i tausaga taitasi i lenei kalapu, ua fai lea ma ala ua lē tasi ai se Under 6 e oo lava i le Under 11, ae ua ta‘i 4 au ae faaigoa i lanu e pei o le Under 6-Blue, ma ua lava lea e faailoa ai le fiafia tele o mātua i le maopoopo ma tulaga maualuga o galuegafai a Ponsonby.
O nisi o ata o lenei tusitusiga o le a silasila ai i alo ma fanau Samoa o loo faatumulia ai le kalapu, aemaise o le vaega laiti (Juniors), ma e talitonu le manatu o nisi nei o le a fai ma sui a lē o le Olopeleki, poo le Manu Samoa i le lumanai.
