O le fuafuaga lea a le Matagaluega o Leoleo na amata ona faatino i le vaiaso na tea nei. E tolu lelei taavale a leoleo ua aumai mo le taofia ai o taifau ina ia faatino ai lenei faamoemoe. Ua mae‘a ona pasia le tulafono ina aveese ai taifau mai i le taulaga o Apia.
Ua toatele ua autausagā o lagalaga faitioga ona o le vaaia pea o le tele o taifau i le taulaga. O lea lava foi na oo i le Minisita o Tagata Tafafao Maimoa mai Fafo le faitioga o nisi o tagata asiasi mai ua osofai e nei taifau.
E lē gata i lea na agai lava foi le Pulega ina ia tuu i lalo ia taifau ae uma ane ua aafia ai nisi o ofisa o le malo ae ua lē maua ai taifau.
O lea ua iai se aoaoga ua faia e faaaogā ai fana o loo tuu ai i lalo manu papalagi a le Matagaluega o Faatoaga ma Faigafaiva ina ia saili ai se isi auala e tuuitiitia ai le numera o taifau i le taulaga o Apia ae e foliga mai o ā lava taumafaiga e lē o faaitiitia le numera o taifau o loo agai atu aiga ma lafoai i le taulaga.
O lea la ua faamalosia i le vaiaso lenei e leoleo lea tulafono ma o loo muamua lava ona vaai i le aveese o taifau taaloa ma ave i Tafaigata.
O le tala a Leoleo o lea ua iai se nofoaga o le a tuu ai taifau nei a o fai i ai se fuafuaga. O le isi vaega o lenei tulafono o le faamalosia lea o le tulafono e lesitala ai taifau a aiga uma o le atunuu.
E $5 e lesitala ai le taifau e tasi ma e tolu lava taifau ua faataga ona umia e le aiga e tasi. E sili atu loa totogi loa le $10 i le taifau lona fā agai i luga ae e faamalosia ai ma le totogi o le laisene e $30 mo le lafu maile lea o le a taofia e aiga.
E matautia le vavao o le atunuu i lenei mataupu ona o le tele o faitioga i nei taifau taaloa ma o le faamatalaga a le Ofisa o Leoleo ua matuā lē iloa poo le ā lava le isi auala e mafai ona taofi ai lenei faafitauli i totonu o le atunuu.
Mo le alii Palemia o se faiga lenei ua vaavaai i ai ina ia oo atu i le fono tele a malo laiti tau atiae a le lalolagi lea e fai mai i Samoa ua leai ni vaaiga nei i Apia.
O le faamatalaga a le alii Palemia o lea ua toe agai lava i leoleo le galuega ua tele tausaga o taumafai isi matagaluega e faatino ae e lei faamanuiaina ma o le talosaga e mo aiga o loo iai le mafaufauga e lafoai taifau o lea o le a agai atu leoleo i maota ma laoa ina ia mautinoa e leai se aiga e lē lesitala a latou taifau.
Ma o se solitulafono foi le lafoai o meaola i nofoaga faitele pe afai ua lē mafai ona tausia, ma o le tasi lea mafuaaga o le faamalosia o tulafono o lesitala e taofia ai uiga nei.
