E to‘a 14 pagota o loo nonofo i Vailele i le nofoaga o iai le maota faalemalo o le Ao o le Malo.
O latou uma ia e faigaluega mo le Ao Mamalu, e lē gata o le vaaia o faatoaga ma vaai le lotoā i Vailele, ae faapea i Tuaefu i le maota o loo afio ai le Tama-aiga ma lana masiofo. O meaai a pagota e to‘a 14 e saunia uma e le Matagaluega o Leoleo ma Falepuipui.
O le uta o taumafa mo Iulai 2010 e oo i le masina o Novema 2010, ua faaitiitia ma ua lē lava ai le faasoasoa ona ua aitalafu e se tasi o tagata faigaluega totogi a le Ao o le Malo pusa‘apa e 6, ma le faaupuga e toe totogi peitai e lei toe faafoiina atu i totonu.
O le isi taga araisa ma le pusaapa e tasi na aitalafu e se alii leoleo, ae e lei toe faaolaina atu. I se isi faaupuga e lei toe avatua se isi taga araisa ma se pusaapa e sui a‘i.
I se molimau a se leoleo ua lē manao e faailoa lona suafa, o le aitalafu o pusaapa e 6 ma le taga araisa ma le isi pusaapa, o se faaiuga na faia e se tasi o pagota sa avea ma matai o pagota e to‘a 14.
Talu ai o lea faaletonu ua utiuti ai le faasoa o le pauna a pagota mo masina e 4 amata mai ia Iulai e oo ia Novema 2010. Ua logotala i ai le Komesina lagolago o loo vaaia le falepuipui i Tafaigata, ma faia ai le faaiuga e toe faafoi i le toese poo le falepuipui lea alii pagota.
Na fesootai atu i le Komesina lagolago o le matagaluega o leoleo ma falepuipui o loo fai ma sooupu, le afioga Leaupepe Fatu Pula mo se faamatalaga i lenei mataupu, ae na faailoa mai e le Komesina lagolago e leai sona silafia i lea faaletonu.
O le mafuaaga lea na sailia ai se isi auala e maua ai se faamatalaga mautu o le faaletonu, ma na faapea ona faaalia ai e se alii leoleo, e sa‘o e iai se tulaga faapea ua afaina ai taumafa ma meaai a pagota.
O se tasi lea o tuua‘iga o loo suesueina nei e le vaega o amioga taualoa a le Matagaluega o Leoleo, o le toe faaaogā e leoleo o meaai poo le pauna a pagota. E oo mai i le taimi nei o loo faia pea suesuega ma e lē iloa poo afea e mae‘a ai.
O le alii faigaluega a le Ao o le Malo o loo tuuaia i lona aitalafuina o pusaapa e 6, o se tasi e vavalalata ona sootaga faaleaiga ma le Tama-Aiga.
E lei maua sona finagalo ma o le mafuaaga lea o le taofia o lona suafa e lē faailoaina i lenei lipoti. Peitai o le a tulitatao pea lenei mataupu mai le ofisa o leoleo ma le pulega o le falepuipui mo le fia maua o se taunuuga o suesuega.
