Ave faamalosi le tamaitiiti ma folafola lona fasiotia e taui ai le tuli ese o ia

E lua (2) tausaga ua faasala faafalepuipui ai e le Faamasinoga Maualuga se alii e suafa ia Aleni Finau, 19 tausaga sa nofo i Moataa, e tusa ai ma se moliaga o le ave faamalosi (kidnapping) o se tamaitiiti a se tamaitai o lea afioaga na o la nonofo.

E lē masani ona faalogoina lea ituaiga solitulafono i Samoa se‘i vaganā ai i le va o se alii ma se tamaitai ua oo i luma o le Faamasinoga. Peitai o le ave faamalosi o se tamaitiiti i le va o ulugalii ma fanau, o lea faato‘ā tulai mai lea o se mataupu faapea i lenei vaitaimi i le Faamasinoga i Samoa.

Saunoa le afioga i le Faamasino o le Faamasinoga Maualuga na seei ma feagai ma lenei mataupu, le Afioga Vui Clarence Nelson, o le soligatulafono lea o le ave faamalosi, e lē taatele i totonu o le atunuu ae o se soligatulafono e matuia tele.

O se faamatalaga o lenei mataupu o loo ta‘ua ai, o le masina o Oketopa o le tausaga na tea nei, sa oo atu ai lē ua molia i le aiga o lē na tagi ma nofo ai. O lē na tagi i lea mataupu, o le tina o le tamaitiiti fa tausaga lea na sailia ma o lē ua molia sa nonofo ma lea tamaitai.

O le mafutaga a le alii ua falepuipui nei, e maua i faamaumauga a Leoleo e lei umi ma na faaiu i le tuli e le tamaitai lea o le alii o Finau mai i le la mafutaga aemaise o totonu o lona aiga i Moataa.

“Tusa e lei atoa se masina talu ona ma nonofo, ae ma toe tetea ona o uiga o Aleni i lo matou aiga toe tuuai‘a solo mai i le gaoi,” o se faamatalaga lea a lē na tagi. Sa faatea foi e le afioaga o Moataa lea alii ona o nisi foi o soligatulafono ma o loo manino foi i luma o le Faamasinoga le tele o nisi moliaga ua faia faasaga ia te ia.

Ua ioe Finau i ia moliaga ma o loo tālia faaiuga o nisi o nei mataupu. E ui ua faatea lea alii ma alu ese ai, ae na toe fetaui i le tausaga lenei ma na fofogaina le Faamasinoga na toe taumafai ai le alii ua falepuipui e toe faaolaola le mafutaga ma lē ua tagi.

Sa taumulimuli solo ai lē ua molia ma iu ai lava ina oo atu i le fale o le tausoga o lē na tagi i Moataa i le manaoga lava e toe nonofo ma le tamaitai lea i Moataa, ma sa faataga ai loa e lē na tagi le nofo o Finau i se fale o lona tausoga e latalata ane lava i le fale sa nonofo muamua ai ma Finau.

O le vina o Finau e avatu le atalii o lea tamaitai e fa tausaga le matua la te tafafao ma iu ina moe ai ia Finau lea tamaitiiti, ma o le afiafi o le aso na sosoo ai e lei alu atu lava le tamaitiiti, na fesootai ane ai le tina i lona tausoga e asi lana tama.

O le tali na avane o loo i le fale Finau ma le tamaitiiti ma e “uma momoli atu”. O le tamaititi lea e lē o se atalii o Finau e ese lona tamā.

Na fiu e toe faatali le foi ane o lea alii e momoli le tamaitiiti i lona tina, ae fesootai atu le tamaitai e ana le atalii ia Finau ae sau le tali, o lea ua o ma le tamaitiiti, ma o le a ia fasiotia le tamaitiiti e taui ai le tuli ese o ia mai i le aiga o lea tamaitai i Moataa, ma mea leaga ua faia e lea aiga ia te ia.

O le ala lea na oo ai loa le mataupu i leoleo ma sailia ai le tamaitiiti, ae tusa o le aso atoa ma le ‘afa na toesea ai le tamaitiiti. Ua faamaonia le moliaga o le ave faamalosi lea ua faasala ai mo le lua tausaga i le toese ae o le moliaga o le lafo o upu taufaamata‘u lea ua tolopo i le aso 14 o le masina nei e faia i ai se faaiuga a le Faamasinoga, faatasi ai ma nisi o moliaga o loo molia ai i luma o le Faamasinoga Faaitumalo.