O le faaiuga o le vaiaso na tea nei na faamautu mai ai le faaulu o se tagi a se tasi o faipule o le Tuamasaga faasaga i se pule aoga o lona itumalo.
O le tagi na taua e le na tapa i lenei mataupu, ua mafua ona o le manatu o le faipule ua le faamanino ma faamaoni le faiga o lipoti o tala o le tupe a le aoga.
O le mataupu lenei na faaalia e le sui lenei na talosaga e taofi lona suafa i lenei taimi o le lipoti, ua tele masina o finauina.
O le sailiga o tupe o loo faaaoga e lea aoga faaitumalo. O le faafitauli, ua silia i le 10 tausaga e leai ma se tala o le tupe a le aoga i le aoina ai o pili aoga ma le faaaogaina i galuega faatino a lea aoga maualuga.
O le vaiaso na tea nei na ta‘ua e le sui lenei na oo atu ai se tusi a le Pule Aoga i le Komiti a le itumalo o loo vaaia galuega faatino a le aoga lea e aofia ai ma le faipule. O le tusi ua faaali ai e le Pule Aoga e tatau ona toe totogi atu e le Alii Faipule se tinoitupe e tusa ma le $160,000 (tala). O lea tupe na ta‘ua i le tusi a le faiaoga o pili aoga uma nei a le fanau i le 10 tausaga ua tuanai.
Na faaalia foi e le tusi o le Alii Faipule lava na aoina seleni nei faatasi ai ma Komiti a le Aoga sa iai.
O lea la ua mae‘a ona tuu atu le tusi a le Pule Aoga ae o lea ua agai le Alii Faipule ma ave le tagi faasaga i le Pule Aoga.
O lea la e tālia se isi feiloaiga a le Komiti i le vaiaso lenei poo fea tonu lava o le a agai i ai lenei mataupu.
O le vaiaso foi lenei o le a agai ai loa le tatou nusipepa e saili poo le a tonu lava le sa‘o o tuuaiga ae o ai foi sa tatau ona vaaia pili aoga nei.
O le faiga e masani ai o pili aoga a le fanau aoga mai i aoga laiti seia oo i Kolisi Maualuluga e totogi uma lava i le Komiti a le aoga ma o a lava manaoga o le Pule ma Faiaoga i mea e fia faaleleia o le aoga e agai tonu i le Komiti mo le faatinoga o ia manaoga.
Faaalia e le sui lenei na faatalatalanoa i lenei mataupu fai o le leai o se tala o le tupe o seleni nei e totogi atu e matua mo aoga a le fanau, ae e leai ma se tusi tupe a lea Aoga.
E lei maua le Alii Faipule mo se faatalatalanoaga ae o le a saili i lenei vaiaso faamaumauga o fonotaga aemaise o tupe nei e pei ona tuuaia ai le Alii Faipule faapea ai le Pule Aoga.
