O loo tuliloaina nei e Mark Hunt le UFC i le faamasinoga i tulaga piopio na fai ia te ia. E ui ua mae’a le konekarate a le Super Samoan ma le UFC, na uma i le masina o Tesema 2018 ae o loo ave pea le tagi a Hunt e mafua mai le fusuaga ma Brock Lesnar i le 2016.
Na faia’ina Hunt i le fusuaga lea, peitai, na faamaonia i suesuea faapitoa na faaaogāina e Lesnar fualaau faasāina e faamalosi ai lona tino. Na faalēaogāina le manumalo o Lesnar i le fusuaga lea. O le lave, e lei avea ia Hunt le manumalo ae na faitauina na faia’ina pea ia Lesnar.
E tele aafiaga o lea mataupu, aemaise ai le aofaiga tupe na maua e Hunt ma Lesnar. Ae o le tulaga tāua tele, o le leai lea o se avanoa e maua ai e Hunt le manumalo, ona o faiga piopio. O loo iai le faamoemoe e toe foi Brock Lesnar e toe fusu i le UFC. I le taimi nei oloo taalo i le piiga i le li’o a le WWE ae o loo iai lona faamoemoe e toe foi i le UFC, ma ua faamaonia mai foi e le UFC lea tulaga.
Ua tetee ai tele Hunt ona o le lagolagoina o Lesnar le tagata solitulafono ae ua faatuatuanai o ia e le UFC. I le manatu a Mark Hunt ua faamaonia ai iina le lagolagoina e le UFC o tagata e faaaogāina fualaau faasāina e pei o Brock Lesnar ae e lē o lagolagoina tagata mamā e iai Hunt ma isi. O le tagi e faasino lea ia Dana White le pule o le UFC ma le pulega a le UFC.
Na faasala Lesnar e le Matagaluega o Fualaau Faasāina i Nevada, USA le nofoaga na fai ai le fusuaga a Hunt ma Lesnar. E $250,000 le sala, e oo mai le taimi nei e lei totogiina lava e Bresnar lana sala. Afai e moni le toe foi o Lesnar i le UFC e tatau ona totogi muamua lana sala, ae lei toe faia se isi ana fusuaga i le UFC. E iai le fusuaga o loo fuafua mo Lesnar e fusu ai ma Daniel Cormier le Siamupini a le UFC, pe a totogi muamua le sala. Ua atili faitioina ai e Hunt lea tulaga o se isi o mafuaaga ua musu ai e toe taalo i le UFC. Fai mai Hunt ua aveesea e le UFC lona loto mo le taaloga o le Mixed Martial Arts. O le naunautaiga ua nofo ma Mark Hunt o le avanoa lea e fusu ai mo le Fusi o le UFC. Peitai e lei tuuina atu ia te ia e le UFC lea avanoa ona o le faamasinoga o loo loma nei. O le leai o se avanoa e tuuina atu e le UFC ia te ia e fusu ai i le fusi, ona o lana mataupu o loo taoto nei i le faamasinoga, ua avea ma mafuaaga e teva ai lona loto mai le taaloga.
Ua mae’a nei konekarate e fusu ai Mark Hunt i fusuaga a le UFC. O loo saili avanoa le alii fusu mo fusuaga o le 2019 e faauma ai lona taimi i le taaloga, ae o lana tagi i le faamasinoga o loo tumau pea.
