Ave e le Fofoga Fetalai le lomia o lipoti faapalemene i Leoleo

Ua manino le lē fiafia o le Fofoga Fetalai o le Palemene ina ua toe faalauiloa sana tusi na faapea ona tufa uma i ofisa faasalalau ma nusipepa i totonu o Samoa i le lē usitai o le Samoa Observer ma le Newsline i lana faatonuga e lē mafai ona faasalalau se lipoti a le Pule ma le Suetusi Sili lea na uluai faalauiloa e le Samoa Observer i le lua vaiaso talu ai.
O lea lipoti na lomia e le nusipepa a le Samoa Observer ua ta‘ua ai le tulaga o iai lipoti a matagaluega eseese o le Malo aemaise o le tulaga o iai le Tala o le Tupe a Samoa.
O se lipoti na muai faalauiloa ma tuu atu i luma o le Laulauafono a le Palemene ia Tesema o le tausaga na tea nei ma fai ai loa le faatonuga e pei ona masani ai ina ia tuu atu i se Komiti faapalemene e auiliili suesuega o lenei lipoti a o lei toe foi ane i le faitauga faalua, o iina la o le a talanoaina ai loa lea ripoti.
O le lē malie o le Fofoga Fetalai ona na ia faaalia, o loo manino i le vaega 25 o tulafono o galuega faa-Palemene le faasā e soo se ofisa faasalalau ae o nusipepa foi ona faalauiloa mataupu o lipoti nei a o lei toe foi ane ua mae‘a ona fai i ai iloiloga ma suesuega a le Komiti Faapalemene. O lea na faamoemoe e toe foi ane lea lipoti mo le faalautelega o talanoaga a le Palemene i le masina o Tesema i le tausaga nei. E ui o lea ua mae‘a nei ona lomia ma ua faapea foi ona faaali i ai finagalo o nisi o le atunuu na vaaia lenei lipoti i luga o le nusipepa.
O le faamatalaga a le Fofoga Fetalai, na mae‘a ona ave se tusi i le Samoa Observer e lapatai ai i le tulaga lea ua faia, ua soli ai le tulafono faapalemene, ae o le aso lava lea na lolomi ma faalauiloa ai lana tusi, na faalauiloa ma lolomi ai le lipoti lava lenei na faia i ai le faatonuga e taofi.
E lē gata i lea o le mae‘a o le tusi na tuuina atu e le Fofoga Fetalai ae tusi mai ai le Faatonu o le nusipepa o le Newsline e faaali lona finagalo i lenei lipoti, ma o le mafuaaga la lea ua agai ai nei le Fofoga Fetalai o le Maota le Afioga Laaulialemalietoa Leuatea Polataivao Fosi i le Matagaluega o Leoleo faapea le Ofisa o le Loia Sili e silasila ma suesue le mataupu lenei ona o lona manatu ua leai se faaaloalo ma se usitaia o tulafono  o le Palemene e nei lomiga.
Ua iai foi ma se lapataiga i isi ofisa faasalalau aemaise isi nusipepa ina ia aua ne‘i lomia ni mataupu o lenei lipoti ona e solia ai le tulafono ae o le a faatali poo le ā le suesuega a Leoleo o le a faatautaia nei.
Sa toatele lava tusitala na faaali finagalo i le mataupu ona o le manatu e taatia loa se lipoti i le laulauafono a le Palemene mo le faatalatanaoaina, o iina e faataga ai loa tusitala ona o latou lipotia mataupu o nei lipoti auā le tiute foi lea ma le matafaioi faatusitala o le logologo o mataupu uma ia ua aumai i luma o le Palemene.
Peitai na ta‘ua e le alii Fofoga Fetalai e lē o taumafai e aiāina le saolotoga faatusitala ua faapea foi ona faamalosia i lalo o le Faavae o Samoa, ae o le atugaluga ona o le tulafono lea ua patino i le tapu e pei ona lotea nei, e manino lava le faapea mai, e tatala le avanoa e pei ona ta‘ua e tusitala, i le mae‘a ai o le uluai suesuega ma se lipoti e tuu ane e le Komiti Faapalemene, ae e leai se aogā e toe avatu ai ia i latou ua tofia e faia tulafono o le atunuu se lipoti auā se latou faaiuga, ae o lea ua mae‘a ona talanoaina e le lautele o le atunuu ae e lei pasia.
Ua tālia nei la poo le ā le iuga o le suesuega ua faapea ona tuu atu nei i le Ofisa o le Loia Sili atoa ai le matagaluega o leoleo e faatatau i lenei mataupu.