Avau le fusuaga faatoa uma faafiafiaga le Taumafai Club

O le Taumafai Club o se faalapotopotoga o ni uo ma aiga sa faia le latou faafiafiaga tele i le itu i Saute o Brisbane.
O le auga ma le manatu autū na fofoa ai lenei kalapu, ina ia mafai ona faia ni teugatupe auā lava le manaomia pe a faafuaseia ai aiga a o mafai ona tali atu i totonu lava o le lotoifale ma sui auai.
O nisi o alo o le atunuu o aofia i lea kalapu – Saofaivaatele Faavesi, Etemoa Michael, Taua Iakopo, Ausalilo Wikki, Tanu, Toma ma Tafeamaivasa Taivale.
Na faatumulia le faamoemoe i le po o le Aso Toonai 20 o Iulai, i le fiafia i le kalapu aemaise foi le faafiafiaina o le aueva i le mālie o musika a le Simply Savaii Band, le susuga ia Dan ma le aufaili.
O le mae‘a ai o le po fiafia ma ta‘ape le aofia i lea lava afiafi ae maua ai i meapueata a le auevaeva le avau o se vesiga seia oo lava ina fufusu. O le itu e faanoanoa ai, ona e avau lava nei vesiga i fafo i nofoaga faitele ma e matauina ona o luga lava o le avamalosi.
E tele ni itu e fia faamanatu, ma e leai se agaga e fia ta‘ua ni suafa o latou na vevesi, ae na o sina fautuaga auā e toe oso pea malama ma faapea le po e lē ao. E ese le manaia o se tagata na te pulea lona ia lava loto ae atonu ua toe iu lelei le fevesia‘iga, ae manatua e faigata ona toe aoao mai se ipuvai ua masaa.
O lou tauleleia ma le ituaiga tagata e iai oe ma a‘u e iloa gofie lava pe a tulai mai ni vesiga i nofoaga faitele. O itu lena e ao ona putiputi ai mai i le ta‘uvalea. Afai e lē mafai ona faatautaia le ava malosi, manaia le aua e te pa‘i atu i ai e sasao ai le afi ma lē mafai ona tapē.
Ia taofiofi nei ma onosai ni faaletonu se‘i teuteu na o oulua nai lo le faapā i nofoaga faitele e aliali ai le matagā sa lilo. O lenei vaitaimi ua lata mai le Alii ma e lē tatau ona  toe tauaifusu ni ulugalii.
Ia taumafai e tausi le filemu ae tuli ese le fili ma le tiapolo o ia o loo fai ma sasa i totonu o aiga. Faaitiitia le faia o faamatalaga e te silafia e ono manu‘a ai le loto o le isi auā o le ala lena o le taei o fagu ma vevesi ai malo. O nai faamanatu ae pule a le sitafune i le la o lona sā.