Ua i lima nei o se tasi o faalapotopotoga mo a‘oa‘oga le Best Training ma ana polokalame faatulagaina mo le lumanai, se vaega tupe e fesoasoani ai mo avanoa sikolasipi e faaagaga mo soo se tagata Pasefika e manaomia.
Ua mae‘a ona faalauiloaina faalauaitele le Best Pasifika Leadreship Academy, ma le Charitable Foundation, le avanoa ai o ia tupe faaagaga mo le atina‘eina o agavaa ma le tulaga toe faaleleia atili o tomai mo taitai o le Pasefika ma soo se tasi e mafai ona agavaa i ai.
O le faalapotopotoga ua ta‘ua o le Best Pasifika Leadership Academy, sa faavaeina e le susuga i le alii pulenuu o le Super City, Len Brown.
O le autū sa mafua ai ona laga lea faalapotopotoga, ona o le manaoga o le alii pulenuu, ina ia siitia ai ma atina‘e aiga i le tulaga tau tupe maua.
E lē gata i lea, ae ia saga faateleina ai pea avanoa e toe maua e soo se tagata e a‘oa‘oina ai i le tulaga o pisinisi, ma atina‘e manuia ina ia alualu ai pea agai i luma le manuia o tagata lautele mo tagata Pasefika i totonu o Aukilani ma le atunuu atoa.
Ua fai paaga nei lea faalapotopotoga fou i le sootaga vavalalata ma le Best Training, faapea ai ma le Iunivesite o Matata Eseese i Aukilani, ina ia mautinoa o le a tiliva ma le poto atoatoa e tatau ai le faamoemoe o seleni ma le feau o loo afifi ai i totonu o avanoa sikolasipi ua ofoina.
O le tamaitai faatonu aoao o lea polokalame, Beatrice Faumuina, na ia faailoa le tāua tele o lea fuafuaga, ma o le aano moni lava o le taumafai malosi lea e unai nisi ina ia laasia le tulaga taitai ma agavaa maualuluga e faatonutonu ai pisinisi ma le puleaina o kamupani.
E mafai lea tulaga pe afai ae siitia tomai ma le poto mo tagata Pasefika, ma o le a fesoasoani tele lea mo tupe maua a aiga taitasi.
Ona talu ai o Aukilani o le taulaga numera tasi lea i Niu Sila, i le toatele o tagata Pasefika o loo aumau ai, o le tasi lea o mafuaaga ua faatāuaina ai, ma tuuavanoa i ai lea foi polokalame tāua.
E lē gata i lea o Aukilani foi e matuā tele ma maualuga le sao ma le lagolago a tagata Pasefika i le atina‘eina o le tamaoaiga o le atunuu atoa o Niu Sila. O le isi lea auala o le faamuamua o Aukilani.
O le aso 24 o le masina na tea nei, na faataunuuina ai le sauniga sa faalauiloaina faalauaitele ai lea polokalame, ma o loo faauluulu nei i le tamaitai o Beatrice Faumuina.
O le fale Pasefika i le Iunivesite i Aukilani sa faataunuuina ai.
O le afioga i le tamaitai Minisita o Tina ma Tamaitai o Niu Sila, Honourable Hekia Parata, sa fai ma sui o le malo e momoli ma saunoa faapitoa mo lea sauniga faapitoa.
Saunoa Beatrice Faumuina, o fesootaiga uma ma talanoaga i le tulaga o avanoa sikolasipi e pei ona fofogaina, ua mafai nei ona fesootai tuusa‘o ane ia te ia.
Sa ia toe ta‘ua foi lona faamoemoe tele o iai, ina ia faaaogā tatau ia avanoa, ma ua tatau ona matuā siitia ai le tulaga faataitai, ma pulega mo tagata Pasefika, mo le puleaina o pisinisi ma kamupani, ma isi avanoa maualuluga i le atina‘eina o galuega ma totogi, ae fesoasoani ai foi i le atina‘eina o le tamaoaiga o Niu Sila.
