Ua tatalaina nei ni avanoa sikolasipi mo tupulaga talavou Samoa i Niu Sila, i lalo o polokalame a le faalapotopotoga a le Samoa Sports Association.
O se feiloaiga ma le tamaitai o Kim —– mai le ofisa autū o le faalapotopotoga i Aukilani, sa ia faalauiloa ai nisi o vaega ma taumafaiga sa galulue faatasi ai ma nisi o alo ma fanau a le atunuu i tausaga ua mavae.
Sa taunuu i se taunuuga manuia ma le faaeaina, taumafaiga uma sa faia i taimi ua alu, ma le tau amataina mai o le faalapotopotoga a le Samoa Sports Association.
Sa ta‘ua foi e Kim, e silia ma le $100,000 le tau aofai o sikolasipi sa ofoina mo Samoa, talu ona faavae ma tulai mai lenei faamalu.
E 137 alo ma fanau sa faamanuiaina i sikolasipi ma polokalame a le faalapotopotoga.
Ua iloga foi nisi o tamafanau Samoa, sa i totonu ma sa faaaogāina lenei polokalame sa ofoina.
O se fiafiaga tele lea i le afioga i le Peresitene, le susuga Papaliitele Peter Fatialofa, ma le pulega, ona o loo maitauina pea le agai i luma, atoa ai ma le lelei o taunuuga, ua ausia e le toatele o tamafanau sa auala atu i avanoa sikolasipi sa faamatuuina.
O avanoa ua faalauiloa, o loo tuuina mo tagata lautele ina ia faaulu atu ai ma filifili ane igoa o alo ma fanau e ao ina tuusa‘o i ai ia avanoa tāua.
O tusi talosaga mo avanoa sikolasipi, o le a tapunia i le Aso Gafua, aso 17 o Oketopa o le tausaga nei lava.
Ae o nisi o tamafanau a le atunuu sa fai ma sui o lea lava polokalame, e aofia ai le susuga ia Orinoco Famausili-Banse-Prince.
Orinoco Famausili-Banse-Prince
(Youth Scholarship Recipient 2007)
O le susuga ia Orinoco, o lana taleni o le aau (swimming), ma ua iai lea alo o le atunuu i se tulaga maualuga ma ua ia asuia se tasi o amataga lelei mo lona taumafai.
O le 2007 na uluai ulufale ai i sikolasipi ma amata ai lona taumafai seia oo ina faaeaina ma ua vaai maualuga nei i ai Niu Sila, mo taaloga faavaomalo, ona o lona tulai mai ma lana taleni.
O le ā le faamoemoe o le Samoa Sports Association?
O le faalapotopotoga lenei, e iai sona sootaga ma le faamalu a le Samoa Sports Award, o i latou o loo faatulagaina ma tuufaatasia tufaga faailoga mo tama ma teine taaalo uma a le atunuu, i soo se taaloga o loo faataleniina ai.
Na afua mai le totōina o le Samoa Sports Association, ina ua tulai le tele ma le anoanoai o tamafanau Samoa, o loo faaaogāina o latou tomai i taaloga, ma ua fesoasoani tele e siitia maualuga ai Niu Sila, i le va i fafo ma isi atunuu.
O le sao o alo ma fanau a le atunuu, sa lē fua tasi i se taaloga, ae ua toeitiiti lava o taaloga uma, o loo taulamua ma avea ai ma tumutumuga o faamoemoega o Niu Sila. O le amanaiaina ma le faalauiloaina o le sao o tamafanau Samoa i taaloga i Niu Sila, o se fuafuaga ua alagatatau ona faia. O se avanoa foi e saga tapu‘e ai le taleni, ma faamalosia tupulaga talavou, ina ia faaauau pea le ola tauivi, ma le sogasogā i lea foi vaega o le soifuaga.
E lē gata i lea, ae ia faia ma vaaiga ma faataitaiga mo alo ma fanau laiti o loo tutupu a‘e, o le a mulimuli ai foi i luitau lelei ma le aogā.
O nisi o la latou anavatau, o le taumafai lea ina ia atina‘e tupulaga talavou, ia lē gata i taleni ma taaloga, ae faapea foi le ola ma le soifua lelei toe maloloina.
E talitonu le faalapotopotoga, e tatau ona o faatasi le fiafia i taaloga, ma le tauivi e saili le soifua lelei ma le soifua maloloina.
O le tele faatupulaia o le fiafia i taaloga e mafua mai i le malosi o le tino, e maua mai i le maloloina, ma le mafaufau manino, o ni vaega o le soifua atia‘e maloloina. O le talenia i taaloga ma taleni, o se tasi o alatupe tele i aiga ma atunuu, ma ua faamoemoe tele i ai faatatauga ma fuafuaga lautele.
O nisi o tamafanau a Samoa iloga i taaloga, sa faamanu‘aiina i tufaga faailoga sa faatautaia e le Asosi lenei i tausaga ua mavae.
Ross Taylor (Winner Junior Sporstman of the Year 2004 & Supreme Winner 2007)
O le susuga ia Ross Taylor, o loo avea nei ma kapeteni o le aukirikiti faavaomalo a Niu Sila, le Black Caps. O se tautinoga a lea alii taalo, sa ia ta‘ua ai le malosi o le lagolago a lona tina i lana taaloga. Fai mai Ross, e masani ai ona a‘oa‘oina o ia i tu ma le aganuu a Samoa, ma fai ane lona tina ia te ia, ina ia matuā ta masau le polo kirikiti, ma ua fiafia tele ai e faatino lea gaioiga i taimi uma e tu ai i totonu o le malae kirikiti, mo se taaloga.
Sonny Bill Williams (Winner Junior Sportsman of the Year 2004)
E lē tau faailoaina taleni a lenei alo ta‘uta‘ua, ua lauiloa i le lalolagi atoa e lē gata i le lakapi liki, o le lakapi, faatasi ai le fusu poo le faipele e pei ona fiafia i ai. Sa tautino lea alii taalo e faapea, o lona fiafiaga tele ona o ia o se tagata Samoa, ma o le isi lea tāua na mafua ai ona ta lana pe‘a i lona tau‘au, ina ia ta‘u atu ai i le lalolagi, lana aganuu ma lona faasinomaga. O le saunoaga a Sonny sa ia toe faamanatu ai le matuā lē faoa o lona fiafia, ona o ia o se tamafanau a Samoa.
O le faagasolo ai o le taamilosaga lakapi o lenei tausaga, ua faamaonia ai pea le alualu ma le agai pea i luma o le lagolago a Samoa mo Niu Sila, e ala i ana tama taaalo ua filifilia mo le All Blacks.
E lē o se lagolago e toe taufaailoaina, le galulue faatasi ai o Samoa ma Niu Sila i le tulaga ma le atina‘eina o taaloga mo tupulaga talavou i totonu o le atunuu.