(o mafatiaga mai mala o le sunami ua tatala ai le avanoa mo ni avanoa sikolasipi)
Ua faatulaga nei e le Iunivesite a Massey ni avanoa sikolasipi faapitoa mo tagata Pasefika, ina ia a‘oa‘oina i le auala e pulea ma faatulaga lelei ai le toe faaleleia o ni mea e faaleagaina i taimi o mala faalenatura.
O lenei polokalame fou a le iunivesite ua matuā lagolagoina fiafia e le susuga Ben Taufua o loo galue ai o se faufautua mo atinae a le Pasefika i totonu o le Iunivesite a Masssey, ma sa uunaia malosi foi e Taufua le aogā o lenei polokalame, aemaise lava o Taufua se tasi na iloga ona mafatia i aafiaga o le galulolo na taia ai Samoa ia Setema 29 o le tausaga talu ai, lea na maliliu ai le to‘a 14 tagata o si ona aiga.
O lenei polokalame fou, le ‘Pacific Disaster Management Research Programme’ o le a amata i le tausaga fou, ae o le aoauli o le Aso Tofi talu ai na faasilasila aloaia ai nei avanoa sikolasipi e le Assistant Vice-Chancellor, (Mäori ma le Pasifika), o Professor Sir Mason Durie i le fonotaga lona 4 a le Australasia Hazards Management sa usuia i Ueligitone i le vaiaso talu ai.
O lenei polokalame o le a faatulaga ai se avanoa sikolasipi i tausaga taitasi, e tusa ma le $5000 le tupe e faaalu ai mo se tagata a‘oga o le Pasefika o loo a‘oa‘oina ai (undertaking graduate or postgraduate) i mataupu tau le puleaina ma le vaaia o mea ina ua tuanai se mala. E lē gata i lea, e iai nisi avanoa e 4 ua faatulaga ese i le vaega autū a le iunivesite, le Emergency Management Summer Institute, lea e faagasolo i le masina o Mati i tausaga uma.
Ta‘ua e Sir Mason, e lua avanoa o le a taofia mo ni tagata a‘ooga o le Pasefika o loo nonofo ai lava i motu o le Pasefika, ae o le isi lua e faatulaga mo ni tagata Pasefika o loo aumau i Niu Sila.
E pei ona ta‘ua, o le susuga ia Ben Taufua, na matuā iloga ona mafatia si ona aiga i Samoa mai lenei faalavelave matautia, le sunami e pei ona taia ai le talafatai o le Atu Aleipata i le masina o Setema i le tausaga talu ai, 2009.
O le aiga o Taufua sa fai le latou pisinisi o fale tu mafatafa e malolo i ai turisi i lea faaitu o le motu i Upolu i Samoa, ma na matuā faatamaia uma e le malolosi o galu o le sunami lena atinae. Saunoa Taufua, o le aso lava lea na taia ai lona nuu ma lona aiga i le sunami, na malaga ai loa i Samoa i lena afiafi se‘i vaai ma fesoasoani i le tau sailia o tagata o lona aiga.
E to‘a 180 tagata i Samoa ma Tonga, na maumau ai o latou soifua i lenei galulolo tele, lea na oso faafuasei ina ua mavae le lūlū o se mafuie e tusa lona malosi ma le 8.1 i le fua mafuie.
O ina foi na matauina ai e Taufua le iai o se lape i le auaunaga aemaise le faamaopoopoina o mea mo le toe faaleleia o vaega o le atunuu na faatamaia. E moni sa iai fesoasoani ma polokalame laveai na faatino, ae na ia ta‘ua o si ona lava aiga sa tauivi lava latou e onosaia lenei mala, ma sa faapena foi i nisi aiga mafatia.
O le faanaunauga lea o Mr Taufua, ia lelei ona a‘oa‘oina tagata o le Pasefika ma iloa poo ā mea e tatau ona latou faatino ma faaaogā i taimi faapea, aemaise o le faamaopoopoina o fesoasoani laveai, ina ia mafai e i latou ona tele so latou lava sao i le toe foiaina o o latou faafitauli, nai lo faalagolago tasi i faalapotopotoga mai atunuu i fafo mo na fesoasoani. Ma e iai le talitonuga, o nei avanoa sikolasipi i le iunivesite, o le a telē sona aogā i le a‘oa‘oina o tomai e puipuia mai ai le maumau o soifua ma meatotino o ni malama faapea.
