O le agaga finau sailimalo o o tatou tagata e maualuga lona tulaga i soo se finagalo ma faamoemoe, aemaise lava le paia ma le mamalu na soifua a‘e i le fita ma le faigata o le soifuaga i Samoa, na mafua ai ona tuua aiga ma afioaga ae saili matagi mai i atunuu ese. O le finagalo foi lea o le susuga ia Ronnie Logova, o ia o se tamalii o loo faaopea i le aai o Melepone.
O loo faigaluega le susuga Ronnie i le Universal Institute of Technology, o lona tulaga siitia i le matagaluega na amata ai ona ia faagasolo le polokalame a le kamupani o le toe aoaoina o tagata lautele o fia maua le faalauteleina o tomai i le gagana faaperetania (English) faatasi ai ma le malamalama i masini komepiuta (Computer Skills), atoa ai ma nisi o mataupu eseese o moomia e tagata auā le sailia o ni galuega, poo nisi galuega e sili atu le totogi. Na silasila toto‘a lenei tamalii ma maitauina le aogā o lenei polokalame mo nai ona tagata Samoa, na amata faasalalau ai loa lana fesoasoani mo le paia ma le mamalu o le atunuu o alala ma papaaao i le aai o Melepone.
O lenei faamoemoe e faatino fua e leai se totogi, ae saunia ma tapena uma e le kamupani a Ronnie ia computers ma tulaga uma e moomia e tagata uma e resitala, latou te totogiina foi malu ma hall e fai ai aoaoga ma training, pau lava le manaoga o le kamupani, e faatoa mafai ona amata se training, pe a atoa le 15 o tagata resitala.
O se mitamitaga i lenei tamalii, ona o le tele o Ekalesia ma faalapotopotoga a tagata Samoa atoa foi ma isi atumotu o le Pasefika i totonu o Melepone, ua tatalaina avanoa e toe a‘otau ai le paia ma le mamalu, ma tele ai se avanoa e faalautele ai le silafia, aemaise lava i le gagana igilisi ma le faakomepiuta.
E toatele nisi ua amata ona maua galuega e ala i lenei fesoasoani, e momoli ai le faafetai i le susuga ia Ronnie, ona o lona finagalo lagalaga mo le lumanai manuia o o tatou tagata.
