Autasi Tonga ma Fiti faaauau au lakapi tuufaatasi

Ua tutu faatasi Iuni Lakapi a Fiti ma Tonga e faamaopoopo pea le au lakapi tuufaatasi a le Pasefika, le PIRA poo le Pacific Islands Rugby Alliance e ui ina faamaamulu le Iuni lakapi a Samoa o le a le toe auai tama o le Manu Samoa i lea au tuufaatasi. I nisi o tusitusiga i le upega o fesootaiga, o loo faaalia ai se finagalo o le Ofisa Sili o le Iuni Lakapi a Samoa, le susuga Su’a Peter Schuster e faapea, ua uma ona latou logoina le PIRA e tusa ai o la latou faaiuga, ona e iai lo latou talitonuga, o lenei soofaatasi, lea o loo tuufaatasia ai Fiti, Samoa ma Tonga, e le o mafai ona ausia nisi o latou sini tauave poo ni fuafuaga faataatitia na mafua ai lea soofaatasi.
Peitai ua faaalia e le ofisa sili lagolago o le iuni lakapi a Tonga i se lipoti i le amataga o lenei vaiaso e faapea, o le a faamaopoopo pea e latou ma Fiti le au, ma o le a saili foi nisi auala e faaleleia atili ai.
Na taua e Su‘a, o le uluai fuafuaga lava, ina ia tailua tausaga ma maua se avanoa e taaalo ai. E lua itu na taulai i ai lena faamoemoe, muamua ina ia maua se seleni e fesoasoani i le faatupeina o polokalame faatino a iuni, ma lona lua, ina ia maua e tama taaalo ni avanoa e toe taaalo atu ai ia latou lava au. Peitai na suia e le Komiti Faafoe a le Lakapi Faavaomalo, le IRB le faatulagaga ma faatoa maua taaloga a lea au tuufaatasi a le Pasefika i le taifa tausaga ma fai. Saunoa Schuster, e le mafai ona vave maua mai se tupe pe afai e taifa tausaga ma faatoa fai ni taaloga a le au, aemaise e iai foi le faanaunauga o atunuu taiasi o loo iai i lea au tuufaatasi, e fia faalauiloa a latou oloa ae le o mafai ona tele ni sponsors o maua.
E manatu la Su‘a, e sili ai ona ausia lea faamoemoe pe a sagai lava le iuni ia e faagasolo ana taaloga faitaulia. O le tasi itu ua faia ai lea faaiuga ona na faaalia e le taitaifono o le iuni lakapi a Samoa le susuga Tuilaepa L Sailele Malielegaoi, e le o maua ni tupe lelei mo le atinaeina o iuni mai taaloga a le au lakapi tuufaatasi.