E ui ina eseese motu o le Pasefika e Malaga mai ai, ae ua pei o se aiga e tasi ona o loo taufai galulue uma i lalo o le polokalame mo galuega faavaitaimi i faatoaga ma lafumanu i Niu Sila, le Recognised Seasonal Employer (RSE).
O le augalulue mai Tonga, Samoa ma Vanuatu, o loo faatino foi o latou sao i nisi o polokalame faalelotu mo lo latou soifua tapuai a o aumau ai i nuu ese.
E pei la ona iai se mafutaga e faia faaletausaga, ma sa faagasolo i le malumalu i le aai o Nelesoni i le Motu i Saute o Niu Sila, lea sa faatulaga ai i vaega le augalulue mai nei atunuu eseese, mo le faatinoga o a latou aufaipese faalelotu.
O le polokalame sa faaigoaina, Many People, Many Songs sa faagasolo ai nei pesepesega matagofie mai atunuu eseese.
O lenei faatasiga sa faamaopoopo e le Pulega a le aai o Nelesoni, le Nelson Multicultural Council, ia latou faiga paaga ma le Nelson Cathedral ma le Fono a Ekalesia, le Council of Churches.
O le faamoemoe ina ia mafai ona tuufaatasia uma ituaiga eseese o tagata poo fea lava le atunuu e omai ai, ae ia mafai ona faatasitasi e pepese faatasi ia latou tapuaiga.
Na ta‘ua foi e lē o loo faauluulu i ai tulaga o galuega faavaitaimi i le Matagaluega o Leipa a Niu Sila (New Zealand Department of Labour’s National Manager, Recognised Seasonal Employment), o Emily Fabling e faapea, o lenei fuafuaga ua avea o se avanoa lelei mo tagata faigaluega nei mai le Pasefika, e le gata e faifai mea faatasi ai foi ma le komiuniti i vaipanoa o loo nonofo ai, ae toe faaiila ai foi o latou tomai i le faalauiloaina o a latou aganuu, e ala i le toe pepese i ni pesega e masani ma fiafia ai, aemaise lava o le toatele o i latou sa pepese lava i pesega mai a latou gagana o o latou atunuu.
O le lima ai lenei o tausaga talu ona amata mai lenei polokalame e tuufaatasia ai le komiuniti ma tagata galulue nei mai le Pasefika o loo galulue i faatoaga, ma ua atili maua ai foi e tagata o na aai se lagona e latou te talisapaia ma talia nei tagata i o latou vaipanoa, ua talisapaia foi le matagofie o a latou aganuu ma uiga masani, aemaise ai o le telē o lo latou sao i le atinaeina o faatoaga e le gata i faatoaga laauaina ae faapea foi i faatoaga o lafumanu, lea o loo tele ina galulue ai i latou nei mai le Pasefika.
E oo foi i pulega o kamupani nei o loo galulue ai tagatanuu mai le Pasefika, sa faaalia foi le latou lagolagosua e ala i le unaia o a latou tagata faigaluega ia mautinoa e auai i nei faatasiga, ma fesoasoani foi i le faatupeina o sina vaivevela auā se faamalositino māmā i lea aoauli.
Saunoa Ms Fabling: “O nei tagata galulue e o mai atunuu eseese, ma o le oo mai iinei ma galulue i faatoaga, ma aumai ai ma a latou pesega logomālie, ua atili ai ona matagofie ma iai se lagona moni lava faavaomalo i lea faamoemoe.
Ma ua le gata ina maua ai se avanoa e malamalama lelei ai tagata o isi atunuu i tu ma aganuu a le isi atunuu, ae o se latou maealofa lelei foi ua foaina atu mo le aai o Nelesoni o loo aumauai.”
