Na maualuga ma matagofie le faamoemoe i Sini o le afioaga o Letui mai le Itu o Tane. O le Afio o Aiga i le Nofo a Ituaiga, Fatua ma le falelupe ma le fetalaiga Fiu lea na ausia ai le $78,200,00 auā le galuega mo le malumalu o le EFKS o le afioaga.
O le Maluapapa Hall a le EFKS Fairfield na faia ai lenei tusigaigoa sa talosaga mai ai le nuu ma le faafeagaiga ia Rev Malo Tanielu ma le faletua ia Ioka lea na malaga mai le Pulenuu ia Peauala Ieti e faatasi mai i lea faamoemoe.
O le toeaina Faatonu ia Rev Peleti Toese Toailoa na amatalia le aso i se faamanuia ma se tatalo puupuu ma amata ai loa le maau ma le milomilosia o le paia ma le mamalu na masii atu.
Sa faafeiloai foi e le Tofa Fiu Pili le aofia ma seei ai loa le fofoga o le aso, le Afioga Tunumafono Faatoafe Tauloa Fonoti i le faasoaina o laulausiva ma foai na gasolo atu auā le fia togimaa faatasi mo le galuega a le Atua.
O le susuga Rev Kolia Kolia ma le faletua ia Sootuli o le EFKS Campbelltown na auai atu foi faapea le EFKS Camden aemaise le susuga Rev Iosefa Iuvale ma le faletua ia Satui. E pei ona silafia na o le toalima matafale o lenei mafutaga i Sini nei, ae na faaopoopo i ai ma nai nisi aiga i lea aso ma matalasi ai Siva Samoa e sefulu na fesoasoani tele i lenei aamoemoe.
O le Afioga Togoi‘u ma Sala, Tofa Fiu Pili ma Faimasasa Masi, Tofa Fausa Tapusoa Siofele ma Ana Masi, Afioga Lemalu Feagaiga Puepuemai ma Pasia Puepuemai, Tofa Feagaimaalii Keneti ma Ruta Masinalupe, Tofa Fiu Perise Masinalupe, Afioga Tunumafono Faatoafe Tauloa Fonoti ma Luisa, faletua ia Aolele Faatoafe, Susuga Kaio Patelesio ma le faletua faapea le Tofa Feagaiga Masinalupe.
Na taualuga le aso i faaaloaloga masani e toe faafoi ai le agaga faafetai ma le faamalo a le afioaga i le aufaigaluega tofi faapea le paia i tupu ma e‘e aemaise le mamalu lautele na alolofa atu i le faamoemoe, lea o le a fausia ai se malumalu fou o le EFKS i Letui ma o le a faapine ai foi suafa o ē uma na fesoasoani i se maa faamanatu o le a saunia.
