Aumai meli la‘upasese – lē lava potu faletalimalo i Samoa

E na o le tasi le afe potu pe a tuufaatasi uma potu o faletalimalo o loo i le li‘o o le taulaga o Apia. Ua faaalia ai e le afioga i le Palemia, Susuga Tuilaepa Lupesoliai Sailele Malielegaoi, o le mafuaaga lea o le silasila o le Malo i se meli la‘upasese e taula i le uafu i Apia ae nonofo ai usugafono o le a malaga i Samoa i le tausaga fou 2014, i le fonotaga tele a atunuu laiti e 193 o sui o Malo Aufaatasi e talanoa aafiaga o atunuu laiti i fesuiaiga o le tau.
Saunoa le Palemia i se feiloaiga ma tusitala i le vaiaso ua mavae, e lē sa‘o le faaaliga a se tasi o faifaletalimalo e faapea o loo lava potu mo lea faamoemoe. O le malaga talu ai nei a le taitai o le Malo i ni fonotaga sa usuia i Niu Sila sa ia faatalatalanoa ai le mataupu i se meli la‘upasese ma le Minisita o le va o i fafo o Niu Sila.
I le tatalaina o se tasi o faletalimalo fou, le Aga Resort i Lalomanu Aleipata, na faaalia ai e le Palemia o ia o le Minisita o le pulega o tagata tafafao maimoa mai fafo, o le tala ane a le minisita o le va i fafo o Niu Sila, o le toatele o tagata tafafao mai isi atunuu e fia malaga e nonofo i faletalimalo tu matafaga, ma o le tulaga foi lea o loo silasila i ai le malo ia faaaogā le avanoa o le a malaga mai ai usugafono e silia i le toluafe e nonofo i faletalimalo i nuu i tua.
O le itu tāua ia maua e le tagata malaga mai fafo le avanoa e silasila ai i le matagofie o nuu i tua ma le soifuaga o loo soifua ai tagata, ma ia maua foi le avanoa o loo moemiti i ai, o le moe i luga o le sami ala a e i le taeao vaavaai atu i le fafati mai o galu ma le laulaututū ane o niu uumi, o vaaiga ia e lē maua i atunuu e o mai ai tulisi.
O le tatalaina o lea faletalimalo fou na muai ta‘ua ai e le Palemia le fuafuaga o le aumaia o se meli la‘upasese e faaaogā e nonofo ai tagata o le fonotele o le a usuia i le tausaga fou.
O lona uiga o se isi lea luitau e toe silasila pea i ai le Malo, o le faateleina o nisi faletalimalo ina ia lava potu mo fonotaga tetele faapea. O le taligamalo a Samoa i taaloga a le Pasefika i Saute na laumanuia ai foi le aumai o se meli la‘upasese e nonofo ai tagata taaalo pe afai e lē lava nofoaga e faamautu ai, peitai sa lava ma totoe nofoaga i Malifa lea o loo iai nisi o a‘oga sa faaaogā mo lea taligamalo.