Ua sauni atu foi le komiti a le ASB Polyfest, mo le faamanatuina o le 35 tausaga o le latou polokalame faasolo e pei ona iai i tausaga taitasi.
O taimi nei e tulimatai e le toatele o tagata Pasefika mo le faaalia o tu ma aganuu a le Pasefika, e pei ona faatino ai e aoga maualuluga i Aukilani nei i tausaga taitasi.
O le tausaga nei lea ua iai le faamoemoe o le a faatino ai lenei faaaliga mai le aso 17 e oo i le aso 20 o le masina o Mati.
O le tausaga e 1976 na amata mai ai lenei polokalame, ina ua potopoto faatasi aoga e fa i le nofoaga o le Kolisi a Hillary, ma faatino ai la latou tauvaga. Mai lena amataga ititiiti na tuputupu ae seia oo ina avea le ASB Polyfest o se faaaliga sili ona tele o tu ma aganuu a Maori ma le Pasefika i le lalolagi.
O le tausaga talu ai 2009, e tusa ma le 59 aoga na tauva, e aofia ai fanau aoga e 9,000, ae i faamaumauga na iloa ai e tusa ma le 90,000 tagata na maimoaina lenei faaaliga.
O faaaliga nei e faailoa ai siva, o pese, faaaliga o laei, faapea lauga poo tautalaga i soo se gagana a Maori ma le Pasefika.
E tusa e lima fata poo stages e faatulaga i ai nei faafiafiaga, o le fata a le Atu Kuki, fata a Maori, fata a Niue, fata a Tonga, ma le fata a Samoa.
O le tausaga nei la, o le a iai se isi fata faaopoopo, e tuufaatai i ai nisi o faaaliga mai isi foi aganuu eseese e pei o Saina, Korea ma Initia.
O lenei aso o faaaliga ua faamaopoopoina i se faiga paaga faatasi a le Asosi o Aoga Maualuluga i Aukilani (Auckland Secondary Schools Assn), le Komiti Whakahaere, le SMC Group, faatasi ai ma le aoga o le a talimalo i lenei tausaga – le Kolisi a Sir Edmund Hillary Collegiate.
O le lona lima ai lenei o tausaga o maua e Sir Edmund Hillary Collegiate le avanoa e talimalo ai tauvaga nei.
O le uluai taimi na latou talimalo ai, o le tausaga e 1976, ma ua talafeagai ai foi la ona avea i latou ma vaega autū o le faamanatuina o le 35 tausaga o lenei faaaliga tele a aoga maualuluga i Aukilani.
Mo le 2010 ASB Polyfest i le tausaga nei, ua latou filifilia ai e avea ma matua tauave, se tasi o faitau iloga mai le alii tautaua o Sir Edmund Hillary – “E lē o le mauga e tatau ona tatou manumalo mai ai, ae o tatou lava” (It’s not the mountain we conquer, but ourselves).
O le ulufale e $4.00, ae o tamaiti laiti e lē totogia.
