“Ua soona olioli nei lo‘u loto ia Iesu, ua ia faaola ia te a‘u o la‘u lea pese fou.” O lagona faagaeetia ia o le Tina matua ia Faaa‘e faapea le nofoaalo ma aiga pele ina ua aulia fiafia lona 100 tausaga i le masina na tea nei (Novema) ma faailogaina ai i Santa Ana, Amerika, i se valaaulia tele ma se mafutaga fiafia faatasi a fanau, fanau a fanau ma fanau a fanau a fanau.
O le tina ia Faaa‘e e mai le afioaga o Samauga i Savaii. Na faaipoipo atu i le susuga i le faifeau o le ekalesia Mamona o Tulimalefasi Iupati Tanielu mai le afioaga o Safotu ma Saleaula i le motu tele i Salafai.
E sefulufitu o la alo ma e lima tupulaga a lenei tina. Na maliu le susuga i le faifeau ia Tulimalefasi Tanielu ina ua 98 tausaga o lona soifua, peitai o lenei ua aulia le 100 tausaga o si ona faletua ia Faaa‘e o soifua manuia pea.
Na malaga atu le fanau ma aiga mai soo se atunuu o le kelope o loo aumau ai ma o se faatasiga (Reunion) mafanafana ma le faagalogata lea ina ua mafai e fanau uma ona faatasia i le faamanatuina o le 100 tausaga o le Tina matua.
O le afioga ia Ulua Feleti Tanielu o se tasi o alo o Faaa‘e na fai ma fofoga o lea aso matagofie. O ia foi lea ma le faletua ma le fanau o loo tausia pea le tina matua i totonu lava o le aiga e aulia mai lenei aso o le faailogaina o lona 100 tausaga.
E ese foi lagona na ootia ai le mafaufau o le Sooatulau ona sa mafai ona auai atu i ai, ina ua vaaia le solo tele a alo o le tina ua savavali mai e amata mai lava i suli o le ulumatua faasolosolo atu ai lava seia oo i le uii o le fanau e 17 i le amataga o le polokalame o le aso fanau.
E 100 tagata pe a tuufaatasi fanau ma a latou fanau ua tutupu mai lenei tina. O se aiga uluola ma le faamanuiaina i galuega eseese aemaise foi ua iai ni isi ua avea ma faifeau i totonu o Hawaii ma Amerika lava. E sa‘o ai lava le Tusi Sa: “Ia e ava i lou tamā ma lou tina e faalevalevaina ai ou aso i le nuu o le a foaiina mai e le Atua ia te oe”.
O le faatuatua foi o nei mātua i le Atua ua faatupuolaolaina ai le fanau e pei ona faia ia Aperaamo. O le susuga ia Tulimalefasi ma Faaa‘e na la usitaia le tofia e mātua o Tulimalefasi e tausi le aiga i Safotu ma sa faapea ona tausia ai le aiga mo ni tausaga se tele seia oo ina malaga i Amerika mo le tala‘iga o le finagalo o le Atua ma le faaaoogaina o le fanau ma aumau ai loa.
O le fa‘aili lauiloa a alo o le ulumatua o Filoa Tanielu lea e ta‘ua o le Faatalatala Band, na malaga atu lava i Aukilani ma Ausetalia e faafiafia le aso o lo latou tina matua. Na mālū mālie ma logoleleia i le faafofoga leo o le aupepese o le fa‘aili aemaise foi le taina o kitara ma vaega uma na faatino ai faafiafiaga o le po. Na faasolo ai faafiafiaga a le fanau i siva ma taga eseese na matua faafiafiaina ai le auvalaaulia.
E momoli atu faamanuiaga a le tatou nusipepa i le tina ia Faaa‘e Tanielu mo lona 100 tausaga. E lē laumaua pe ausia e le toatele o tagata nei tausaga e tele, ae amuia Faaa‘e ua ia lulu ma selesele i faamanuiaga o le soifua maua mai le Atua. Ia saga tulu‘i pea lou soifua! Ia manuia tele le aufaitau.
