Polokalame faaleaoaoga faaaoga ai le tomai i le taaloga lakapi
O le fuafuaga taua a pati e pei ona taua i luga, o le a faaaogaina ai le taaloga lakapi e unai ai le feau taua i totonu o aoga maualalalo ma aoga maualuluga i totonu o le atunu i Samoa.
O le PIU poo le Pacfic In Union na afua ma i totonu o le AusAID i Ausetalia, i se manaoga mo tagata lautele o le faalapotopotoga mo le taaloga lakapi, i lona faamoemoe autu e atinae le soifua ma le ola taalo.
O lea lava fuafuaga, o le a amata faavaeina aloaia ma faamautuina i le Aoga a Vaimauga Secondary i Apia i le aso 10 o Aperila 2012.
O le tasi o alii amepasa o le PIU, o le alii Samoa o Digby Ioane, o ia foi o se tama Samoa muamua na filifilia mo le au lakapi tele a Ausetalia le Wallabies.
O le isi amepasa o le PIU e pei ona malaga faatasi ma Digby Ioane i Samoa, o le alii o Ben Tapuai, sa malaga foi i le malaga taamilo a le Wallabies i UK i le tausaga na tea nei.
E iai le talitonuga o le a tele se taua ma le aoga o le feau o le a momoli atu e ia tamafanau Samoa, o le a aoaoina ai le ola lelei ma le ola manuia e ala i agavaa ma le poto i le taaloga lakapi. O le taua o le poto mai le mafaufau, malosi o le tino ma le aoaoina lelei e mafai ona faaaogaina ai le olaga taalo ma taaloga.
Ua faaalia le agaga fiafia ma le faafetai tele o le Sui Sinia poo le Faauluuluga o le Iuni Lakapi a Ausetalia, le susuga ia John ONeill, i alii amepasa Samoa, ona o le la lagolagoina atili o le polokalame taua mo aoga i le atunuu.
O se vaega o lana saunoaga sa ia toe taua ai le penefiti o le lakapi i atunuu tetele ona o le sao mai tama o le Pasefika, ma ua alagatatau ai ona toe faafoi nisi o faiga ma faataitaiga aoga ma le taua mai ia i latou, mo o latou atunuu moni ma tagatanuu.
I Ausetalia lava ia ua matua tele ma lava le sao o tama taalo lakapi mo aoga ma tagata lautele, o se ata manino foi lea ua tatau ai ona faaaogaina lea lava faiga, ina ia tutusa ai ma atunuu o le Pasefika.
O le PIU, ua agai sao i Samoa, ina ua maea ona faalauiloa aloaia i atunuu o Papua Niu Kini ma Solomona i le vaiaso muamua atu. E lua tausaga o le a taulai i ai lea polokalame mo atunuu e pei ona taua.
O le saunoaga a le Faauluuluga o le Iuni Lakapi a Ausetalia, ua faapea foi ona tali fuaitau mai i ai le alii Pule o le Samoa Rugby Union High Performance Unit, Tuala Mathew Vaea, e faafetai ai lea polokalame mo le saga lagolagoina ai o aoga ma faalauiloa atili ai le taaloga lakapi.
Saunoa Tuala ma taua ai o le agai atu o le PIU i Samoa ma le Pasefika, o le a maua ai ni avanoa se tele mo aoga e atinae ai le taaloga mai tama taalo faiae, o le lumanai manuia lea ma le ola tautua atunuu o alii i le taaloga lakapi.
O isi vaega taua o le polokalame lenei a le PIU, e le gata i le atinaeina o le ola manuia i taaloga, ae o le a saga aoaoina atili ai foi ma isi vaega o le soifuaga faatalavou, ina ia iloa ona aloalo ese mai le tulaga o tafaoga faaneionapo o loo fai ma pogai o faafitauli i le tulai mai o faamai pipisi e pei o le siama o le HIV ma le AIDS.