Manatua Afioga Pula Tusani Laufili Vaifou Vesi Faraimo – Taulamua i le Faavaega o le Matagaluega o Tina ma Tamaitai
Mo i latou na mafai ona maua le avanoa e faafofoga ai i molimau o toe sauniga o le Afioga Pula Tusani Laufili Vaifou Vesi Faraimo, ua mautu le maoa‘e o matatia ua ausia i le soifua auauna o lenei tina. O le polokalame foi o ona toe sauniga o loo aofai ai le tele o galuega ma tofiga na ia umia.
O se faiaoga, o se Tiakono o le EFKS, o le teine tuai o le Papa, o se tamaitai faauu mai i le Iunivesite Aoao o Samoa. Sa galue o se fai polokalame a tamaiti i le Leitio 2AP. Sa Peresitene i le Faalapotopotoga mo le unaiga o Tamaitai a Asia ma le Pasefika.
Sa avea ma sui Faavae o le Komiti o le Faamatagofieina o Samoa. Sa taitai i le Au taaalo taitoa tolu a le Asosi Faataavalepolo a Samoa. Sa manumalo i le pine auro a le Vasa Pasefika i Saute i Fiti i le 1979 i le taaloga lava o le Faataavalegapolo.
Sa tofia foi o ia o se Faatonu o Faamasinoga o Fanua ma Suafa. Sa tulai mai o se sui Faavae o le Matagaluega o Tina ma Tamaitai.
O ia foi na faavaeina le Polokalame a le Malo o le Iniini lea ua faamalosia ai le lalagaina o le Ie Samoa auā se faamāmā avega i aiga, nuu ma le atunuu atoa. E lē gata i lea o se tina na taulamua i le Faavae ai o faafiafiaga a le Tupulaga Talavou o le afioaga e pele ia te ia i Saleimoa.
E matuā manino le maualuga o atina‘e ua ausia e lenei tina, ae o le isi lava vaega tāua o lona soifua e lei tele se taimi e talanoaina ai, o le itu lenei: O se tasi lenei o tina poo se tamaitai Samoa foi na mafai ona seei i saofaiga a matai.
E tele foi lava faamatalaga na maua i lea vaitau a o iai le tina lenei i le faavaeina o le Matagaluega o Tina ma Tamaitai, e faatatau i le malosi o le unai a lenei tina i lona afioaga e ala lea i le auai ai i totonu o saofaiga nei a matai, i se vaitaimi e seāseā faalogoina se tamaitai ua mafai ona talia i nuu o alii ma faipule.
O ona uiga finau ia e lē faatuaoia se tasi, na vaaia lava foi i le vaitaimi o tulai mai ai o se tasi o tina na faavaeina galuega faatino ma galuega faalauiloa a tina ma tamaitai e ala i le Matagaluega ua faatuina e le Malo o Samoa. E lei faigofie ia vaitaimi a o taumafai ai e aumai faatasi le Fono Aoao a Tina aemaise le Komiti Tumamā.
O se tasi lava na molimau i lenei tulaga o le Afioga i le Faletua ia Ipu Polataivao Fosi, se tasi sa faapea ona iai faatasi ma Pula Tusani i le taumafaiga mai o lenei matagaluega aemaise o galuega nei e pei o le unaiga o togalaau a tina i afioaga eseese ma le amataga la o le lalagaina o le iniini ae aveese ai le tele o lalaga na tumu ai faalavelave i ia vaitaimi o le soifuaga tau atia‘e mai o Samoa.
E lē o se tagata e sii soo, ae e tāua tele ia te ia le sao o le tamaitai Samoa ma lona tulai mai i totonu o faigamea a nuu, o le tausiga o aiga aemaise foi le sao i potopotoga tetele a le Malo ma Ekalesia.
O le Afioga Pula lea na fatuina ma faatautaia le uluai faafiafiaga tele a le Matagaluega o Tina ma Tamaitai lea na sausaunoa ai le uluai Ofisa Sili o le Matagaluega e taualuga fiafia o le faamanatuina o le Tutoatasi o Samoa i le tausaga e 1991.
Le faafiafiaga e lē mafai ona galo e tina ma tamaitai auā na faamautu ai ma le Matagaluega lenei ua faatuina ua patino lava i atina‘e ma le tali atu i manaoga o tamaitai o Samoa. O le faafiafiaga lea na amata ai lava ona a‘e mai le fatuga lea “Samoa lo‘u atunuu pele i le loto e,” o le faafiafiaga ua faatino uma e tina ua i lalo o le tino e tasi i le Matagaluega ua faatuina e le Malo.
O lona soifua finau foi lea na molimau i ai le afioga i le tamaitai Polofesa muamua o Samoa, le Afioga Aiono Dr Fanaafi Le Tagaloa ina ua toe agai atu le afioga ia Pula e a‘oa‘oina i le Iunivesite Aoao o Samoa ae ua sili atu i le 50 tausaga o lona soifua i lea vaitau.
O nisi o molimau e faatatau i le soifua o lenei tina o le tulaga lea o ia o se tamalii na te faatāua tele tu ma agaifanua a Samoa. O lona sao i le atina‘e o le tupulaga talavou o Saleimoa le isi molimau tele o lona naunau e tāmau i fanau lalovaoa a le Itumalo tu ma aga nei faa-Samoa.
Faaalia e nisi na galulue faatasi ma lenei tina i le Matagaluega o Tina ma Tamaitai, e fautua lava i tamaitai ina ia laei i le puletasi. “O le teine Samoa lava e onomea i le puletasi”.
O lona lava foi lea laei. Na aofia foi lenei tina i totonu o le Faalapotopotoga a Tamaitai Faipisinisi a Samoa i lona faato‘ā amataga. Ina ua faamatuu atu i lea faalapotopotoga le isi vaega o le atina‘e a Tina ma Tamaitai i lena vaitau, na mafai ai ona a‘oa‘oina lenei tina i le tulaga tau i le amataga o atina‘e tau pisinisi.
Na a‘oa‘oina i polokalame e mafai ai e tina Samoa ona latou faatuina ni a latou lava atina‘e. O faalelegapepe a le Matagaluega e lē mafai ona lē vaaia ai lenei tina a o tau amata mai lenei taumafaiga tele a le atunuu ma le Malo e ala i le Matagaluega o Tina ma Tamaitai. O le mafuaaga lea o le ave i ai o le faatuatuaga a le Matagaluega i lea vaitau, i le amataga o le polokalame lava lenei o le iniini i afioaga i tua, talu ai o se tina na molimauina foi le lima lelei i le galueaina o le Ie Samoa.
O molimau o ona uiga tausaafia i le faamaopoopoga o tina i taimi o fono tetele e aofia ai tamaitai o le atunuu o le a tumau pea auā na ta‘ua e nisi e faalagolago tele i ai le Faauluuluga o le Matagaluega o Tina ma Tamaitai i lana tofa faatamalii ma e faigofie ona faatoafilemu e lenei tina soo se feeseeseaiga e ono tulai mai i fono faalemasina a le Matagaluega.
E amanaia foi e taitai o le Malo i ia vaitaimi finagalo faaalia o lenei taitai. Aemaise i Minisita na seei atu i le Taitaiga o le Matagaluega lenei i tausaga ua mavae.
Soo se tasi foi sa iai se avanoa e molimauina ai se tasi o taleni a lenei tina, le Siva Samoa – e lē mafai ona faagaloina lea tomai na faamanuia ai le Atua i lenei tamalii. O ia foi lava na malosi i le atina‘e o tu ma aga a Samoa i lona itumalo o Saleimoa.
E manatua ai pea lenei tina – ma ua saafi ai le toatele ma faapea – Auē ua maliliu toa ua maumau ai a‘upega o le taua. O le a manatua pea le Afioga ia Pula Tusani Vaifou Faraimo – o se tasi o toa o Samoa i le atina‘e o Tamaitai.
