Auē ua gausia le poutu malosi na i uluulu o atumauga

O le faauli o atumauga ina ua to le timu ma gausia le poutu malosi sa fai ma sulu i atumauga, ua lē atoa ai le faitau ma ua suia ai lagona auā ua misia le mafutaga mafana. O le mafutaga motusia faafuasei sa lei mafaufauina i se taimi faapenei.
Ua moni ai le Tusi o Iakopo, “Auā pe se a lo outou ola? O le puao lava lea, ua aliali mai i se aso itiiti, ona mou ai lea”.

O le Aso Tofi na se‘i mavae atu nei na faia ai toe sauniga o le Tofa ia Tua‘ena Seiuli Sio Anae. O nai ona tuaa o Anae Tunufai (Leulumoega & Falelatai) ma si ona tina o Nila Roache (Lalovaea). Na faaipoipo atu ia Telesia Moli Anae, ma e to‘a 6 le nofoaalo. Na maliu filemu o ia i se gasegase na faataotolia ai i le falemai.

Na vaaia le loifofoga maligi i se molimau a le faletua ia Telesia na ia ta‘ua ai, o le toe vaiaso mulimuli lava ua aveese masini a le falemai ona ua manuia le tamā o le aiga e pei ona iai i le ICU, peitai ai o le taimi lea ua amata ona tapena ma sauni le malaga a le tofa ia Tua‘ena Sio. O le tulaga faigata na saunoa i ai Telesia, e faagalogata le la mafutaga ona o le misia o le tamā i ona uiga masani, ma le loto i le galuega a le Matai.

O le manatu lava o lenei tamā ia faia mea lelei uma e tautua ai le galuega a le Atua. O le tofa ia Sio o loo iai se tasi o ona alo o loo taalo nei i le QLD Reds, le alii o Albert Anae.
O Tua‘ena Sio o se faipese ua lauiloa e lē gata o Ueligitone i Niu Sila ae faapea foi i totonu o Kuiniselani auā o ia o se sui o le Divine Mercy a Inala i le Puleaga Katoliko.

O viiga uma sa lagiina e Divine Mercies uma a Brisbane, ma sa aami faapitoa le susuga ia Milo Alefosio mai le Divine Mercy a Melepone, e taitaia pese o le Misasa. O le afioga lava ia Patele Epati Tamati sa taitaia le sauniga ma saunoa i se upu faamalosi e faamafanafana ai i aiganalua, le faletua ma le nofoaalo.

O le tofa ia Tua‘ena Masei, sa fai ma fofoga o le aso faatasi ma le tuualalo a le tofa ia Tua‘ena Samuelu ma Fainuulelei Vitale sa feagai ma faaaloaloga auā le paia o le aufaigaluega ma le mamalu o Tumua ma Pule na potopoto. O le Tofa Lofipo Polesi Tui na fai ma sui o le Divine Mercy a Inala ma le au valaaulia e faafetaia aiga na lua i le maualuga o faaaloaloga.

Tele aiga na malaga mamao mai e molimau toe taimi o lea foi tulafale ua iloga i totonu o le Puleaga Katoliko a Kuiniselani.